30
Ini Denu Sa Etaw Metegas Ulu
8 Na, sinugù i Datù Nemula aken anì sumulat a diyà sa kalatas dinilin anì metiigan sa medoo etaw sa ukit da, enù ka iya dé sa egpetuu taman melugay. 9 Enù ka kagda sa medoo etaw metegas ulu owoy butbuten, owoy endà meiyap da amuk tuluen i Datù Nemula kagda. 10 Mig-ikagi da diyà sa medoo tegetulon sa mebaelan owoy diyà sa medoo tegesugkow kagi i Nemula, guwaen da, “Yoko eg-ikagi duu diyà kenami sa denu metudà adat.” Owoy guwaen da, “Yoko ma egtulon duu diyà kenami amuk duen sa ipehaa i Nemula diyà keniyu. Ikagiyi yu polo kami sa mepion egdinegdinegen owoy sa metolol eghahauwen. 11 Seging yu diyà sa dalan ké. Yoko egtulon duu diyà kenami denu sa Metiengaw Nemula egpigtuuwen sa medoo tegeIslaél.”
12 Huenan di, ini sa kagi i Nemula, sa Metiengaw Nemula egpigtuuwen sa medoo tegeIslaél, guwaen di, “Mig-eked yu sa inikagi ku owoy egsalig yu daa diyà sa kebagel yu owoy diyà sa medoo egbaelan yu medaet. 13 Huenan di, duen sa salà yu lagà sa elà kutà medapag dé megubal, owoy eglekang amuk buyu dé egkelubun, hê petow dé megubal. 14 Amuk megubal, lagà melupetan sa kuden tanà sa mebaelan di. Endà dé duen sa mekalung apiya éhê kedakel sa taguan baga daa ataw ka éhê kedakel sa igsakug wayeg daa diyà paligì.”
15 Enù ka ini sa kagi i Datù Nemula, sa Metiengaw Nemula sa egpigtuuwen sa medoo tegeIslaél, guwaen di, “Amuk pelikù yu diyà kenak owoy amuk metanà sa pedu yu egsalig diyà kenak, mealukan yu doo owoy pebagelen ku doo kiyu.” Dodoo endà polo egkeiyap yu, 16 owoy mig-ikagi yu, guwaen yu, “Melaguy ké enù ka metéél sa kudà kudaan ké.” Tuu doo, melaguy yu dodoo uman pa metéél sa lumohot keniyu. 17 Apiya sebaen daa sundalu kuntelà yu lumimedang keniyu, melaguy sa sengibu geetaw, owoy apiya lima daa sundalu lumimedang keniyu, meimet yu dé melaguy. Hê, kiyu daen sa mesamà, lagà sa bugsud bandila diyà sa pulu tuduk. 18 Huenan di, eg-angat-angat Datù Nemula i anì hiduwan di kiyu owoy egkeanggan ma eghidu keniyu, enù ka kagdi sa Nemula takà egbael sa metudà adat. Huenan di, meanggan sa langun etaw egsalig diyà kenagdi.