Melekisedeki, ntinu mpe nganga-Nzambi
7
Ni Melekisedeki yina vwandaka ntinu ya mbanza Salemi mpe nganga-Nzambi* ya Nzambi-Mpungu.
Ni yandi kwendaka bwabana Abalami mpe sakumunaka yandi ntangu Abalami katukaka na muzingu yina yandi nungaka bantinu.
2 Abalami pesaka yandi kikunku ya kumi na bima nyonso yina yandi kuzwaka.
Nkumbu ya Melekisedeki zola kutuba "ntinu ya ludedemo",
mpe dyaka,
yandi vwandaka ntinu ya Salemia yina zola kutuba "ntinu ya kizunu".
3 Ata muntu zaba tata ya yandi,
mama ya yandi,
to bankoko ya yandi.
Ata muntu zaba mbutukulu mpe nsuka ya yandi.
Yandi kele mutindu Mwana ya Nzambi*:
Yandi kele nganga-Nzambi* tii seko.
4 Beno tala mfunu ya Melekisedeki yina Abalami,
nkoko ya beto,
pesaka kikunku ya kumi na bima yina yandi kuzwaka.
5 Kasi bantu ya dikanda ya Levi yina kele banganga-Nzambi*,
kele na luve ya Misiku* na kubaka kikunku ya kumi ya bima nyonso na sika ya bantu ya Isayeli yina kele bampangi ya bawu ya yinsi mosi,
ata ti bawu mpe kele bana ya dikanda ya Abalami.
6 Melekisedeki vwandaka ve muntu ya dikanda ya Levi.
Kasi yandi kuzwaka kikunku ya kumi na sika ya Abalami,
mpe sakumunaka Abalami,
muntu yina Nzambi pesaka bansilulu.
7 Beto lenda kusala ve ntembe ti muntu yina ke sakumunaka me lutila mfunu na muntu yina ke kuzwaka lusakumunu.
8 Banganga-Nzambi yina ke kuzwaka kikunku ya kumi kele bantu yina ke kufwa.
Kasi na yina me tadila Melekisedeki yina kuzwaka kikunku ya kumi,
yandi kele muntu yina ke ntete moyo mutindu yawu kele ya kusonama.
9 Ni bantu ya dikanda ya Levi ke kuzwaka kikunku ya kumi.
Kasi beto lenda kutuba mpe ti Levi pesaka mpe kikunku ya kumi ntangu Abalami pesaka yawu.
10 Ata ti Levi vwandaka me butuka ntete ve,
yandi vwandaka yimeni na menga ya nkoko ya yandi,
Abalami,
ntangu Melekisedeki kwendaka bwabana Abalami.
11 Banganga-Nzambi ya dikanda ya Levi vwandaka sala kisalu ya bawu mutindu Misiku ya Moyize vwandaka zabisa.
Mutindu kisalu yina bawu vwandaka sala vwandaka ve ya kulunga,
ya vwandaka mfunu ti nganga-Nzambi ya nkaka basika na mutindu ya Melekisedeki,
kasi ve na mutindu ya Aloni.
12 Kana mutindu ya kuvwanda nganga-Nzambi me soba,
misiku mpe fwana kusoba.
13 Mambu yayi kele ya kusonama samu na Mfumu* ya beto.
Yandi kele na dikanda yina ata muntu me salaka kisalu ya bunganga-Nzambi na mesa ya kuyoka minkayulu.
14 Yawu kele ya kuzabana ti Mfumu ya beto butukaka na dikanda ya Yuda yina Moyize tubaka ata dyambu samu na kisalu ya bunganga-Nzambi.
Nganga-Nzambi ya nkaka ya kufwanana na Melekisedeki
15 Ya ke na kutalana na pwelele nyonso ti nganga-Nzambi* ya nkaka yina kwizaka kele mutindu Melekisedeki.
16 Ya kele ve ti yandi me kuma nganga-Nzambi na luve ya misiku ya bantu,
kasi na lulendo ya luzingu yina lenda kumanisa ve.
17 Ya tsyelika,
Dibuku ya Nzambi ke tubaka:
"Nge kele nganga-Nzambi tii seko
na mutindu ya Melekisedekib."
18 Na yina,
Nzambi katulaka Misiku* ya ntama,
samu ti yawu vwandaka kondwa ngolo mpe mfunu.
19 Misiku vwandaka ve na lulendo ya kukumisa bantu ya kudedama*.
Kasi ntangu yayi,
beto me kuzwa kivuvu ya mbote yina ke na kunata beto pene-pene na Nzambi.
20 Ntangu bantu ya nkaka kumaka banganga-Nzambi,
ata muntu zengaka ve ndefi.
21 Kasi Yesu kumaka nganga-Nzambi na luve ya ndefi yina Nzambi zengaka ntangu Nzambi tubaka:
"Mfumu* me zenga ndefi,
mpe yandi ke soba ve mabanza ya yandi:
nge kele nganga-Nzambi tii sekoc."
22 Na yina,
Yesu kumaka muntu yina ke na kusala ti beto vwanda na kati ya ngwisani ya nkaka ya kulutila mbote.
23 Dyaka,
banganga-Nzambi yango vwandaka mingi,
samu ti lufwa vwandaka sala ti bawu sala ve kisalu yina tii seko.
24 Kasi Yesu ke zingaka seko,
mpe kisalu ya yandi ya bunganga-Nzambi ke manisa ve.
25 Ni yawu yina,
yandi lenda kuvuukisa seko bayina ke kumaka pene-pene na Nzambi na luve ya yandi,
samu ti yandi ke kaka moyo samu na kusambidilaka bawu.
26 Na yina,
Yesu kele nganga-Nzambi ya ntete* yina lungaka na beto.
Yandi kele ya longo*,
ke na dyambu ya yimbi ve,
mpe ke na disumu ve.
Nzambi katulaka yandi sika kele misumuki mpe zangulaka yandi na mazulu.
27 Yandi kele ve mutindu banganga-Nzambi ya ntete ya nkaka yina ke pesaka bilumbu nyonso minkayulu ntete samu na masumu ya bawu mosi,
mpe na manima samu na masumu ya bantu nyonso.
Yandi pesaka munkayulu kaka mbala mosi,
ntangu yandi pesaka nzutu ya yandi mosi.
28 Bantu yina Misiku vwandaka pesa muswa ya kuvwanda banganga-Nzambi ya ntete,
vwandaka bantu ya kulunga ve.
Kasi ndefi yina Nzambi zengaka na manima ya Misiku tulaka Mwana ya yandi nganga-Nzambi ya ntete yina yandi kumisaka seko muntu ya kulunga.