Isdela 1

Ini Sa Igsulat I

ISDELA

Ini Sa Egoh I Datù Silo Migpepelikù Sa Medoo TegeHuda

¹ Na, egoh sa muna palay egoh i Silo migkedatù diyà sa tanà Pélsiya, igpetuu i Datù Nemula sa inikagi di tinulon i Hilimiyas sa tegesugkow kagi di egoh anay. Danà sa Suguy i Nemula migluhub diyà si Datù Silo, huenan di igpesulat di sa uledin owoy igpetiig di diyà sa langun etaw nesakupan sa kedatuan di.

² Ini sa kagi igpesulat i Datù Silo tegePélsiya, guwaen di, “Na, danà i Datù Nemula sa Nemula diyà langit, huenan di migkedatù a diyà sa langun balangan tanà diyà siini sinukub langit. Owoy igsugù di kenak ipebael sa Dalesan di dutu Hélusalém dò diyà sa tanà Huda. ³ Ungayà ku umunut-unut Nemula i diyà keniyu i medoo etaw di. Mepion amuk pelikù yu langun umangay diyà Hélusalém dutu tanà Huda dò anì mebaelan yu dema sa Dalesan i Datù Nemula, sa Nemula egpenemulawen sa medoo tegeIslaél dutu Hélusalém dò. ⁴ Na, sa medoo tegeIslaél nesamà diyà sa muni dé menuwa, mepion amuk mebegayan sa liyu etaw kagda pilak owoy bulawan owoy sa langun taman owoy hinagtay owoy sa ibegay da uloy atang gamiten diyà sa Dalesan i Nemula dutu Hélusalém dò.”

⁵ Na, sa langun etaw nebegayan i Nemula megaen pedu, lapeg sa medoo ulu-ulu tugod i Huda owoy sa medoo ulu-ulu tugod i Bénhamin owoy sa medoo tegesimbà owoy sa medoo tugod i Lebi, eg-igkes da langun mipanaw anì baelan da dulì sa Dalesan i Datù Nemula dutu Hélusalém dò. ⁶ Agulé migtabang sa medoo duma da nesedapag dalesan, huenan di migbegay da diyà kenagda sa medoo sangkap pilak owoy bulawan owoy sa medoo hinagtay owoy sa medoo liyu mapulù langun taman, owoy sa langun ibegay da uloy atang gamiten diyà sa Dalesan i Nemula.

⁷ Hê, igpelikù i Datù Silo ma sa medoo langun taman kinuwa i Datù Nabokonosol diyà sa Dalesan i Nemula dutu Hélusalém dò egoh anay sa igtagù di diyà sa dalesan sa hagdi egpenemulawen. ⁸ Igsalig i Datù Silo iya wé medoo langun taman diyà si Mitelida sa tegeipat pilak diyà sa tanà Pélsiya. Agulé binilang i Mitelida anì ibegay di diyà si Sibasal sa ulu-ulu diyà sa tanà Huda.

^9-10 Na, ini kedoo sa langun taman igbegay i Datù Silo: telu pulù sa pelanggana anan bulawan, owoy sengibu sa pelanggana anan pilak, owoy duwa pulù owoy siyow sa ilùilù anan pilak ma, owoy telu pulù sa melikungkung anan bulawan, owoy epat gatus sepulù sa melikungkung anan pilak, owoy sengibu ma kedoo sa liyu langun taman. ¹¹ Hê, lima ngibu epat gatus lapin sa kedoo langun taman pilak owoy bulawan igpeipat da diyà si Sibasal anì uwiten di amuk egpelikù da Hélusalém dò kedu diyà sa tanà Babiloniya.