8
Ini Denu Sa Dakel Egkegaga I Nemula
1 O Datù Nemula, sa Nemula ké, tigtu mapulù sa ngadan ko diyà siini sinukub langit. Owoy nekeuma diyà dibaluy langit sa keolò da sa dakel egkegaga ko. 2 Apiya sa medoo batà taman sa medoo egsusu pelawà, tinulù ko kagda anì oloen da ma sa dakel egkegaga ko. Huenan di, melugpì sa medoo kuntelà ko. Endà dé duen sa egkegaga da kumuntelà diyà keniko.
3 Amuk eglengag a diyà langit, eghauwen ku sa langun binaelan ko danà sa dakel egkegaga ko, sa bulan owoy sa medoo bituen igtagù ko diyà sa kenà da. 4 Huenan di, egpekeigsà a diyà sa munoy pedu ku ngadan sa pesuwan ko egpeketuleng kenami i etaw, owoy maen di ya eg-ipaten ko, enù ka etaw ké daa. 5 Dodoo pinedakel ko doo sa etaw enù ka buyu ké doo egpeketepeng diyà sa medoo egsugùsuguen ko diyà langit, owoy binegayan ko ma kami egkegaga owoy tigdeg lagà sa datù. 6 Pineduen ko sa milantek penemdem ké eg-ipat sa langun binaelan ko, enù ka kami sa pineulu-ulu ko diyà sa langun pineduen ko, 7 sa medoo kebilibili owoy sa medoo sapì owoy sa langun uled tanà diyà ketalunan, 8 owoy sa medoo manuk eglayanglayang diyà awang, owoy sedà owoy sa langun eg-ipanaw diyà dagat.
9 O Datù Nemula, sa Nemula ké, tigtu mapulù sa ngadan ko diyà siini sinukub langit.