13
Ini Sa Egoh I Samuwél Migsigbolow Si Saulo
(1 Samuwél 13:1-14)
1 Na, egoh i Saulo nelugay dé datù diyà sa tanà Islaél, 2 hinemilì di sa telu ngibu sundalu diyà sa medoo mebagel maama tugod i Islaél. Pineunut di sa duwa ngibu sundalu diyà kenagdi diyà sa menuwa Mikmas owoy sa getan-getan diyà sa uwang tanà Bétél. Owoy pineangay di ma sa sengibu sundalu diyà sa anak di, si Honatan, dutu menuwa Gabaun dò diyà sa uwang tanà sa medoo tugod i Bénhamin. Agulé sa medoo maama endà hinemilì di duu, pinepelikù di kagda.
3 Agulé pinengayaw i Honatan sa medoo tegePilistiya migpetigdeg kemalig diyà Gabaa.a Hê, nekedineg sa medoo tegePilistiya sa lalag di. Agulé igpesugkow i Saulo iya wé diyà sa langun tegeIslaél owoy tinegbuliyan di ma sa medoo etaw anì sebuligan da gumila sa medoo tegePilistiya. 4 Na, netiigan sa medoo tegeIslaél inatuwan i Saulo sa segeumpung tegePilistiya owoy netiigan da ma egkelepuhan sa medoo tegePilistiya kagda. Huenan di, igsasà i Saulo kagda anì mesetipon da diyà kenagdi dutu Gilgal dò anì sebuligan da gumila.
5 Nesetipon ma sa medoo tegePilistiya anì umatu da gumila diyà sa medoo tegeIslaél. Duen sa telu lagsàb kalitun da atung eggamiten da eggila, owoy enem ngibu sa kedoo sundalu da egkudà, owoy endà mebilang sa kedoo sundalu da eg-ipanaw tanà enù ka lagà da sa kedoo enay mantadan. Mig-angay da migpetigdeg kemalig diyà sa menuwa Mikmas denu tebowon agdaw amuk diyà ki sa menuwa Bét-Aben. 6 Agulé netiigan sa medoo tegeIslaél mepasangan da danà di kulang sa egkegaga da umatu. Huenan di, miglidung da sumalà dé sa kenà da, duen miglidung diyà takub, duen ma diyà sa tosong diyà tanà, duen ma diyà sa kenà sa medoo dakel batu, duen ma diyà sa tapay kenà lebeng, owoy duen ma dalem sa paligì endà duen wayeg di. 7 Owoy duen ma sa migbatas sa lawa’t wayeg Holdan enù ka mig-angay da diyà sa uwang tanà sa medoo tugod i Gad owoy sa tanà Galaad.
Dodoo si Saulo owoy sa medoo duma sundalu di, mig-ugpà da pelawà dutu Gilgal dò, apiya di pa eglukub da egtigkel sa kekelimedang da. 8 Pitu agdaw sa lugay i Saulo eg-angat-angat, enù ka iya sa atas tinulon i Samuwél diyà kenagdi. Dodoo egoh di neuma sa kepitu di agdaw, neanggà sa ketebow i Samuwél. Huenan di, egketagakan sa medoo etaw di Saulo i. 9 Agulé migsugù Saulo i anì meuwit diyà kenagdi sa medoo hinagtay ulowen da ibegay da diyà si Nemula owoy sa medoo hinagtay ma imatayan da anì metandaan sa egoh da nesesebaen si Nemula. Egoh da mig-uwit dé, eg-ulowen di sa duma hinagtay. 10 Hê, egoh di neubus dé, iya pelawà sa egoh i Samuwél migtebow. Agulé mig-angay Saulo i egtelabuk kenagdi enù ka saluan di.
11 Dodoo inigsaan i Samuwél, guwaen di, “Maen di ya binaelan ko iya wé?”
Migsagbì Saulo i, guwaen di, “Binaelan ku iya wé enù ka egsalidan a sa medoo duma ku. Owoy endà panay ka migtebow apiya di pa neuma dé sa atas ta mig-imatay sa hinagtay ibegay ta diyà si Nemula. Owoy medapag ma dé sa medoo tegePilistiya diyà kenita diyà sa menuwa Mikmas. 12 Pinenemdem ku pengayawen sa medoo tegePilistiya kami diyà Gilgal ligò di endà pa neulow ta duu sa hinagtay ibegay ta diyà si Datù Nemula. Huenan di, netegelan a dé eg-ulow sa hinagtay ibegay diyà si Nemula.”
13 Agulé mig-ikagi Samuwél i, guwaen di, “Tigtu ka ngahàngahà danà iya wé binaelan ko, enù ka endà egpangunutan ko duu sa igsugù i Datù Nemula diyà keniko. Amuk pangunutan ko hedem sa uledin di, mebaluy kumedatù sa medoo tugod ko diyà sa tanà Islaél taman melugay. 14 Dodoo mekedan dé sa kedatuan ko danà iya wé binaelan ko. Na, danà ko endà egpangunut diyà sa igsugù di, hemilien i Datù Nemula polo sa sebaen ma maama anì kagdi sa kumedatù diyà sa tanà Islaél owoy tigtu metuuwan ma diyà sa etaw hemilien di.”