15
Ini Sa Egoh I Nemula Migkedan Sa Kedatuan I Saulo
(1 Samuwél 15:1-23)
1 Na sebaen agdaw, mig-ikagi dema Samuwél i diyà si Saulo, guwaen di, “Aken sa sinugù i Datù Nemula eghudud lana anì egtandaan ku kuna sa kumedatù diyà sa medoo tegeIslaél. Na, dinegdineg ko sa inikagi i Datù Nemula épê dakel egkegaga. 2 Ini sa kagi di igsugkow ku diyà keniko, tigtu pigtamayan di gaa sa medoo tegeAmalék enù ka ginila sa medoo tupù da sa medoo tegeIslaél egoh da mig-ipanaw kedu Igiptu dò egoh anay. 3 Huenan di, angay ko gila sa medoo tegeAmalék. Imet ko kagda imatayi. Pedaeti ko ma sa medoo langun taman da anì endà duen sa mesamà. Imatayi ko kagda langun, bayi owoy maama, lukes etaw taman sa batà egsusu pelawà, lapeg sa langun hinagtay da ma.”
4 Huenan di, sinetipon i Saulo sa medoo sundalu tegeIslaél diyà sa menuwa Télim. Egoh di mig-esà kenagda, duen duwa latuh ngibu sundalu tegeIslaél owoy duen ma salagsà sundalu kedu diyà sa tanà Huda. 5 Agulé mig-angay Saulo i owoy sa medoo etaw di diyà sa menuwa tegeAmalék. Mig-esud da diyà sa baug medapag dahiya enù ka melaeb da. 6 Dodoo muna migpeuwit kagi Saulo i diyà sa medoo etaw tegeKenih nekeamut diyà sa medoo tegeAmalék anì melaguy da. Guwaen di diyà kenagda, “Pediyù yu dé diyà sa medoo tegeAmalék, anì endà mekelapeg yu diyà kenagda amuk imatayan ku kagda, enù ka hiniduwan sa tupù yu sa medoo tegeIslaél egoh da mig-ipanaw kedu Igiptu dò egoh anay.” Na, egoh sa medoo tegeKenih migdineg iya wé, medelamet da miglegkà.
7 Agulé eggilawen da i Saulo sa medoo tegeAmalék kedu diyà Habila taman mekeuma da diyà sa tanà Sul denu tebowon agdaw amuk diyà ki Igiptu. 8 Sinigkem da sa datù tegeAmalék, si Agag, owoy inimatayan di ma sa langun etaw di. 9 Dodoo endà imatayan da duu Agag i, owoy endà ma imatayan da duu sa mepion sapì owoy kebilibili owoy sa medoo liyu hinagtay megebù. Iya daa sa inimatayan da sa medoo endà mepion di.
10 Agulé mig-ikagi Datù Nemula i diyà si Samuwél, 11 guwaen di, “Nesenulê a sa egoh ku mighemilì si Saulo sa datù da, enù ka ininiyugan di aken. Endà egpangunutan di duu sa igsugù ku kenagdi.” Na, egoh i Samuwél migdineg iya wé, migbulit owoy neelut sigep sa kepehiduhidu di diyà si Datù Nemula denu si Saulo. 12 Agulé egoh di sumimag, miglapus Samuwél i eg-angay diyà si Saulo. Dodoo endà mapes da mesehaa enù ka mig-angay polo Saulo i diyà sa menuwa Kalmél kenà di migbael sa inetaw tandà sa hagdi kepionon, agulé miglagbas dutu menuwa Gilgal dò. 13 Hê, linohot i Samuwél Saulo i. Agulé egoh i Saulo mighaa kenagdi, sinaluan di, guwaen di, “Metabangan i Datù Nemula kuna, enù ka pinangunutan ku dé sa medoo igsugù i Datù Nemula diyà kenak.”
14 Dodoo mig-igsà Samuwél i, guwaen di, “Amuk hediya, maen di ya atu egdinegen ku kagi sa medoo kebilibili owoy kagi sa medoo sapì?”
15 Migsagbì Saulo i, guwaen di, “Iya sa nekuwa sa medoo sundalu ku diyà sa medoo tegeAmalék. Kinuwa da sa langun mepion kebilibili owoy sapì anì imatayan da ibegay da diyà si Datù Nemula sa egpigtuuwen ko. Dodoo inimatayan ké imet sa langun endà iseg di mepion.”
16 Mig-ikagi Samuwél i, guwaen di, “Enget dé. Na, dinegdineg ko sa inikagi i Datù Nemula diyà kenak egoh sigep.”
Agulé guwaen i Saulo, “Tuloni ko aken.”
17 Mig-ikagi Samuwél i, guwaen di, “Egoh anay, iya sa penemdem ko lagdà etaw ka. Dodoo ini egoh di kuna sa tigtu ulu-ulu sa medoo tegeIslaél, enù ka hinemilì i Datù Nemula kuna owoy pinehududan di lana sa ulu ko anì metandaan kuna sa kumedatù diyà sa medoo tegeIslaél. 18 Sinugù di kuna anì imatayan yu imet sa medoo tegeAmalék enù ka medaet sa binaelan da diyà sa kehaa i Nemula. Huenan di, igsugù di igpegila anì imeten yu kagda mimatay. 19 Maen di ya atu, endà migpangunut ka diyà sa igsugù di keniko? Ngadan sa pesuwan di migtelam-am yu egkuwa sa langun taman da? Dakel salà diyà si Datù Nemula iya wé binaelan yu.”
20 Migsagbì Saulo i, guwaen di, “Migpangunut a doo diyà si Datù Nemula, enù ka mig-angay a doo diyà sa pineangayan di kenak. Sinigkem ku Agag i sa datù tegeAmalék owoy inimatayan ku imet sa medoo liyu tegeAmalék. 21 Dodoo hinemilì sa medoo etaw ku sa tigtu mepion kebilibili owoy sapì anì endà ilapeg da duu eg-imatay, enù ka inuwit da polo dahini diyà Gilgal anì imatayan da ibegay diyà si Datù Nemula sa egpigtuuwen ko.”
22 Agulé mig-ikagi Samuwél i, guwaen di, “Taa ko. Ngadan tayu sa tigtu egkeiyapan i Datù Nemula, iling ka sa medoo hinagtay ulowen ta ibegay ta diyà kenagdi ataw ka sa kepangunut ta sa igsugù di? Tuu doo, uman pa mapulù diyà kenagdi sa kepangunut ta. Mepion doo sa kebael ta amuk ulowen ta sa kebilibili lapeg sa tabà di ibegay ta diyà si Datù Nemula amuk sumimbà ki. Dodoo uman pa mepion sa kepangunut ta diyà sa inikagi di. 23 Enù ka sa ketipay etaw diyà kenagdi, lagà mendaa sa salà sa etaw egpegeni diyà sa busaw. Owoy lagà mendaa kepenemula inetaw sa kepedakeldakel. Na, danà ko mig-eked sa igsugù i Datù Nemula diyà keniko, huenan di kinedanan di dé sa kedatuan ko diyà sa medoo etaw di.”