12
Ini Sa Egoh I Dabid Nesenulê
(2 Samuwél 12:1-15a)
1 Na, pineangay i Datù Nemula Natan i sa tegesugkow kagi di diyà si Dabid. Egoh di migtebow, mig-ikagi diyà si Dabid, guwaen di, “Duen sa duwa maama eg-ugpà diyà sa sebaen daa menuwa. Kawasà sa sebaen owoy pubeli sa sebaen. 2 Duen medoo kebilibili sa kawasà owoy medoo sapì ma. 3 Dodoo sa pubeli, sebaen daa sa hagdi nati kebilibili bayi bineli di. Mepion sa keipat di lagà mendaa sa keipat di sa medoo anak di. Egsepipiyen di lagà sa bayi anak di owoy ipekaen di ma sa duma egkaenen di owoy peinemen di ma diyà sa hagdi tabù. 4 Na, sebaen agdaw duen sa etaw kedu mediyù dò migtebow diyà sa dalesan sa kawasà etaw. Dodoo endà egkeiyapan di duu egsumbalì sa hagdi munoy hinagtay. Huenan di, iya polo sa kinuwa di sa kebilibili sa pubeli etaw owoy sinumbalì di anì imengana di diyà sa etaw migtebow.”
5 Na, egoh i Dabid migdineg iya wé, tigtu binulitan di sa kawasà etaw, owoy guwaen di diyà si Natan, “Ipengibet ku danà di melalù Datù Nemula i, mepion amuk meimatayan sa etaw migbael iya wé. 6 Owoy pebayaden ta epat gulê metakep lagà sa kinuwa di, enù ka endà eghiduwan di duu sa etaw pubeli.”
7 Agulé mig-ikagi Natan i diyà si Dabid, guwaen di, “Kuna sa pineligadan ku sa kawasà etaw. Na, dineg ko sa kagi i Datù Nemula sa egpigtuuwen ta, kita i tugod i Islaél. Guwaen i Nemula diyà keniko, ginelal di gaa kuna datù diyà sa medoo tegeIslaél, owoy inalukan di ma kuna kedu diyà sa egkegaga i Saulo. 8 Owoy igbegay di ma diyà keniko sa kedatuan i Saulo owoy sa medoo sawa di. Kuna ma sa pinedatù i Nemula diyà sa uwang tanà Islaél owoy sa tanà Huda. Amuk kulang pa iya wé diyà keniko, dugangen di pa uman sa ibegay di diyà keniko. 9 Huenan di, maen di ya endà sinagipà ko duu sa kagi i Datù Nemula danà ko migbael sa tigtu medaet diyà sa kehaa di? Igpeimatay ko polo Uliyas i owoy sinawa ko ma sa sawa di. Tuu doo, igpeimatay ko Uliyas i tegeHétiyo diyà sa medoo tegeAmoniya anì mekuwa ko sa sawa di. 10 Na, danà ko gaa migtipay diyà si Nemula egoh ko migkuwa sa sawa i Uliyas tegeHétiyo anì sawaen ko, huenan di dumuen sa duma tugod ko tigbasen sundang mesetugdugtugdug taman melugay. 11 Peduenen i Nemula sa kumuntelà diyà keniko kedu doo diyà sa malayan ko. Hauwen ko sa egoh i Nemula kumuwa sa medoo sawa ko owoy ibegay di diyà sa duma ko nesesebaen menuwa owoy meseuma da lawa, apiya di pa agdaw. 12 Iglidung ko sa salà binaelan ko, dodoo ipebael i Nemula ini i diyà agdaw anì mehaa sa langun tegeIslaél.”
13 Agulé mig-ikagi Dabid i diyà si Natan, guwaen di, “Tuu doo, nesalà a diyà si Datù Nemula.”
Migsagbì Natan i, guwaen di, “Na, danà ko nesenulê, huenan di igpeuloy i Datù Nemula sa salà ko, owoy endà ma mematay ka. 14 Dodoo danà iya wé salà binaelan ko, sinumbung ko Datù Nemula i. Huenan di, mematay iya wé anak yu.” 15 Agulé miglikù Natan i.
Ini Sa Egoh Sa Anak I Dabid Nematay
(2 Samuwél 12:15b-24)
Na, igpetuu i Datù Nemula sa inikagi di. Huenan di, tigtu miglinadu iya wé anak i Dabid diyà sa tapay sawa i Uliyas. 16 Agulé migsimbà Dabid i diyà si Nemula anì melikuan sa anak da eglinadu. Mig-eked ma egkaen owoy migdalem diyà sa bilik di dodoo uman sigep tanà polo sa kenà di eghibat taman umenaw simag. 17 Agulé mig-angay sa medoo salu di diyà kenagdi anì petigdegen da, dodoo mig-eked owoy endà ma egpeunut di egkaen diyà kenagda.
18 Na, egoh di neuma sa kepitu di agdaw, nematay dé sa batà. Dodoo egpesu sa medoo salu i Dabid egtulon diyà kenagdi denu sa batà nematay, enù ka guwaen da, “Amuk endà sinagipà di duu sa inikagi ta egoh sa batà nehagtay pelawà, labi pa egsagipà ini egoh di enù ka nematay dé sa batà. Petow ki daa mael medaet polo.”
19 Na, egoh i Dabid eghaa sa medoo salu di egsebadàbadaay, iya sa pedu di nematay dé sa batà. Huenan di, inigsà di, guwaen di, “Enù di ya, nematay dé sa batà?”
Migsagbì da, guwaen da, “Hoò, nematay dé.”
20 Agulé mig-enaw Dabid i owoy mig-angay egpedigus owoy linulowon di lana sa lawa di owoy sinambian di ma sa ginis di. Agulé mig-angay egsimbà diyà sa atung kenà da egsimbà diyà si Datù Nemula. Egoh di neubus egsimbà, miglikù diatas owoy migpegeni egkaen. Hê, pinekaen da.
21 Agulé mig-igsà sa medoo salu di, guwaen da, “Maen di ya hediya sa binaelan ko? Egoh sa batà nehagtay pelawà, mig-eked ka egkaen owoy sininegawan ko ma. Dodoo egoh di nematay dé, mig-enaw ka owoy migkaen ka polo.”
22 Migsagbì Dabid i, guwaen di, “Egoh sa batà eglinadu pelawà, mig-eked a egkaen owoy sininegawan ku ma, enù ka iya sa penemdem ku mehiduwan i Datù Nemula aken owoy anì melikuan iya wé anak ku. 23 Dodoo ini egoh di nematay dé. Maen di ya umeked a pelawà kumaen? Megaga ku pa ipelikù sa ginawa di, atu? Netiigan ku sebaen agdaw mekeangay a ma diyà sa kenà di, dodoo kagdi endà dé mekepelikù di diyà kenak, sumalà dé sa egkebaelan ku.”
24 Agulé pinepion i Dabid sa pedu sa sawa di si Batsiba. Agulé egkesehulid da dema, owoy migkelalingen dema iya wé sawa di. Hê, mig-anak maama owoy pinengadanan da si Salomon. Na, eghiduwan i Datù Nemula iya wé batà.