5
Ini Sa Egoh Di Endà Dé Migduen Sa Kaenen Mana
10 Na, egoh sa medoo tegeIslaél mig-esud pelawà diyà Gilgal diyà sa sugud medapag diyà menuwa Héliko, binaelan da sa Pista Sa Kinetalà Sa Kepigtamay i Nemula egoh di mahapun dé sa kesepulù owoy epat di agdaw diyà sa muna bulan diyà sa palay da. 11 Egoh di neubus iya wé Pista da, egoh di umenaw simag, kinaen da dé sa kaenen kinuwa da diyà sa tanà Kanan, sa teligo sinelal owoy sa binaelan da epan endà duen ipelenuk di. 12 Egoh da nekekaen dé sa kaenen diyà sa tanà Kanan, iya sa egoh di migsabuh dé sa ketebow sa kaenen mana.a Edung egoh iya, iya dé sa egkaenen da sa kaenen nekuwa da diyà sa tanà Kanan.