Istél 2

Ini Sa Egoh I Istél Nebaluy Booy

¹ Na, egoh di neonoh dé sa kebulit i Datù Asuliyu, pinenemdem di Basti i owoy sa binaelan di, owoy nepenemdem di ma sa uledin binaelan di denu si Basti. ² Huenan di, mig-ikagi sa medoo egsugùsuguen di egpekelugsok kenagdi, guwaen da, “O Datù, mepion amuk pepengaa ki sa medoo metolol kenogon diyà siini nesakupan kedatuan ko. ³ Hemilì ka sa medoo kaunutan diyà sa uman sebaen pelubinsiya nesakupan sa kedatuan ko anì uwiten da sa langun kenogon metolol diyà sa dalesan atang kenà sa medoo bayi dahini diyà sa menuwa Susa. Peipati ko kagda diyà si Higay sa sinaligan ko tegeipat sa medoo bayi, owoy sugui ko ma anì begayan di kagda sa medoo gamiten da egpelanihlanih. ⁴ Agulé sa kenogon tigtu meiyapan ko, iya sa sambii ko diyà si Basti sa mebaluy booy dema.” Hê, netuuwan sa datù diyà sa inikagi da diyà kenagdi, huenan di pinangunutan di.

⁵ Na, duen sa etaw Hudiyu eg-ugpà diyà sa menuwa Susa. Iya sa ngadan di si Maldékiyu, owoy sa emà di si Hayél, owoy sa bébê di si Simayi anak i Kis owoy tugod i Bénhamin. ⁶ Egoh i Datù Nabokonosol tegeBabiloniya migsigkem si Datù Hoakim tegeHuda owoy sa medoo etaw di diyà menuwa Hélusalém anì mekeangay da diyà sa tanà Babiloniya, nekelapeg ma nekeunut sa tupù i Maldékiyu. ⁷ Na, duen sa metolol kenogon anak momò di, owoy inipat di lagà sa keipat di sa hagdi munoy anak enù ka nematay dé sa lukes di. Iya sa ngadan di diyà sa kagi Hibelu si Hadasa owoy pinengadanan da ma si Istél.

⁸ Na, egoh di nebaelan dé sa igsugù sa datù denu sa metolol kenogon, medoo sa kenogon inuwit da diyà sa dalesan sa datù diyà sa menuwa Susa, owoy nekelapeg ma Istél i. Igpeipat di kagda diyà si Higay sa sinaligan sa datù atung tegeipat sa medoo bayi. ⁹ Netuuwan Higay i diyà si Istél owoy mepion ma sa keadat di diyà kenagdi. Huenan di, binegayan di sa mepion kaenen owoy sa medoo eggamiten egpelanihlanih. Owoy binegayan di ma sa pitu bayi egsugùsuguen kedu diyà sa metolol dalesan sa datù, owoy pineugpà di ma diyà sa tigtu mepion bilik lapeg sa medoo egsugùsuguen di.

¹⁰ Na, endà tinulon i Istél duu amuk etaw Hudiyu kagdi i, enù ka hinawidan i Maldékiyu. ¹¹ Uman agdaw takà eg-ipanawpanaw Maldékiyu i medapag diyà sa duwangen sa dalesan kenà sa medoo bayi eg-ugpà anì metiigan di sa denu si Istél owoy sa egkebaelan di.

¹² Na, iya sa adat da endà mebaluy di tumaeng sa medoo kenogon diyà si Datù Asuliyu amuk endà pelà nekeuma di segepalay sa lugay da egpelanihlanih. Taman enem gebulan sa lugay da lumulowon sa lawa da sa lana igpelanih lawa, agulé taman enem gebulan ma sa lugay da lumulow sa lana mepion ngadeg. ¹³ Amuk endà pelà egkeuma sa egoh sa kenogon tumaeng diyà sa datù, igbegay da diyà kenagdi sa ginis ataw ka imu-imu egkeiyapan di iluhub amuk tumaeng diyà sa datù. ¹⁴ Agulé umangay sa kenogon diyà sa datù amuk sumigep. Hê, amuk umenaw simag, uwiten da dé diyà sa keduwa dalesan atang kenà sa medoo sawa sa datù. Iya sa sinaligan sa datù atung tegeipat sa medoo sawa di si Sayagas. Endà mebaluy di mekepeiges pelikù sa bayi umangay diyà sa datù liyu daa amuk ingadanan di tayu sa bayi egkeiyapan di. ¹⁵ Na, netuuwan sa langun etaw eghaa si Istél. Hê, egoh di neuma dé sa agdaw egoh di mangay tumaeng diyà sa datù, iya daa sa igluhub di sa ginis igsugù i Higay sa sinaligan sa datù tegeipat sa medoo bayi. ¹⁶ Hê, ighated da Istél i eg-angay diyà si Datù Asuliyu diyà sa metolol dalesan di egoh di neuma dé sa bulan pinengadanan da Tébét sa kesepulù di gebulan diyà sa kepitu di gepalay sa lugay di migkedatù. ¹⁷ Na, uman pa sa kekeiyap sa datù diyà si Istél kedu diyà sa kekeiyap di sa medoo liyu bayi, owoy uman pa egketuuwan diyà kenagdi kedu diyà sa medoo liyu kenogon. Huenan di, igpesudong di diyà kenagdi sa sudong bulawan enù ka ginelal di booy Istél i sa nekesambì diyà si Basti. ¹⁸ Agulé binaelan sa datù sa dakel pista anì ipetiig di sa egoh i Istél ginelal di booy, owoy igsasà di sa langun salu di owoy sa medoo egsugùsuguen di. Owoy binaelan di sa mapulù agdaw diyà sa nesakupan kedatuan di, owoy duen ma sa medoo igbegay di uloy enù ka iya adat sa datù.

Ini Sa Egoh I Maldékiyu Mig-aluk Sa Datù

¹⁹ Na, egoh sa medoo kenogon egkesetipon sa keduwa di gulê, nebaluy dé kaunutan Maldékiyu i diyà sa metolol dalesan sa datù. ²⁰ Dodoo egoh iya, tapay doo endà egtulonen i Istél duu sa keetawan di enù ka iya sa igsasà i Maldékiyu diyà kenagdi, owoy tapay doo migpangunut diyà kenagdi lagà sa binaelan di egoh di batà pelà.

²¹ Na, egoh iya egoh i Maldékiyu sa sebaen kaunutan diyà sa metolol dalesan sa datù, duen sa duwa egsugùsuguen tegebantay bengawan sa bilik sa datù. Iya sa ngadan da si Bigtan owoy si Tilis. Hê, egbulitan da Datù Asuliyu i owoy egpenemdemen da mimatay. ²² Na, egoh i Maldékiyu neketiig iya wé, tinulon di diyà si Booy Istél. Agulé tinulon i Istél ma diyà sa datù sa dinineg di diyà si Maldékiyu. ²³ Huenan di, igpeigsà sa datù amuk tigtu tuu iya wé. Agulé egoh di neketiig tigtu tuu, igpebitin di Bigtan i owoy si Tilis. Agulé igpesulat sa datù sa gugud denu iya wé diyà sa libelu denu sa kedatuan di.