Bambazi sambwadi mpe bampasi ya nsuka
15
Na manima,
mu talaka na mazulu kidimbu ya nkaka ya nene mpe ya ngitukulu:
bambazi* sambwadi simbaka bampasi sambwadi.
Ya kele bampasi ya nsuka yina ke lungisa nkele ya Nzambi.
2 Na manima,
mu talaka mubu yina vwandaka talana mutindu kitala-tala ya kuvukisa na tiya.
Bayina nyonso nungaka kibulu ya ngitukulu,
kifwiti ya yandi,
mpe lutangu ya nkumbu ya yandi vwandaka ya kutelama na mubu ya kitala-tala.
Bawu simbaka bisanzi yina Nzambi pesaka bawu.
3 Bawu vwandaka yimba nzimbu ya Moyize yina kele kisadi ya Nzambi,
mpe nzimbu ya Dimeme:
"Mfumu* Nzambi-Mpungu,
bisalu ya nge kele nene mpe kitoko.
Nge kele Ntinu ya bantu nyonso.
Banzila ya nge kele ya kudedama* mpe ya tsyelika.
4 Mfumu!
Nani lenda kumanga na kuzitisa nge?
Nani lenda kumanga na kuyimba nkembo ya nge?
Ya tsyelika,
kaka ni nge mosi kele ya longo*,
mpe bantu nyonso ya yinza ke fukama na ntwala ya nge,
samu ti bisalu ya nge ya kudedama
me talana na pwelele nyonso."
5 Na manima,
mu talaka Yinzo ya Nene ya Nzambi yina zibukaka na mazulu,
mpe na kati vwandaka na yinzo ya lele ya ngwisani.
6 Bambazi sambwadi yina vwandaka ya kusimba bampasi sambwadi basikaka na Yinzo ya Nene ya Nzambi.
Bawu lwataka bilele ya mpembe ya lino yina vwandaka lezima,
mpe vwandaka na basinga ya wolo na luketo.
7 Mosi na kati ya bibulu yiya pesaka bambazi sambwadi yina bambungu sambwadi ya wolo ya kufuluka na nkele ya Nzambi yina ke zingaka seko.
8 Yinzo ya Nene ya Nzambi fulukaka na mulinga samu na nkembo mpe lulendo ya Nzambi.
Ata muntu lendaka kota na kati tii ntangu ke manisa bampasi sambwadi yina nataka bambazi sambwadi.