38
Ini Sa Sagbì I Nemula Diyà Si Hob
1 Agulé mig-ikagi Nemula i diyà si Hob egpeunut diyà sa sepuk, guwaen di, 2 “Maen di ya egkeduwa-duwa sa kesalig ko diyà sa naken keketiig? Nehaa sa egoh di endà duen sa netiigan ko. 3 Tigdeg ka dé owoy pebagelbagel ka anì mesagbian ko sa medoo igsà ku diyà keniko.
4 “Kenà ko ya egoh ku migbael siini tanà? Tulon ko diyà kenak, amuk medoo sa netiigan ko. 5 Ngadan sa migsugù egoh sa tanà binaelan? Owoy ngadan ma sa migtembu? Netiigan ko pa langun ini i, atu? 6 Ngadan sa kenà di pinetigdeg sa egtugek siini tanà? Owoy ngadan di etaw sa migtenà sa kenà di pinetigdeg sa bugsud di 7 ligò di egkeanggan egduyuy sa medoo bituen, owoy egpetibos ma sa medoo egsugùsuguen ku diyà langit danà da egkeanggan?
8 “Egoh sa dagat migsiyù kedu diyà sa kedaleman, ngadan di etaw sa migbelel sa lambeg di? 9 Deleman owoy gaeb sa lagà igtedung ku sa dagat. 10 Binaelan ku sa mantadan anì mealang sa dagat, owoy pinakelan ku sa medoo bengawan di. 11 Inikagiyan ku sa dagat, guwaen ku, “Taman ka daa dahini owoy petaman ko ma daa dahiya sa medoo dakel lambeg ko.”
12 “O Hob, negaga ko pa egpeteleséng sa agdaw? 13 Enù di ya, negaga ko pa pelegdawan siini uwang tanà anì endà dé mekelidung sa medoo tegebael medaet? 14 Danà sa teleséng agdaw, nelegdawan sa langun eghauwen, lagà sa kehaa sa metolol ginis. 15 Danà legdaw sa agdaw, huenan di egkealang sa medoo tegebael medaet enù ka iya sa lagà egpekehawid kenagda egbael medaet.
16 “Enù di ya, nekeangay ka pa diyà sa keduwan sa medoo tebulan wayeg? Owoy nekeipanaw ka pa diyà sa pused dagat? 17 Netiigan ko pa sa kenà pintuan mangay diyà bayà? 18 Enù di ya, netiigan ko pa sa kelabel sa uwang tanà? Tulon ko diyà kenak amuk netiigan ko.
19 “Netiigan ko pa sa kenà di eg-edung sa legdaw owoy deleman? 20 Megaga ko pa kagda ikagiyan sa tamanan da, ataw ka pepelikuen ko kagda diyà sa kenà da eg-edung? 21 Na, danà di lukes ka dé, petow ki daa netiigan ko, enù ka egoh sa tanà binaelan tapay ka dé kéen neetaw.
22 Enù di ya, hinaa ko pa sa bilik kenà ku egtagù sa udan tigtu megenaw ataw ka sa bunga't udan? 23 Tinapay ku iya wé atang amuk meuma sa agdaw kumedaet, sa sasang sa keseginaluway owoy sa sasang kesegilaway. 24 Nekeuma ka pa diyà sa keduwan sa agdaw, ataw ka diyà sa keduwan sa kelamag kedu tebowon agdaw?
25 Ngadan di etaw sa migbael sa ukitan udan owoy sa ukitan silà? 26 Ngadan di etaw sa egpeudan diyà sa melabel tanà mediyù dalesan? 27 Ngadan di etaw sa egpeudan diyà sa netikal tanà anì tumunas sa medoo keluwen? 28 Enù di ya, duen pa emà sa udan ataw ka aglù? 29 Ngadan inay sa bunga't udan megenaw? Ngadan keduwan sa megenaw tanà 30 egoh sa wayeg migketegas lagà sa ketegas batu diyà sa kagpa't wayeg?
31 “Megaga ko pa umalang sa keipanaw sa bituen telu, ataw ka sepalaken ko sa petel?”
39:1 - 41:33 Ini sa egoh i Nemula migsagbì uman diyà si Hob. Si Datù Nemula sa épê tigtu dakel egkegaga diyà sa langun egbaelan diyà siini sinukub langit.