11
Ini Sa Denu Si Dabid Owoy Si Batsiba
(2 Samuwél 11:1-17,26-27)
1 Na, egoh di nelugaylugay dé sa egoh di neuma dema sa sebaen magtu palay sa mepion gai kesegilaway sa medoo datù, sinugù i Dabid dema Hoab i owoy sa medoo ulu-ulu sundalu owoy sa langun sundalu tegeIslaél anì mangay da gumila. Agulé linugpì da sa medoo tegeAmoniya owoy sineulingutan da ma sa menuwa Laba. Dodoo eg-ugpà daa Dabid i diyà sa menuwa Hélusalém.
2 Na sebaen mahapun, migtudug Dabid i. Agulé egoh di mig-enaw, miggemow diyà sa mepatag atep sa metolol dalesan di owoy egbigkatbigkat dahiya. Hê, hinaa di sa bayi egpedigus tigtu metolol. 3 Huenan di, mig-igsà anì metiigan di ngadan iya wé bayi. Agulé duen sa migtulon diyà kenagdi, guwaen di, “Si Batsiba atu anak i Iliyam, sa sawa i Uliyas tegeHétiyo.” 4 Agulé igpeangay i Dabid sa bayi, hê mig-angay ma doo sa bayi diyà si Dabid. Na, magtu daa neubus migpelanih danà di migpangunut diyà sa uledin da denu sa egoh da egdepanugan adat bayi. Hê, neseuma da lawa si Dabid, agulé miglikù dé sa bayi. 5 Na, danà iya wé binaelan da, migkelalingen Batsiba i owoy igpetulon di diyà si Dabid sa egoh di obol dé.
6 Na, egoh i Dabid neketiig iya wé, pineuwitan di kagi Hoab i sa ulu-ulu sa medoo sundalu di anì pelikuen di Uliyas i tegeHétiyo sa sawa i Batsiba diyà sa menuwa Hélusalém. 7 Agulé egoh i Uliyas migtebow, inigsaan i Dabid, guwaen di, “Enù egoh sa egkebaelan i Hoab owoy sa langun sundalu ta?” Owoy inigsà di ma denu sa kegila da. 8 Agulé mig-ikagi diyà si Uliyas, guwaen di, “Mepion doo amuk lumagbas ka pelawà diyà sa dalesan yu anì mekeetud-etud ka.” Huenan di, miglegkang Uliyas i. Hê, duen ma sa igpeuloy i Dabid igpelohot di diyà sa dalesan i Uliyas. 9 Dodoo endà miglagbas Uliyas i diyà sa hagdi dalesan. Migtudug polo diyà sa bengawan sa metolol dalesan i Datù Dabid diyà sa atung kenà sa medoo tegebantay egtudug.
10 Agulé egoh i Dabid neketiig endà miglagbas Uliyas i diyà sa dalesan di, inikagiyan di, guwaen di, “Magtu ka daa migtebow kedu mediyù dò, maen di ya endà eglagbas ka diyà sa dalesan yu?”
11 Migsagbì Uliyas i, guwaen di, “Sa Baul Tandà sa Igpasad i Nemula owoy sa medoo sundalu tegeIslaél owoy sa medoo sundalu tegeHuda, eg-ugpà da daa diyà sa medoo kemalig diyà sa kenà da eggila. Mediyù dalesan sa kenà da egtudug sa ulu-ulu ku si Hoab owoy sa langun sundalu ko. Enù di ya, mangay a pa diyà sa dalesan ku anì kumaen a owoy uminem a owoy anì mesehulid ké sa sawa ku? Egpengibet a diyà keniko owoy diyà sa kehaa i Nemula, endà doo baelan ku duu iya wé.”
12 Agulé mig-ikagi Dabid i diyà si Uliyas, guwaen di, “Ugpà ka pelawà dini ini egoh di, enù ka peipanawen ku pa kuna simag.” Huenan di, mig-ugpà Uliyas i diyà Hélusalém egoh iya wé agdaw owoy taman simag. 13 Inenggat i Dabid ma egkaen diyà sa kenà di owoy linangut di ma. Dodoo endà doo miglikù Uliyas i egoh iya wé sigep. Migtudug polo diyà siedò atung kenà sa medoo tegebantay egtudug.
14 Agulé egoh di sumimag, sinulatan i Dabid Hoab i owoy igpeuwit di diyà si Uliyas. 15 Iya sa igsulat di, guwaen di, “Pedenu ko Uliyas i diyà sa medoo mebalaw kuntelà yu, agulé peesud-esud ko sa medoo sundalu duma di anì meimatayan.”
16 Huenan di, egoh da i Hoab eggila diyà sa menuwa Laba, pinedenu di Uliyas i diyà sa netiigan di mebalaw kuntelà da. 17 Agulé egoh sa medoo kuntelà da miglaun kedu diyà sa menuwa da, egsegilaway da sa medoo sundalu i Hoab. Hê, duen medoo sundalu i Datù Dabid inimatayan da, lapeg si Uliyas.