Surano
Yahya
da ko'orua
1
1 Die sura mebinta hai aku kamotu'ano jema'a, nta dungku hai tina da nirurukino Apu Alla ronga hai ira anano da nilolaro to'u-to'ungku.a Na'iaa te'iaa pantaku, sawali luwu miano da to'orio pompotisu da menona lolarokomiu. 2 Kako lolarokomiu tendenomo pompotisu da menona da pono-ponohaakita, ronga danta merongakita dungku samengka-mengkauno.3 Kahioomo Apu Alla Tamanto ronga Yesus Kristus Anano kando peehawakita, lolarokita, ronga mapuhiakita'o barakatido, kato to'orio pompotisu da menona ronga kato pololaro.
Pompotisu da tekona ronga pololaro
4 Ntaperangku mohende hicu to'orio hi daa asa ntilara ana'u da nunu'o pompotisu da menona kana parenta da ari tinarimanto hai Tamanto. 5 Ronga diekana kupo'ita hai co'o ina, kato pada mpekalolaro. Da niburincu die na'iaa parenta tonia, sawali dahomo hai cita mebinta hai iso-iso. 6 Mololaro batuano tora nunu'o parentano Apu Alla. Ronga die parentano da ari pinodeamiu mebinta iso-iso, yahoo kami ntora pada mpekalolaro.
7 Me'aluo miano da mompokompore da mesosaba die hai wita'ea. Ko'iramo da sai akui'o Yesus Kristus hi arimo leu die hai wita'ea tewali manusia. Miano da mengkana ko'ira, yahomo miano da mompokompore ronga pedalunomo Kristus. 8 Mimpedagai kami osie ke'isaa wuano pohedoamami, sawali kami ntarimaa luwuo tilamiu mebinta hai Apu Alla.
9 Miano da sai ungkaari to'uo pompotisuno Kristus ronga da mebiahio, koie miano nai boboto'akono Apu Alla. Miano da ungkaari to'uo koie pompotisu, boboto'akonomo Apu Alla Tamanto ronga Anano. 10 Ki daa miano da leu da sai potisu'akomiu'o die pompotisu, osie mowukahi koie miano kai pewiso hai laicamiu ronga osie mososampatae. 11 Kana'umpe inai da mososampatae koie miano daakana, itaihomo na'ana koie miano moweweu da mosa'o.
Kompura-puraano ino'awa
12 Dahopo me'alu da paraluu kudaa nta mokodungku'akomiu'o, sawali nasaku ehemo nta moburiakokomiu. Deenapo mokeahaku leu awakomiu pantaku, kato mentepora'i mpogau, dahanomo nta mondo mohendeno pelaroanto.
13 Salamundo hai co'o ko'ira anano petila'u tina da nirurukino Apu Alla.b