वारममेटा आक्रि दिया रोमना
2
1 इद्रमलेह्का आरुङ दियाना लोप्पा इळ्ता बूमि, पोग़ोटा बूमि, ओसो इविस्कनगा बाताल-बाताल मन्ह्ता, अद सबे पंडिसि देवुळ मारिह कीता. 2 मारिह कीसि वारममेटा आक्रि दियाते देवुळ तना कबळताहि रोमता. 3 देवुळि अद दिया इद बूमता सबे कबळ मारिह कीसि, अद आक्रि दियाते रोमता इनजि, अद दियातुन बर्कतता दिया इनजोरे वारमता पोल्वादिया तासता.मन्कना पुटमुळि
4 यहोवा देवुळिa पोग़ोटा बूमतुन, इळ्ता बूमतुन पंडटद लेका इद्रम मन्ह्ता इतेके, 5-6 मुने मुने इद बूमतगा इचुटा जबा-जाळि, बेदे अनम पुटवाय मता. बाराह्क इतेके अद तूकने पोलमता कबळ कीयलाहि मन्कल वेने इलोग़ आसि, ओसो देवुळि इद बूमते पेग़ अर्हवाय मता, मति इद इळ्ता बूम उबिंदु, अदे उबमते इद बूमि पूरा पोंदिंदु. 7 अस्के देवुळि मुनेटा मन्कल आदमिन बह पंडटा इतेके, इद बूमता तोळ्योते ओना मेंदुदुन पंडिसि, ओना मोसोटुह्क तना जीवाता ऊकुर ऊरिसि ओन जीवा अर्हचीता, अस्के ओग़ जीवाता मान्वल आतोग़.
एदेन पेदिरता वाळुम
8 अस्के पया देवुळि पोळ्द पेसेङ अंगुमतेके मतद एदेनb इनदनद पटटे उंद वाळुम कीता. अद वाळुमतगा तना पंडटद मन्कन तासता. 9 अद वाळुमतगा रीति-रीतिनाङ मरानु देवुळ पुटिह कीता. अव मराङ ऊळलाहि बेचोन सोबा, अविनाङ पंडिङ तिनदलाहि इंका पका बेसु! ओसो अद वाळुमता नडुमि इद्रमताङ रेंड मराङ मताङ, इतेके उंद मराता पंडि बारा हामुरलेवा जीवा ईयनदु, दुस्रा मराता पंडि बारा नेह्ना-लाग्वदिन पुन्पिह कीयनदु.c
10 एदेनता वाळुमतुह्क एग़ दोर्कलाहि वाळुमता नडुमतग्डाहि उंदि बेरेग़ि पोङिदु. अदे बेरेग़ि मुनेह पोङिसि नालुङ पायाङ आताङ. 11 मुनेता पाया आतद बेरेटा पेदिर पिसोन, अद बेरेग़ हविला इनदनदु देसेममेटे कळसोर-कळसोर पोङिदु. अद देसेमतगा बेसतल बंगर दोर्किंदु. 12 अगा वेल्लाय दाराताङ बंडाङ (दुमेङ काचिसि केग़यनाङ अद्रमताङ), ओसो मेंदुदगा ओकनदु गमगमता नेयवने दोर्किंदु. 13 ओसो उंदि बेरेटा पेदिर गिहोन, अद कूस देसेममेटे पोङिदु. 14 ओसो उंदि बेरेटा पेदिर हिदकेल, इद असुर देसेमतुह्क पोळ्द पेसेङ अंगुमते पोङिदु. ओसो उंदि बेरेग़ परात इनदनद मन्ह्ता.
15 एदेनता वाळुमतुन ऊळेवाळे कीयलाहि, ओसो अगा कबळ कीयलाहि देवुळ आदमिन तासता. 16 अस्के देवुळ आदमिन इद्रम वेहता इतेके, “निमा इद वाळुमता बेदाय मराता पंडि नीक तिनदा वेसतद तिन, 17 मति अद उंदि मरा मन्ह्ता, नेह्ना-लाग्वा पापम-पुनेम पुन्पिह कीयनदु, ताना पंडि मात्रम निमा तिनमा. तान तितेक अचोने! निमा अमेसा पिसविन आयकिन मति नीक हामुर वायग़ाये,” इनजोर आदमिन देवुळ उकुम ईता.
आंचाना पुटमुळि
18 पया मन्कल वग़ोग़ मनदकन बेस आयो, ओन्क जोळ अरयलाह ओन्क ओपना इद्रमता उंद तोळ कीकन इंन्जि देवुळ आलिह कीता. 19 देवुळि इद बूमते मनदनव सबे रीतिनाङ जन्वर्कु, पोग़ोट्क पग़यनव सबे रीतिनाङ पिटेङ, इविनु बूमता तोळ्योताहि पंडिस मता. अविनु पया आदमिनगा तता. अविनाङ पेदिर्कु आदम बह तासिह्तोग़ नना ऊळिह्नन, इंन्जि इता. अस्के आदम पया बाताल-बाताल पेदिर तासतोग़, अवे पेदिर्कु उदताङ. 20 इद्रमलेह्का मुकोदोयोनाङ, गेळाताङ सबे जन्वर्कनाङ, पोग़ोट्क पग़यनव पिटेनाङ पेदिर्कु आदमिये तासतोग़. तेला मति अविनग्डाहि ओन्क ओपनाह लेह्का बेदे तोळ दोर्को. 21 अदिनेनाह्कु देवुळि आदमिह्कु बेरा उस्कंड ईता, ओग़ कुर्क्ने उंतोग़. ओग़ उंतस्के ओना उंद मर्ङ-बोकातुन तेंडटा, तेंडिसि अद बोका मता जागातगा अवि निहता. 22 आदमनाहि तेंडटद मर्ङ-बोकाता उंद आंचान पंडिसि आदमिनगा तता. 23 तान ऊळिसि आदम इतोग़, “आह, इदे नावा जोळ आयलाहि बेस आयग़ा. इद इतेके नावाय बोका, नावाय अवि, कोय्तोना पकाताहि तेंडटदु, इंजेक तेना पेदिर आंचाळd मनदग़ा!” इंन्जि इतोग़.