30
Ini Sa Medoo Milantek Kagi I Agul
1 Na, ini sa medoo miulan kagi i Agul anak i Haki. Mig-ikagi, guwaen di, “Mediyù Nemula i diyà kenak, huenan di endà duen sa mepion egkebaelan ku.a 2 Diyà sa langun etaw, aken sa tigtu endà duen netiigan, owoy endà ma duen sa kekesabut ku. 3 Endà duen sa keketiig ku, owoy endà ma duen sa netiigan ku denu si Nemula.
4 “Endà duen sa mebatun diyà langit owoy sa petuntun, liyu daa si Nemula. Ngadan di etaw sa mekegaga kumemkem sa kelamag? Ngadan di etaw mekegaga mesung sa dagat diyà sa ginis di? Ngadan di etaw sa migbael sa ketamanan siini uwang tanà? Ngadan di ya, owoy ngadan sa anak di? Tulon ko diyà kenak amuk netiigan ko.
5 “Anan meketuu sa langun kagi i Nemula. Kagdi lagà sa kelasag igdungdung sa langun etaw egsalig diyà kenagdi. 6 Amuk egdugangan ko sa kagi di, indawen di kuna, owoy mehaa polo sa niko kebutbut.
7 “O Datù Nemula, duwa sa pegeniyen ku diyà keniko diyà sa egoh ku endà pelà mematay. 8 Muna, tabangi ko aken anì endà mekebutbut a. Sa keduwa di, yaka egpekawasà kenak owoy yaka ma egpepubeli kenak. Begayi ko daa aken sa mekeenget diyà sa hagtay ku. 9 Enù ka amuk temù a kumawasà, petow ki daa iniyugan ku kuna owoy endà dé sumalig a diyà keniko. Dodoo amuk temù a ma mepubeli, petow ki daa mekepenakaw a owoy mesumbung ku sa mapulù ngadan ko, o Nemula.”
10 Yaka egsumbung duu sa egsugùsuguen sa datù diyà sa datù di, enù ka amuk baelan ko iya wé, tubaden di kuna owoy pesalaen di ma kuna danà sa binaelan ko.
11 Duen sa etaw eg-amuwen da sa emà da owoy medaet ma sa ikagiyen da diyà sa inay da.
12 Duen ma etaw guwaen da dò anan metiengaw sa egbaelan da, dodoo tétê da polo danà sa salà da.
13 Duen ma etaw tigtu egpeolòolò, guwaen da dò endà duen meketepeng diyà sa mepion binaelan da.
14 Duen ma etaw lagà eg-amahen da sa etaw pubeli owoy sa endà duen negaga, enù ka tigtu egpelihayen da kagda.