11
Ini Denu Sa Melanih Keugpà
1 Na, lagà sa kayu kinasing sa kedatuan sa tugod i Dabid, dodoo sumulow doo sa tued di, enù ka tumebow sa magtu datù kedu diyà sa tugod di. 2 Lumuhub sa Suguy i Datù Nemula diyà kenagdi, owoy ibegay di diyà kenagdi sa keketiig owoy sa kekesabut, owoy sa egkegaga di eg-uwit sa medoo etaw di. Metiigan di sa uyot i Datù Nemula owoy tigtu adatan di. 3 Tigtu meanggan mangunut diyà si Datù Nemula. Tigtu nesugat sa keantang di, enù ka endà peunutan di duu sa hinaa di ataw ka sa dinineg di daa. 4 Dodoo begayan di polo ketuu sa medoo etaw endà duen negaga, owoy tampilan di sa ketuu sa medoo etaw egpeumàumaan. Danà sa kagi di, mepigtamayan sa medoo etaw owoy meimatayan ma doo sa langun etaw tegebael medaet. 5 Ipehaa di sa ketuu owoy sa metudà adat diyà sa kedatuan di.a
6 Amuk meuma iya wé gai, kumelanih sa keugpà ta. Meseamut umugpà sa tinggalung owoy sa nati kebilibili, owoy mesehulid da sa nati kambing owoy sa liyopaldo. Mesetépéd da tumabtab sa liyun owoy sa nati sapì,b owoy tukééy batà daa sa umipat kenagda. 7 Meseunut da tumabtab sa sapì owoy sa uled tanà oso, owoy mesehulid sa medoo anak da. Tumabtab legami sa liyun nekeiling sa sapì. 8 Mebaluy sumelapan sa batà tapay doo pelà egsusu diyà sa dapag bitun uled. Endà medaetan sa batà apiya di pa selapanen di sa uled mekehilu amuk memued. 9 Endà dé mesekudì da owoy endà ma dé meseimatay da diyà sa mapulù getan i Datù Nemula,c enù ka sumeluh diyà siini uwang tanà sa keketiig i Datù Nemula, lagà sa wayeg dagat mekebensek.