Daar a yembre,

yõensã tigma taab n na n ges b sẽn tog n maaneg ne m ba yũuga.

B sɩd yãa taab n yeele :

« D sã n pa bao yam rũn-kãngã yĩnga,

a na n wãa d zagsã».

B sɩd wẽe taab no-koɛɛma,

n wa yãk tags-kãngã n wilgi :

« Sẽn dog-a n yaa yõngr buud fãa wa ne a nug bũmbu :

tãmba.

D na n daa lombr n loe yũug yublã.

Rẽ,

a sã n na n pẽneg tõnd nin-yend fãa d wʋmda a rãamde».

B saka tagsgã,

n sɩng ligd-lobrã reesgo :

yõngr fãa tʋma a nug a loaabẽ n yiis ligdi.

La yõensã sʋka,

a ye n da be n da sɩd yaa tal-kʋdre.

Sẽn wa n ta yẽ wã,

a sẽn da pa tar ligdã a yeelame :

« Yaas-y-yã,

m tara bũmb n na n togse.

Mam pa tar ligd ye,

la m na n maoome n paam n kɩse.

La mam datame n deng n bãnge yaa yõng-bʋg n na n tɩ loe lombrã yũugã yublẽ.

Y sã n yã yõng-kãnga,

mam na kɩs m ligdã.

La yõng-kãng sã n pa yã,

mam pa na n kɩs fʋɩ».

B sɩngame n na n bao yõngr ninga,

b fãa sʋkã,

sẽn na n tɩ sẽbg-a lombrã yũugã yublẽ,

la b pa tol n paam yõngr ba a ye sẽn yeele :

« Aoo,

mam na n tɩ loee lombrã yũugã yublẽ ye».

Woto wã,

b fãa lebs n deesa b ligd n sui b loobsẽ.

Yõng-talgã me talla tags-sõngo :

a ra pa tar ligdi,

la yẽ n tall taogsg n yɩɩg a taabã.