Tẽngã neb ra yãka yarn tɩ wakatã taame tɩ b na n bẽd katr tãoog n kʋ-a.

Rẽnd b kẽnga weoogẽ wã n tɩ tu bog-zulunga,

sẽn na yɩɩ tɩ katr lʋɩ a pʋgẽ.

Katr sẽn da pa mi bẽodgã tiirã,

a yii yʋng a ye n gõod weoogẽ wã,

n lʋɩ bokã pʋga.

Wãamb sẽn da tũud a sor yãa bokã n kolg n na n ges sẽn ya bũmb ninga.

A yãa katr n sok-a :

« Yaa bõe n kẽes foo bog-kãngã pʋga »?

Tɩ katr yet tɩ yʋngã,

yẽ sẽn yi gõodem weoogẽ wã la a Iʋɩ bokã pʋga la a pa le tõe n yi ye.

Tɩ wãamb yeele :

« Mam sã n yiis foo bokẽ wã,

f na n bas-m la laafɩ tɩ m looge »?

Tɩ katr yeele :

« N-ye sẽ !

Fo sã n yiis maam bog-kãngã pʋga,

sɩd yĩnga m kõn maan-f wẽeng ye.

Tɩ wãamb kɩs-a a zuurã n tak-a n yiis bokẽ wã.

A sẽn yi n paam a meng yasã,

katr gãda wãamb zʋʋre.

« Bas m zʋʋr wɛ »!

« Ayo,

bala rasem a yopoe la woto mam sẽn be bog-kãngã pʋga,

m ninã pa le ne sõma ye».

Sɩdã ,

ra yaa padeng gomde :

katr ra ratame n wãb wãamba,

t'a bul kibar n yet tɩ yẽ sẽn maan rasem a yopoe bokã pʋgã a ninã pa le ne sõma ye.

« Yals bilfu,

beoogã sã n vẽege,

m na bas f zʋʋrã,

tɩ f paam n looge ».

B sẽn yas n wẽed no-koɛɛma,

la soaamb sẽn ta.

A sẽn da ne tɩ b sũyã zabda ne taabã,

a sokame :

« Yaa bõe n maane ?

Yaa bõe tɩ yãmb yasẽ tɩ yaa no-koɛɛm woto »?

Wãamb yeelame tɩ yẽ ra gõodame,

n wa ta ka n yã katrã bok pʋga.

T'a sok-a :

m sã n yiis-f bokã pʋga f na n bas-m lame tɩ m loog n pa maan-m wẽenga »?

T'a leok-m tɩ n-ye,

la mam sẽn yiis a n sa wa,

a pa le rat n bas m zʋʋrã ye ».

Soaamb yãka yam n na n yɩ bag-naaba,

bag-rãmbã naab n bao n welg yellã tɩ sãmbg ra zĩnd ye :

« sã n yaa woto,

bɩ y pʋg maam n wa tɩ-kãngã tẽngr tɩ y na yã tɩ m na n bãngame n welg yãmb y yiibã sʋka,

ned ning sẽn tar-a bʋʋm la ned ning sẽn pa tar-a bʋʋm.

" B tũu taab n kẽng tɩɩgã tẽngr tɩ soaamb rɩk manesem sẽn wilgd t'a bʋgda sõmb-sõmbo.

N wa yeele :

« m bʋga m bagre :

rẽndame tɩ doaag maane.

Maam a bag-naab sẽn yaa mo-kasengã,

mam tog karma alkʋrãanã seb kẽere,

la wakat kãnga,

yãmb ned kam fãa sõmb n fõgna a neng a nusã pʋga.

Rẽ bal n tõe tɩ katr paam n dɩ a rɩɩbã tɩ gɩgdr ka zĩnd ye,

la a kell n tõog n vɩɩmd n be laafɩ».

Ad soaamb a bag-naab sẽn yeele,

la a le paase :

« mosã,

m na n karma bilf n kõ-yã,

la y rɩkda y nusã n lud y ninã.

Wãamba,

sẽn na yɩl n sɩbg-a a sẽn pa tagsã yĩnga,

togame n dʋ tɩɩgã rẽ pʋʋre.

Maam a bag-na-kẽenga,

mam tog n zoe n kẽe pitã,

la sã n yaa ne katre,

yẽ tog n dɩɩ a rɩɩb ne yam-basre.

« Katr ne wãamb ra na n tũẽ-la soaamb sẽn yeelã,

la,

fo sã n dɩk f nus n pĩ f nini,

f pa le tõe n gãd ned zʋʋr ye.

Rẽnd katr basa wãamb zʋʋrã,

t'a bãngame t'a na n tõog n dɩ-a-la ne yam-basre.

Bag-naab ra nan pa sa a goamã la wãamb zoe tao-tao n dʋ tɩɩgã ye,

tɩ soaamb menem moogã pʋg weoogẽ wã tɩ katr yas a ye tãa.

Rẽ daar tɛka,

wãamb yʋʋr lebga «a pa tagsde».