Istél 8

Ini Sa Egoh I Datù Asuliyu Migtabang Sa Medoo Hudiyu

¹ Na, egoh iya ma dé agdaw, igbegay i Datù Asuliyu diyà si Booy Istél sa medoo langun taman i Haman sa egkuntelà diyà sa medoo Hudiyu. Agulé mig-angay ma egtaeng Maldékiyu i diyà sa datù, enù ka eg-ikagi Istél i diyà sa datù denu sa egoh di duma telahadi di Maldékiyu i. ² Hê, linaun sa datù sa tising di sa atung igtandà di amuk egpetuuwen di sa kagi di owoy igbegay di diyà si Maldékiyu, enù ka hinawì di diyà si Haman. Agulé igpeipat i Istél ma diyà si Maldékiyu sa medoo tapay langun taman i Haman.

³ Agulé mig-ikagi dema Istél i diyà sa datù. Miglagkeb diyà sa taengan di owoy egsinegaw enù ka egpehiduhidu anì endà mekelagbas sa tapay medaet penemdem i Haman tugod i Agag denu sa egoh di meimatayan sa medoo Hudiyu. ⁴ Hê, igpetodò sa datù sa pulu sa tuked di bulawan diyà si Istél, huenan di migtigdeg diyà sa taengan di. ⁵ Owoy mig-ikagi, guwaen di, “O Datù, amuk egketuuwan ka diyà kenak owoy amuk nekesugat ini i diyà sa penemdem ko owoy amuk egkeiyapan ko ma, baeli ko sa sebaen ma uledin anì endà meketuu sa igsugù i Haman anak i Hamedata tugod i Agag denu sa egoh di meimatayan sa langun etaw Hudiyu diyà sa nesakupan sa kedatuan ko. ⁶ Enù ka endà meketigkel a amuk dumuen siini dakel sugsug mebaelan diyà sa medoo duma ku, owoy endà ma meketigkel a amuk meimet mematay sa langun duma telahadi ku.”

⁷ Agulé mig-ikagi Datù Asuliyu i diyà si Booy Istél owoy diyà si Maldékiyu sa etaw Hudiyu, guwaen di, “Taa yu, igpebitin ku dé Haman i owoy igbegay ku ma diyà si Istél sa medoo langun taman di danà sa medaet penemdem di diyà sa medoo etaw Hudiyu. ⁸ Dodoo endà dé mepelumanan sa uledin amuk igpeépê dé diyà sa ngadan sa datù owoy amuk netandaan dé sa laned tising di. Dodoo mebaluy ma doo amuk sumulat yu sa ungayà yu denu sa medoo Hudiyu owoy peépéi yu diyà sa ngadan sa datù owoy tandai yu ma sa laned tising di.”

⁹ Hê, inumow i Maldékiyu sa langun atung tegesulat sa datù egoh sa keduwa di pulù owoy telu agdaw diyà sa ketelu di gebulan sa pinengadanan da Siban. Igsulat da sa langun igsugù i Maldékiyu diyà sa medoo etaw Hudiyu owoy diyà sa medoo kaunutan owoy diyà sa medoo ulu-ulu diyà sa melatuh duwa pulù owoy pitu pelubinsiya kedu diyà sa tanà Indiya denu tebowon agdaw taman sa tanà Itiyopiya denu salepan agdaw. Igsulat da sa igsugù di diyà sa ukit kesulat sa uman sebaen pelubinsiya owoy diyà sa munoy kagi sa langun balangan etaw, owoy igsulat da ma diyà sa medoo Hudiyu diyà sa ukit kesulat sa hagda munoy kagi. ¹⁰ Igpeépê i Maldékiyu sa langun sulat diyà sa ngadan i Datù Asuliyu owoy tinandaan di ma sa laned tising sa datù. Agulé igpeuwit di diyà sa medoo atung tegesugkow kagi owoy migkudà da diyà sa medoo metéél kudà sa datù.

¹¹ Na, danà iya wé uledin sa datù, mebaluy mesetipon sa medoo Hudiyu diyà sa uman sebaen menuwa da anì umingat da. Amuk duen sa etaw, sumalà dé sa balangan etaw ataw ka sumalà dé sa keduwan di, amuk egkelukuy egpengayaw diyà sa etaw Hudiyu, mebaluy ma sumulì da owoy imatayan da sa egpengayaw kenagda. Mebaluy imeten da imatayan sa kuntelà da lapeg sa medoo bayi owoy sa anak da, owoy tepelen da ma sa medoo langun taman da. ¹² Iya sa agdaw egoh di meketuu siini uledin diyà sa nesakupan sa kedatuan i Asuliyu sa kesepulù di owoy telu agdaw diyà sa kesepulù di owoy duwa gebulan sa pinengadanan da Adal. ¹³ Siglapinay sa kalatas sinulatan igpeuwit da diyà sa langun pelubinsiya owoy ipetiig da ma diyà sa langun balangan etaw, anì meketapay sa medoo Hudiyu anì sumulì da diyà sa medoo kuntelà da amuk meuma iya wé agdaw. ¹⁴ Na, danà sa igsugù sa datù, huenan di migpetéél eg-ipanaw sa medoo migkudà atung tegesugkow kagi, owoy igpetiig da ma sa uledin diyà sa menuwa Susa sa menuwa sa datù.

¹⁵ Agulé egoh i Maldékiyu miglaun kedu diyà sa kenà sa datù, tapay doo migkegal sa kegal datù dinggung owoy mebulà, owoy duen ma sa sebaen lapin kegal di buhahaw binaelan inay lino, owoy igluhub di ma sa metolol sayap bulawan. Egoh sa medoo etaw tegeSusa mighaa kenagdi, egpetibos da danà da egkeanggan temù. ¹⁶ Owoy tigtu egkeanggan sa medoo etaw Hudiyu owoy egkepion sa pedu da owoy meadatan da ma. ¹⁷ Na, diyà sa langun pelubinsiya owoy diyà sa langun menuwa ma, sumalà dé sa kenà da egbasa sa uledin sa datù, egkeiyap sa medoo Hudiyu owoy migpista da ma danà sa kekeanggan da. Owoy duen ma liyu etaw migpebaluy etaw Hudiyu enù ka egpesu da diyà kenagda.