21
Ini Sa Egoh I Akab Migtepel Sa Tanà I Nabot
1 Na si Nabot tegeHéslil, duen sa hinemulaan di palas diyà Héslil medapag diyà sa metolol dalesan i Datù Akab sa datù diyà Samaliya. 2 Na, sebaen agdaw mig-ikagi Datù Akab i diyà si Nabot, guwaen di, “Begayi ko diyà kenak sa hinemulaan ko palas, enù ka medapag diyà sa duwangen dalesan ku owoy ungayà ku pehemulaan ku sa medoo balangan egpengalapen. Sambian ku diyà keniko sa sebaen ma hinemulaan palas sa uman pa mepion diyà siini hinemulaan ko. Ataw ka amuk meiyap ka, bayadan ku pilak sa neseunutan ta lagà di.”
3 Migsagbì Nabot i, guwaen di, “Pehiduhidu a diyà keniko. Endà mebaluy di enù ka meketipay a diyà sa igsugù i Datù Nemula amuk dagangen ku siini tanà, enù ka neketugod ma daa diyà kenak sa tanà sa medoo tupù ku.”
4 Agulé migkedaet sa pedu i Akab eglikù owoy tigtu ma egbulit danà sa sagbì i Nabot tegeHéslil. Mig-angay eghibat dalem sa bilik di, owoy mig-isalu diyà sa kelatkat owoy eg-eked ma egkaen. 5 Agulé mig-angay sa sawa di si Hésabil diyà kenagdi owoy mig-igsà, guwaen di, “Ngadan sa pesuwan ko egbulit owoy endà ma egkaen ka?”
6 Migsagbì Akab i, guwaen di, “Danà sa inikagi i Nabot tegeHéslil egoh ku mig-angay egpegeni egbeli hedem sa tanà di, ataw ka sambian ku diyà kenagdi sa liyu hinemulaan palas. Dodoo endà ibegay di duu gaa diyà kenak sa tanà di.”
7 Hê, mig-ikagi Hésabil i diyà kenagdi, guwaen di, “Tukééy daa iya wé. Enù di ya, beken kuna sa datù diyà siini tanà Islaél? Na, enaw ka owoy kaen ka ma. Kuwaen ku doo diyà keniko iya wé hinemulaan i Nabot tegeHéslil.”
8 Agulé migsulat Hésabil i. Egoh di neubus dé egsulat, inilingan di sa kepilma i Datù Akab anì metandaan kedu kenagdi sa sulat.a Agulé igpeuwit di iya wé sulat diyà sa medoo ulu-ulu owoy sa medoo mapulù etaw diyà sa menuwa Héslil kenà i Nabot eg-ugpà. 9 Iya sa kagi diyà sa igsulat i Hésabil, guwaen di, “Baeli yu atas sa egoh yu peulan sa kekaen yu. Agulé setiponoy yu langun, owoy peugsad yu Nabot i diyà sa taengan yu. 10 Sugù yu sa duwa etaw tegebael medaet anì tipuwen da Nabot i. Iya sa ikagiyen da sinumbung di Nemula i owoy sa datù ta. Agulé uwit yu Nabot i diyà sa liyu sa menuwa owoy buung yu batu anì mematay.”
11 Agulé binaelan sa medoo ulu-ulu owoy sa medoo mapulù etaw tegeHéslil sa igsugù i Hésabil igsulat di diyà kenagda. 12 Binaelan da sa atas egoh sa langun etaw egpeulan sa kekaen da, agulé migsetiponoy da owoy pineugsad da ma Nabot i diyà sa taengan da. 13 Hê, tinipu sa duwa etaw tegebael medaet Nabot i diyà sa taengan sa medoo etaw, guwaen da, “Sinumbung i Nabot Nemula i owoy sa datù ta.” Huenan di, inuwit da Nabot i diyà sa liyu sa menuwa owoy binuung da batu taman sa egoh di nematay. 14 Agulé igpetulon da diyà si Hésabil sa egoh i Nabot nematay dé danà di binuung batu.
15 Na, egoh i Hésabil neketiig iya wé, mig-ikagi diyà si Datù Akab, guwaen di, “Na, angay ko dé kuwa sa tanà endà nebeli ko duu diyà si Nabot tegeHéslil. Endà dé mekelaguk di duu diyà keniko enù ka nematay dé.” 16 Hê, egoh i Akab neketiig nematay dé Nabot i, mig-angay diyà siedò tanà enù ka kuwaen di dé.
17 Agulé mig-ikagi Datù Nemula i diyà si Iliyas tegeTésbi sa tegesugkow kagi di. 18 Guwaen di, “Ipanaw ka angay diyà si Akab sa datù diyà sa tanà Islaél.b Hauwen ko kagdi diyà sa hinemulaan palas i Nabot tegeHéslil, enù ka inangay di dé egkuwa. 19 Ikagi ko diyà si Akab, guwaen ko, ‘Ini sa kagi i Datù Nemula diyà keniko. Egoh ko neubus dé mig-imatay sa etaw, hê tinepel ko ma atu sa tanà di? Owoy ini ma sa kagi i Datù Nemula diyà keniko. Sa kenà medoo tuyang migdilà sa depanug i Nabot, dahiya ma sa niko depanug dilaen tuyang.’”
20 Na, egoh i Akab mighaa si Iliyas, mig-ikagi Akab i, guwaen di, “Nesehaa ki depa, o kuntelà ku.”
Migsagbì Iliyas i, guwaen di, “Nesehaa ki dema, enù ka egtemù ka dé egbael medaet diyà sa kehaa i Datù Nemula. 21 Huenan di, ini sa kagi i Datù Nemula diyà keniko, tigtu dakel sa kepigtamay di mekeuma diyà keniko. Imatayan di kuna taman sa langun tugod ko maama diyà sa tanà Islaél, iling ka lukes ataw ka batà. 22 Pigtamayan di sa medoo tugod ko lagà sa kinepigtamay di sa medoo tugod i Datù Héloboam sa anak i Nabat egoh anay owoy lagà ma sa kinepigtamay di sa medoo tugod i Datù Baasa sa anak i Ahiyas egoh anay, enù ka tigtu pinebulit ko Datù Nemula i danà ko mig-enggat sa medoo tegeIslaél egbael salà. 23 Owoy ini ma sa kagi i Datù Nemula denu si Hésabil sawa ko, daesan sa medoo tuyang sa lawa di diyà siini menuwa Héslil.c 24 Sumalà dé sa etaw diyà sa malayan ko mematay diyà sa menuwa da, daesan medoo tuyang. Owoy amuk mematay da diyà sa mediyù dalesan, manuk ketalunan ma sa kumaen kenagda.”
25 Na, edung egoh anay endà pa duen etaw migbael medaet lagà sa kedaet sa binaelan i Akab diyà sa kehaa i Datù Nemula danà di mig-unut diyà sa ungayà sa sawa di si Hésabil. 26 Tigtu medaet sa salà binaelan di egoh di migpenemula sa medoo inetaw, enù ka inilingan di sa medoo tegeAmoliya sa hinemagawan i Datù Nemula egoh anay egoh sa medoo tegeIslaél anay migtebow dahiya.
27 Na, egoh i Akab migdineg sa inikagi i Iliyas tegesugkow kagi i Nemula, linisì di sa ginis di enù ka nesenulê, owoy migkawal polo sa binekas sakù owoy pineulan di ma sa kekaen di. Tapay doo migkawal sakù apiya di pa eghibat owoy migpetukééy ma danà di tigtu nebukul.
28 Huenan di, mig-ikagi Datù Nemula i diyà si Iliyas tegeTésbi, 29 guwaen di, “Hinaa ko pa sa egoh i Akab tigtu migpetukééy diyà sa kehaa ku? Na, danà iya wé kepetukééy di, endà pelawà ipetuu ku duu sa kepigtamay ku kenagdi egoh di nehagtay pelawà. Dodoo pigtamayan ku doo sa medoo tugod di amuk sa anak di pa sa mekesambì kenagdi kumedatù.”