9
Ini Sa Egoh Sa Medoo TegeIslaél Nesenulê
1 Na, egoh sa keduwa di pulù owoy epat agdaw diyà iya wé bulan, nesetipon dema sa medoo tegeIslaél. Pineulan da sa kekaen da owoy migkawal da sa binekas sakù owoy binuhbuhan da ma abuh sa ulu da, enù ka tigtu da nebukul danà sa salà da. 2 Migpeiges sa medoo tugod i Islaél diyà sa medoo etaw beken Hudiyu. Agulé migtigdeg da egoh da egtulon sa medoo salà da owoy sa salà sa medoo tupù da. 3 Taman telu kaulas sa lugay da egtigdeg egdinegdineg sa kebasa sa uledin i Datù Nemula, sa Nemula egpigtuuwen da. Agulé taman telu kaulas ma sa lugay da egtulon sa medoo salà da owoy eg-oloen da ma Datù Nemula i, sa Nemula da.
26 Mig-ikagi da, guwaen da, “O Datù Nemula, apiya di pa dakel sa mepion ketabang igpeuloy ko diyà sa medoo tupù ké, endà doo egpangunut da diyà keniko. Dodoo egkuntelaen da polo kuna owoy ininiyugan da sa medoo uledin ko. Inimatayan da ma sa medoo tegesugkow kagi ko sa takà egsasà kenagda anì mekepelikù da diyà keniko, owoy mesagkat ma sa ketabiyà da keniko. 27 Huenan di, pinandayà ko ma kagda anì umuyayà dé sa medoo kuntelà da takà egpelihay kenagda. Dodoo egoh da nepelihay, eg-ingonoy da doo diyà keniko. Apiya di pa dutu ka langit dò, dinineg ko doo sa kesimbà da. Owoy danà sa dakel kehidu ko, pineangay ko sa medoo ulu-ulu anì mealukan da kedu diyà sa egkegaga sa medoo kuntelà da. 28 Dodoo egoh di migketanà dé sa keugpà da, binaelan da dema sa medaet diyà sa kehaa ko. Huenan di, pinandayà ko kagda anì umuyayà dema sa medoo kuntelà da. Dodoo egoh da nesenulê, migpegeni da dema tabang diyà keniko, owoy sinagipà ko doo apiya di pa dutu ka langit dò. Mesagkat sa kealuk ko kenagda danà sa dakel kehidu ko.
29 “Medoo dé gulê sinasà ko kagda anì pangunutan da sa medoo uledin ko. Dodoo tinipay da polo enù ka hagda munoy egkegaga daa sa egsaligan da. Endà pinangunutan da duu sa igsugù ko, apiya di pa melalù da hedem amuk tigtu da mangunut diyà sa medoo uledin ko. Danà sa ketegas lingoyen da, huenan di ininiyugan da kuna owoy mig-eked da ma egpangunut. 30 Dodoo danà sa kehidu ko, metaes polo sa tali ko diyà kenagda taman pila gepalay. Huenan di, inindaw ko ma kagda danà sa kagi igpesugkow sa Suguy ko diyà sa medoo tegesugkow kagi ko. Dodoo tapay doo endà egsagipaen da duu. Huenan di, igpeuyayà ko kagda diyà sa medoo liyu balangan etaw. 31 Dodoo danà sa dakel kehidu ko, endà pedaetan ko duu kagda imet owoy endà ma tagakan ko duu, enù ka kuna sa Nemula tigtu mepion owoy mehidu.
32 “O Nemula, sa Nemula egpigtuuwen ké, tigtu dakel sa egkegaga ko. Mekepesu ka owoy épê ka dakel tunung. Kesaligan ka owoy ipetuu ko doo sa pasad ko kumehidu sa langun etaw. Huenan di, egpegeni ké anì sagipaen ko sa medoo lihay ké. Edung egoh sa medoo datù tegeAsiliya mig-uyayà kenami taman ini egoh di, dakel sa kelikutan nehaa ké, lapeg sa medoo datù ké owoy sa medoo ulu-ulu ké, owoy sa medoo tegesimbà owoy sa medoo tegesugkow kagi ko, owoy sa medoo tupù ké ma. 33 Uman pigtamayan ko kami, metudà sa kebael ko enù ka kesaligan ka, dodoo nesalà ké diyà keniko. 34 Na, sa medoo datù ké owoy sa medoo ulu-ulu ké, owoy sa medoo tegesimbà ké owoy sa medoo tupù ké ma, anan da endà migpangunut diyà sa uledin ko. Endà sinagipà da duu sa medoo igsugù ko owoy sa medoo igsasà ko diyà kenagda. 35 Egoh di duen pelà sa hagda munoy kedatuan, endà polo migpangunut da diyà keniko, apiya di pa medoo sa itabang ko diyà kenagda. Igbegay ko diyà kenagda sa melabel tanà tigtu kebaluyan, dodoo endà egsabuh da egbael salà owoy mig-eked da ma egpangunut diyà keniko.
36 “Huenan di, neudipen ké ini egoh di diyà siini mepion tanà tigtu kebaluyan sa igbegay ko diyà sa medoo tupù ké. 37 Apiya di pa medoo temù sa metebas diyà siini tanà, iya polo sa egpekekuwa sa medoo datù pineuyayà ko diyà kenami danà sa medoo salà ké. Egbaelan da sumalà dé sa egkeiyapan da diyà kenami owoy diyà sa medoo hinagtay ké ma. Huenan di, tigtu dakel sa kelikutan ké.
38 “Na, danà iya wé medoo egkebaelan ké, huenan di kami i etaw ko, egbael ké sa pasad tigtu meeles owoy isulat ké ma. Neseunutan ma sa medoo ulu-ulu ké owoy sa medoo tugod i Lebi owoy sa medoo tegesimbà.