20 Yir baag ne weoogẽ baaga.
Daar a yembre,
weoogẽ baag ra gõodame.
A taa tẽng a ye zags kudga.
A taa roog a ye sɛɛgẽ n yã baaga.
« Hey,
fo yʋʋr la a bõe »?
« Maam,
m yʋʋr la a baaga ».
« Bõe ?
fo me ?
La f vʋɩ ka »?
« N-ye ».
« Mam datẽ lame tɩ fo wa ne maam.
D na n tɩ vɩɩmda weoogẽ,
la weoogẽ vɩɩm yaa toogo.
Kal tɩ f tall yam bilfu,
sã n pa rẽ,
f pa tõe n vɩɩnd be ye ».
Yir baag yeelame :
« Sã n yaa rẽ,
yell ka be ye.
Mam tara yam.
Wakat fãa,
mam sẽn tar yam nins sõorã sẽn pa waoog la piig la a yiibu !
Yam piig la a yiibu,
mi tɩ pa paood ye »!
Kiuug a ye loogr poore,
b sẽn wa n yi daar a ye n gõodẽ,
la saagã sẽn sɩng niibu.
Tɩ b tɩ kẽ tãng bokẽ n na n sool saagã.
B sẽn kẽ bokã pʋg bal n sa,
la m ba katr sẽn ta.
Yir baag sẽn yã katrã,
rabeem kẽ-a lame t'a lʋɩ n gãand a naoẽ wã.
Tɩ katr yeele :
« Aoo,
y yibeoogo,
y keemame ?
Yaa bõe la y maand ka »?
« D waa n soola saaga».
« Aoo,
rẽ yaa sõma wʋsgo !
Bala zaamẽ tɛkã mam sẽn gõodã,
m nan pa paam bũmb n dɩ ye.
La yãmb y yiibã kell n zemsa mam sẽn da ratã ».
Saagã ra niime n yooge,
tɩ wéoogẽ baag sok yir baaga :
« Ade.
Wakat taame.
Fo yeela maam tɩ wakat fãa fo yam-dãmb sõor sẽn pa waoog la piig la a yiibu.
Wakat taame tɩ fo yiis a ye n paam n yi bog-kãngã pʋga »!
La yir baag yeèlame tɩ mosã wã,
wakat kãngã a sẽn da be zĩig ningã,
yam a yiib tãa n da ket ne-a.
« La yam-kãens a yiibã,
yaa bʋse »?
« Sẽn ket ne maam yaa m rʋʋdem yaa sãaga.
Ad yam nins sẽn ket ne-ma »!
We-baag yeelame :
« Maam yẽ miime bal tɩ katr rat n yõka tõnd n wãbe,
la m na n maana m sẽn tõe n põse ».
« Katre !
»,
we-baag sẽn yeele.
« Bõn-dẽgd kãngã pa tõe n wʋm fo sẽn yetã ye.
Yaa sãana.
A ra vɩɩ ne ninsaalba la yaa maam n wa ne-a ka.
La a tara kẽn buud sẽn pa wõnd a taaba,
tɩ fo sã n yã bɩ na n maan-f laad wʋsgo ».
« Bɩ a kẽn kẽn-kãng buud tɩ m gese »,
katr sẽn yeele.
We-baag sẽn wa yet a ye wã t'a kẽnã,
a walm-a lame n yeele :
« Zẽk f zʋʋrã n kẽnd n saoodẽ »!
T'a sɩd maan boto.
A sẽn da kẽndã,
a ra zẽkda a zʋʋrã n nakd a zugã.
Sɩd ra maanda laado.
A sẽn maan na-yakem a wãna,
katr yeelame :
« Sekame,
m yãame,
m yãame.
Lebg n wa,
lebg n wa ka tao-tao »!
La we-baag yeelame :
« Fo nan pa yã bũmb ye !
Yãoondã mii kẽn buud tus ka-tɛka.
La a ye n be n maand laad n yɩɩda »!
We-baag sẽn wa n maand wala a wĩnigda yir baag kẽn-sãang buudã,
a walmame n yeel-a :
« Fo sã n wa maand kẽn-kãng buudã,
f togame n wudg sõmb-sõmb n zoe n looge »!
Yir baag zẽka a zʋʋr n nak a zugu,
n na n dĩ tĩiga :
a kɩtame tɩ wubsg yiki.
Rẽ wakat tɩ katr yasame n tãsd zaalem:
« Sekame,
sekame !
Lebg n wa,
lebg n wa tʋʋlle !
M yãame,
m yãame »!
Baag wakat kãnga,
zoeeme n tɩ kẽ ninsaal roogẽ.
Halɩ n tãag rũndã, a nan pa leb n yi ye.