Isalem 119

Denu Sa Uledin I Nemula

¹ Meanggan sa etaw épê metiengaw adat owoy sa egpangunut diyà sa uledin i Datù Nemula. ² Meanggan sa etaw egpigtuu diyà sa igsugù di owoy sa legkang pedu di egpangunut diyà kenagdi. ³ Endà egbael da medaet, dodoo eg-ukit da polo diyà sa dalan igtulù i Nemula. ⁴ O Datù Nemula, igbegay ko diyà kenami sa medoo uledin ko owoy igsugù ko diyà kenami sa tigtu tuu kepangunut. ⁵ Mepion hedem amuk takà a mekepangunut diyà sa medoo igsugù ko. ⁶ Amuk hediya, endà memalaan a amuk penemdemen ku sa langun igsugù ko. ⁷ Oloen ku kuna danà sa pedu ku migketiengaw enù ka eg-inauwan ku sa metudà uledin ko. ⁸ Pangunutan ku sa medoo igsugù ko, huenan di yaka egpandayà kenak.

Sa Kepangunut Diyà Sa Igsugù I Nemula

⁹ Ngadan baelan sa batàbatà anì kumetiengaw sa adat di? Ini sa baelan di, pangunutan di sa kagi ko. ¹⁰ Legkang diyà sa pedu ku sa kepangunut ku diyà keniko. Huenan di, yaka egpandayà kenak anì endà metipay ku duu sa medoo igsugù ko. ¹¹ Igtagù ku sa kagi ko diyà sa pedu ku anì endà mekesalà a diyà keniko. ¹² Eg-oloen ku kuna, o Datù Nemula. Tului ko diyà kenak sa langun uledin ko. ¹³ Sepelikùlikuan ku tumulon sa medoo uledin igbegay ko. ¹⁴ Egkeanggan a egpangunut diyà sa medoo igsugù ko enù ka uman a pa nekekuwa’t sa mapulù langun taman. ¹⁵ Eg-inauwan ku sa medoo igsugù ko, owoy egpenemdemen ku sa medoo igtulù ko. ¹⁶ Egkeanggan a egpangunut diyà sa medoo uledin ko, owoy endà melipengan ku duu sa kagi ko.

Meanggan Sa Etaw Egpangunut Diyà Sa Uledin I Nemula

¹⁷ O Nemula, baeli ko sa mepion diyà kenak, aken i egsuguen ko, anì melalù a owoy mepangunutan ku ma sa kagi ko. ¹⁸ Pegimata ko aken anì hauwen ku sa tigtu mepion igtulù diyà sa uledin ko. ¹⁹ Beken siini tanà sa tigtu eg-ugpaan ku, huenan di yaka eglidung duu diyà kenak sa medoo igsugù ko. ²⁰ Iya sa tigtu ungayà ku metiigan ku sa medoo uledin ko agdaw owoy sigep. ²¹ Eg-indawen ko sa medoo tegepeolòolò owoy pigtamayan ko, enù ka endà egpangunut da diyà sa medoo igsugù ko. ²² Yaka egpandayà duu sa kepelonon da kenak owoy sa kepeumàumà da kenak danà ku egpangunut diyà sa uledin ko. ²³ Apiya di pa egsumbungen sa medoo ulu-ulu aken i egsuguen ko, penemdemen ku doo sa medoo igtulù ko. ²⁴ Egkeanggan a danà sa medoo igtulù ko, enù ka iya sa kenà ku neketiig sa mepion egbaelan.

Keudes Egpangunut Diyà Sa Uledin I Nemula

²⁵ Endà egpekegaga a enù ka buyu a dé egkematay, huenan di tabangi ko aken anì mehagtay a danà sa kagi ko. ²⁶ Egoh ku migtulon diyà keniko sa medoo egkebaelan ku, sinagbian ko sa kesimbà ku. Na, tului ko diyà kenak sa medoo uledin ko. ²⁷ Petiigi ko diyà kenak sa selepangan sa medoo uledin ko, agulé penemdemen ku sa medoo mekegaip binaelan ko. ²⁸ Migkelungoy a dé danà sa bukul ku, huenan di pebagel ko aken danà sa kagi ko. ²⁹ Tabangi ko aken anì endà mekeakal a, owoy tului ko sa uledin ko diyà kenak danà sa mepion pedu ko. ³⁰ Hinemilì ku sa kepangunut ku diyà sa medoo igsugù ko, owoy pinedakelan pedu ku sa medoo uledin ko. ³¹ O Datù Nemula, egpangunutan ku sa medoo igsasà ko. Huenan di, peiwodi ko diyà kenak sa kenà ku memalaan. ³² Egkeiyap a egpangunut diyà sa medoo igsugù ko, huenan di tabangi ko aken anì meumanan sa keketiig ku.

Sa Kesimbà Anì Metiigan Sa Uledin

³³ O Datù Nemula, tului ko diyà kenak sa medoo uledin ko anì mepangunutan ku taman sa egoh ku nehagtay. ³⁴ Petiigi ko diyà kenak sa medoo uledin ko anì mepangunutan ku. Ipasad ku legkang diyà sa pedu ku sa kepangunut ku diyà sa uledin ko. ³⁵ Tului ko diyà kenak sa ukit kepangunut ku diyà sa medoo uledin ko, enù ka iya sa egkeangganan ku. ³⁶ Begayi ko diyà kenak sa ungayà ku mangunut diyà sa uledin ko, beken kekawasà daa sa ungayaen ku. ³⁷ Pegauni ko aken diyà sa medoo endà miulan egbaelan. Pelalù ko aken danà sa kagi ko. ³⁸ Aken sa egsuguen ko, huenan di petuuwi ko diyà kenak sa igpasad ko diyà sa medoo etaw épê kekelimedang diyà keniko. ³⁹ Kedani ko diyà kenak sa medoo mekemala egbaelan, enù ka tigtu mepion sa medoo uledin ko. ⁴⁰ Dakel sa ungayà ku mangunut diyà sa medoo igsugù ko. Pelalù ko aken danà sa adat ko metudà.

Denu Sa Kesalig Sa Etaw Diyà Sa Uledin I Nemula

⁴¹ O Datù Nemula, pehauwi ko sa dakel kehidu ko diyà kenak owoy aluki ko aken enù ka iya sa igpasad ko. ⁴² Amuk hediya, mekesagbì a diyà sa medoo egpeumàumà kenak, enù ka egsalig a diyà sa kagi ko. ⁴³ Begayi ko diyà kenak sa egkegaga ku egtulon sa kagi ko anan tuu, enù ka egsaligan ku sa medoo uledin ko. ⁴⁴ Pangunutan ku takà sa medoo uledin ko taman melugay. ⁴⁵ Kumepion sa hagtay ku enù ka endà meudipen a danà ku egpangunut diyà sa medoo igsugù ko. ⁴⁶ Endà memalaan a tumulon sa medoo igsugù ko diyà sa medoo datù, ⁴⁷ enù ka egkeanggan a egpangunut diyà sa medoo igsugù ko enù ka egkedakelan pedu ku sa uledin ko. ⁴⁸ Eg-adatan ku sa medoo uledin ko owoy egkedakelan pedu ku ma, owoy egpenemdemen ku sa medoo igsugù ko.

Saligi Ko Sa Uledin I Nemula

⁴⁹ Yaka egkelipeng duu sa igpasad ko diyà kenak, aken i egsuguen ko, enù ka iya sa egpaginawaen ku. ⁵⁰ Apiya di pa egkelikutan a, egkeanggan a doo enù ka duen sa lalù igpasad ko diyà kenak. ⁵¹ Apiya di pa tigtu a egpeumàumaan sa medoo tegepeolòolò, endà doo eg-ekedan ku duu sa uledin ko. ⁵² O Datù Nemula, egketulengan ku doo sa medoo tapay uledin ko, enù ka iya sa egbegay kekeanggan diyà kenak. ⁵³ Tigtu a egbulit amuk eghauwen ku sa medoo tegebael medaet endà egpangunut diyà sa uledin ko. ⁵⁴ Sumalà dé sa kenà ku eg-ugpà diyà siini tanà, takà a doo egduyuy danà sa medoo igsugù ko. ⁵⁵ Apiya sigep, egpenemdemen ku doo kuna, o Datù Nemula, huenan di egkepangunutan ku sa uledin ko. ⁵⁶ Iya sa naken keangganan sa kepangunut ku diyà sa medoo igsugù ko.

Kedakelan Pedu Di Sa Uledin I Nemula

⁵⁷ O Datù Nemula, kuna daa sa diyà pedu ku. Huenan di, ipasad ku sa kepangunut ku diyà sa medoo uledin ko. ⁵⁸ Legkang diyà sa pedu ku sa kepegeni ku diyà keniko, hiduwi ko aken enù ka iya sa igpasad ko. ⁵⁹ Egoh ku egpenemdem denu sa adat ku, netuing sa pedu ku anì mangunut a diyà sa medoo uledin ko. ⁶⁰ Migpetéél a anì endà meéngén sa kepangunut ku diyà sa medoo igsugù ko. ⁶¹ Apiya di pa legenen a sa medoo tegebael medaet, endà doo lipengen ku duu sa uledin ko. ⁶² Amuk teliwadà sigep, umenaw a anì pesalamat a diyà keniko danà sa uledin ko metudà. ⁶³ Aken sa loyuken sa langun etaw épê kekelimedang diyà keniko owoy sa egpangunut diyà sa uledin ko. ⁶⁴ O Datù Nemula, nekeseluh diyà siini uwang tanà sa dakel kehidu ko, huenan di tului ko diyà kenak sa medoo igsugù ko.

Sa Kiulan Sa Uledin I Nemula

⁶⁵ O Datù Nemula, medoo sa mepion egbaelan ko diyà kenak, aken i egsuguen ko, enù ka neketuu sa igpasad ko. ⁶⁶ Begayi ko diyà kenak sa milantek penemdem owoy sa keketiig, enù ka egsalig a diyà sa medoo igsugù ko. ⁶⁷ Egoh ko endà pelà mig-indaw kenak, lagà a netelas. Dodoo ini egoh di egpangunutan ku dé sa kagi ko. ⁶⁸ Anan mepion sa langun egbaelan ko owoy mipedu ka ma, huenan di tului ko diyà kenak sa medoo igsugù ko. ⁶⁹ Apiya di pa egtipuwen a sa medoo etaw tegepedakeldakel, mebagel doo sa pedu ku egpangunut diyà sa medoo igsugù ko. ⁷⁰ Endà egpeketiig siini medoo etaw tegepedakeldakel, dodoo aken egkeanggan a polo danà sa uledin ko. ⁷¹ Mepion sa kineindaw ko kenak, enù ka danà iya wé, netiigan ku sa medoo igsugù ko. ⁷² Uman pa miulan diyà kenak sa uledin ko diyà sa kiulan sa medoo bulawan owoy pilak.

Sa Ketuu Sa Uledin I Nemula

⁷³ O Nemula sa migbael kenak owoy sa egtulik kenak, begayi ko aken sa keketiig anì mekepangunut a diyà sa medoo uledin ko. ⁷⁴ Egkeanggan sa medoo etaw épê kekelimedang diyà keniko amuk eghauwen da aken, enù ka egsalig a diyà sa kagi ko. ⁷⁵ O Datù Nemula, netiigan ku metudà sa keantang ko enù ka nekeenget sa keindaw ko kenak. ⁷⁶ Begayi ko aken sa kekeanggan danà sa kehidu ko endà egkehalì, enù ka iya sa igpasad ko diyà kenak, aken i egsuguen ko. ⁷⁷ Pehauwi ko diyà kenak sa dakel kehidu ko anì kumelalù a, enù ka egkeanggan a danà sa uledin ko. ⁷⁸ Mepion hedem amuk memalaan sa medoo tegepeolòolò danà sa ketipu da kenak. Dodoo aken, penemdemen ku polo sa medoo uledin ko. ⁷⁹ Pandayà ko amuk mangay diyà kenak sa medoo etaw épê kekelimedang diyà keniko owoy sa medoo neketiig sa igsugù ko. ⁸⁰ Ungayà ku endà sumekê a mangunut diyà sa medoo igsugù ko anì endà memalaan a.

Kesimbà Denu Sa Kealuk

⁸¹ O Datù Nemula, egkepuleg a dé eg-angat-angat sa kealuk ko, dodoo tapay a doo egsalig diyà sa kagi ko. ⁸² Egpetumàmaen ku eg-angat-angat sa kepetuu ko sa pasad ko. Eg-igsà a, “Nengan pa sa egoh ko tumabang kenak?” ⁸³ Apiya di pa endà duen ulan ku i, enù ka lagà a daa sa tapay kunul hinagtay inawuhan wain, endà doo eglipengen ku duu sa medoo igsugù ko. ⁸⁴ Ngadan taman di ya meelut sa keangat-angat ku? Nengan pa sa kepigtamay ko sa medoo etaw egpelihay kenak? ⁸⁵ Sa medoo tegepeolòolò endà egpangunut diyà sa uledin ko, lagà da egbael kaseb kenà ku menabù. ⁸⁶ Anan kesaligan sa langun igsugù ko. Aluki ko aken kedu diyà sa medoo etaw egtipu kenak. ⁸⁷ Buyu dé eg-imatayan da aken, gasama iya tapay doo meeles sa kepangunut ku diyà sa medoo uledin ko. ⁸⁸ Pelalù ko aken danà sa dakel kehidu ko anì mekeuman a pa mangunut diyà sa medoo uledin ko.

Sa Kesalig Diyà Sa Uledin I Nemula

⁸⁹ O Datù Nemula, endà mekedan sa kagi ko diyà langit taman melugay owoy endà ma mehalì di. ⁹⁰ Endà ma mekedan sa egoh ko egkesaligan taman melugay, owoy endà ma mehalì siini uwang tanà pineduen ko. ⁹¹ Tapay doo duen sa medoo uledin ko taman ini egoh di, enù ka lagà egsugùsuguen ko sa langun taman eghauwen. ⁹² Amuk beken daa uledin ko sa keduwan sa kekeanggan ku, mematay a doo danà sa medoo kelikutan ku. ⁹³ Endà lipengen ku duu sa medoo igsugù ko, enù ka egbegayan ko aken lalù danà sa uledin ko. ⁹⁴ Aken sa etaw ko, huenan di aluki ko aken, enù ka iya sa ungayà ku mepangunutan ku sa medoo uledin ko. ⁹⁵ Apiya di pa egpelaeban a sa medoo etaw tegebael medaet, penemdemen ku doo sa medoo uledin ko. ⁹⁶ Netiigan ku endà negulub sa medoo eghauwen diyà tanà, dodoo endà duen ketamanan sa igsugù ko.

Pinedakel Di Diyà Sa Pedu Di Sa Uledin I Nemula

⁹⁷ Na, tigtu egkedakelan pedu ku sa uledin ko, huenan di egpenemdemen ku elut agdaw. ⁹⁸ Miglowon sa kilantek ku diyà sa kilantek sa medoo kuntelà ku, enù ka endà egkelengà sa uledin ko diyà sa pedu ku. ⁹⁹ Miglowon pa sa naken keketiig diyà sa keketiig sa langun migtulù kenak, enù ka egpenemdemen ku sa medoo igtulù ko. ¹⁰⁰ Uman pa milantek sa naken netiigan diyà sa netiigan sa medoo lukes, enù ka takà a egpangunut diyà sa medoo igsugù ko. ¹⁰¹ Iniwod ku sa langun medaet egbaelan anì mepangunutan ku sa kagi ko. ¹⁰² Endà ininiyugan ku duu sa medoo uledin ko, enù ka kuna sa migtulù kenak. ¹⁰³ Tigtu mepion diyà kenak sa medoo kagi ko, enù ka uman pa meemis diyà sa keemis sa teneb. ¹⁰⁴ Egkeumanan sa ketiigan ku danà sa medoo uledin ko, huenan di egkelepuhan ku sa medoo medaet egbaelan.

Denu Sa Legdaw Kedu Diyà Sa Uledin I Nemula

¹⁰⁵ Sa kagi ko, iya sa sulù diyà sa ukitan ku owoy sa legdaw diyà sa dalan ku. ¹⁰⁶ Ipetuu ku sa igpasad ku mangunut diyà sa medoo metudà uledin ko. ¹⁰⁷ O Datù Nemula, tigtu dakel sa kelikutan ku, huenan di pelalù ko aken enù ka iya sa igpasad ko. ¹⁰⁸ O Datù Nemula, dineg ko sa kesimbà ku egpesalamat, owoy tului ko diyà kenak sa medoo uledin ko. ¹⁰⁹ Apiya di pa takà a buyu egkematay, endà doo lipengen ku duu sa uledin ko. ¹¹⁰ Sa medoo etaw tegebael medaet, egbaelan da sa lagà litag kenà ku megapen, dodoo endà egtipayen ku duu sa medoo igsugù ko. ¹¹¹ Piulanen ku sa medoo igsugù ko taman melugay, enù ka tigtu egkeangganan ku sa uledin ko. ¹¹² Huenan di, ungayà ku mepangunutan ku sa medoo uledin ko taman melugay.

Mealukan Sa Etaw Danà Sa Uledin I Nemula

¹¹³ Egkelepuhan ku sa medoo etaw duwa-duwa egpangunut diyà keniko. Dodoo aken, egkedakelan pedu ku sa uledin ko. ¹¹⁴ Kuna sa tegesegumalang kenak owoy sa lagà kelasag ku, owoy iya daa sa egsaligan ku sa kagi ko. ¹¹⁵ Na, kiyu i medoo tegebael salà, pediyù yu diyà kenak anì mepangunutan ku sa medoo igsugù i Nemula, sa Nemula egpigtuuwen ku. ¹¹⁶ O Datù Nemula, pebagel ko aken anì kumelalù a, enù ka iya sa igpasad ko. Yaka egpandayà kenak diyà sa kenà ku memalaan danà ku egsalig diyà keniko. ¹¹⁷ Ipat ko aken anì endà duen sa medaet mebaelan diyà kenak. Amuk hediya, mepangunutan ku takà sa medoo igsugù ko. ¹¹⁸ Dodoo ininiyugan ko polo sa langun etaw egsekê diyà sa medoo uledin ko, enù ka neakalan da daa diyà sa hagda munoy penemdem. ¹¹⁹ Diyà sa kehaa ko, lagà lupuk daa sa langun etaw tegebael medaet. Huenan di, egkedakelan pedu ku sa medoo igsugù ko. ¹²⁰ Eglukub a danà ku egkelimedangan keniko enù ka egpesu a sa kekukum ko.

Denu Kepangunut Diyà Sa Uledin I Nemula

¹²¹ Binaelan ku sa metudà owoy sa nesugat diyà sa kehaa ko, huenan di yaka egpandayà kenak diyà sa medoo kuntelà ku. ¹²² Petuuwi ko sa ketabang ko kenak, aken i egsuguen ko. Yaka egpandayà kenak amuk peumàumaan a sa medoo tegepeolòolò. ¹²³ Egpetumàmaen ku eg-angat-angat sa kepetuu ko sa igpasad ko umaluk kenak. ¹²⁴ Sagipà ko aken i egsuguen ko danà sa dakel kehidu ko, owoy tului ko diyà kenak sa medoo igsugù ko. ¹²⁵ Aken sa egsuguen ko, huenan di begayi ko aken sa milantek penemdem anì metiigan ku sa medoo igsugù ko. ¹²⁶ O Datù Nemula, ini dé sa gai ko petuu sa ungayà ko, enù ka tinipay sa medoo etaw sa uledin ko. ¹²⁷ Tigtu egkedakelan pedu ku sa medoo igsugù ko, enù ka uman pa sa kepedakel ku sa igsugù ko diyà sa kepedakel ku sa tigtu bulawan. ¹²⁸ Huenan di, egpangunutan ku sa langun igsugù ko, dodoo egkelepuhan ku sa langun medaet egbaelan.

Ungayà Di Mangunut Diyà Sa Uledin I Nemula

¹²⁹ Mekegaip sa medoo igtulù ko, huenan di tigtu a egkeiyap egpangunut. ¹³⁰ Egkeilag pedu sa etaw danà da neketiig selepangan sa kagi ko, labi pa sa etaw endà duen netiigan. ¹³¹ Tigtu dakel sa ungayà ku meketiig sa medoo igsugù ko. ¹³² Hahaa ko aken owoy hiduwi ko ma aken, éhê sa egbaelan ko diyà sa medoo etaw egpedakel pedu diyà keniko. ¹³³ Sa kagi ko sa menulù kenak diyà sa ukitan ku anì endà metabanan a sa medaet. ¹³⁴ Aluki ko aken diyà sa medoo etaw egpelihay kenak anì mepangunutan ku sa medoo igsugù ko. ¹³⁵ Pehauwi ko sa kehidu ko diyà kenak, owoy tului ko diyà kenak sa medoo uledin ko. ¹³⁶ Tigtu a egsinegaw enù ka endà egpangunutan sa medoo etaw duu sa uledin ko.

Metudà Sa Uledin I Nemula

¹³⁷ O Datù Nemula, metudà sa adat ko owoy nesugat sa keantang ko. ¹³⁸ Anan tuu sa medoo igsugù ko owoy kesaligan ma. ¹³⁹ Tigtu a nepenù bulitan, enù ka egpeulanen sa medoo kuntelà ku sa medoo uledin ko. ¹⁴⁰ Kesaligan sa medoo igpasad ko, huenan di tigtu egpedakelen ku diyà sa pedu ku, aken i egsuguen ko. ¹⁴¹ Apiya di pa lagdà etaw a daa owoy egpelononon a ma, endà doo egkelipengan ku duu sa medoo igsugù ko. ¹⁴² Metudà sa adat ko taman melugay owoy anan tuu sa medoo uledin ko. ¹⁴³ Apiya di pa tigtu a egkebogo owoy medoo sa kelikutan ku, egkeanggan a doo danà sa medoo uledin ko. ¹⁴⁴ Metudà sa medoo igsugù ko taman melugay. Huenan di, petiigi ko diyà kenak anì kumelalù a.

Sa Kesimbà Anì Mealukan I Nemula

¹⁴⁵ O Datù Nemula, legkang diyà sa pedu ku sa keumow ku keniko, huenan di sagbii ko aken, hih. Pangunutan ku sa medoo igsugù ko. ¹⁴⁶ Eg-umow a diyà keniko, aluki ko aken anì mepangunutan ku sa medoo uledin ko. ¹⁴⁷ Lapus a eg-enaw egoh sa agdaw endà pa egteleséng, owoy egpegeni a sa ketabang ko enù ka egsalig a diyà sa kagi ko. ¹⁴⁸ Endà egtudug a amuk sigep enù ka egpenemdemen ku sa medoo igpasad ko. ¹⁴⁹ O Datù Nemula, dineg ko sa kepegeni ku danà sa kehidu ko. Sumpati ko sa lalù ku enù ka metudà sa ukit ko. ¹⁵⁰ Egdapagen a sa medoo medaet etaw tegepelihay, dodoo mediyù da diyà sa uledin ko. ¹⁵¹ Dodoo medapag ka diyà kenak, o Datù Nemula, owoy anan tuu sa medoo uledin ko. ¹⁵² Edung egoh anay netiigan ku endà mekedan sa medoo uledin ko taman melugay.

Sa Kesimbà Anì Tabangan I Nemula

¹⁵³ Hahaa ko sa lihay ku owoy aluki ko aken, enù ka endà egkelipengan ku duu sa medoo uledin ko. ¹⁵⁴ Tampili ko sa ketuu egtigdegan ku owoy aluki ko aken anì melalù a, enù ka iya sa igpasad ko. ¹⁵⁵ Endà dé mealukan sa medoo tegebael medaet, enù ka endà egpangunut da diyà sa medoo uledin ko. ¹⁵⁶ Dodoo dakel sa kehidu ko, o Datù Nemula, huenan di begayi ko aken lalù enù ka metudà sa ukit ko. ¹⁵⁷ Apiya di pa medoo sa kuntelà ku egpelihay kenak, endà doo sumekê a diyà sa medoo uledin ko. ¹⁵⁸ Egkelepuhan ku sa medoo etaw lampawì, enù ka endà egpangunut da diyà sa medoo igsugù ko. ¹⁵⁹ O Datù Nemula, netiigan ko sa egoh di egkedakelan pedu ku sa igtulù ko. Huenan di, begayi ko aken lalù danà sa dakel kehidu ko. ¹⁶⁰ Anan tuu sa langun kagi ko, owoy endà ma mekedan sa medoo metudà uledin ko taman melugay.

Sa Kepangunut Diyà Sa Uledin I Nemula

¹⁶¹ Apiya di pa endà duen sa pesuwan ku, egpeumàumaan a doo sa medoo ulu-ulu. Dodoo legkang diyà sa pedu ku sa keadat ku sa kagi ko. ¹⁶² Egkeangganan ku sa kagi ko, lagà sa kekeanggan sa etaw nekehaa sa mapulù langun taman. ¹⁶³ Egkelepuhan ku sa medoo butbuten, dodoo egkedakelan pedu ku sa uledin ko. ¹⁶⁴ Uman agdaw mesagkat sa kepesalamat ku diyà keniko danà sa uledin ko metudà. ¹⁶⁵ Tigtu melanih sa keugpà sa etaw amuk egkedakelan pedu da sa uledin ko, owoy endà duen sa mekepedaet kenagda. ¹⁶⁶ O Datù Nemula, eg-angat-angatan ku sa kealuk ko kenak, huenan di egpangunutan ku sa medoo uledin ko. ¹⁶⁷ Tigtu egkedakelan pedu ku sa medoo igsugù ko, owoy egpangunutan ku ma. ¹⁶⁸ Tuu ma doo, egpangunutan ku sa medoo uledin ko owoy sa medoo igsugù ko, enù ka netiigan ko sa langun egbaelan ku.

Sa Kesimbà Egpegeni Ketabang

¹⁶⁹ O Datù Nemula, dineg ko sa keumow ku diyà keniko. Begayi ko aken sa milantek penemdem danà sa kagi ko. ¹⁷⁰ Dinegdineg ko sa kesimbà ku, owoy aluki ko ma aken enù ka iya sa igpasad ko. ¹⁷¹ Takaan ku kuna eg-olò enù ka igtulù ko diyà kenak sa medoo uledin ko. ¹⁷² Owoy duyuyen ku sa kagi ko, enù ka anan metudà sa langun igsugù ko. ¹⁷³ Tapay ko dé sa itabang ko kenak, enù ka nehemilì ku dé sa kepangunut ku diyà sa medoo igsugù ko. ¹⁷⁴ O Datù Nemula, eg-angat-angatan ku sa kealuk ko kenak, owoy egkeangganan ku sa uledin ko. ¹⁷⁵ Pelalù ko aken anì mekeolò a keniko owoy anì metabangan a ma danà sa uledin ko. ¹⁷⁶ Aken sa egsuguen ko, dodoo nekesekê a lagà sa kebilibili netelas, huenan di pengaa ko aken, enù ka endà egkelipengan ku duu sa medoo uledin ko.