Ngalatiya 3

Misiku to kiminu

Bantu ya kizunga ya Ngalatiya, beno kele na mayela ve! Nani singaka* beno? Ba lakisaka beno na pwelele nyonso Yesu-Klisto* yina kufwaka na kulunsi. 2 Mu zola ti beno pesa munu mvutu na mambu yayi: Beno kuzwaka Mpeve ya Longo samu ti beno sadilaka Misiku*? To samu ti beno kuwaka Nsangu ya Mbote*, mpe beno kwikilaka yawu? 3 Wapi mutindu beno ke na kukondwa mayela na dyambu yina! Beno bandaka na Mpeve ya Longo, beno ke na zola kumanisa ntangu yayi na kimuntu ya beno? 4 Na yina, yawu lenda kuvwanda ve ti mambu yina beno me bwabana vwanda ya mpamba. 5 Nzambi ke pesaka beno Mpeve ya Longo, mpe ke salaka bimangu na kati ya beno. Na yina, beno fwana kubanza ve ti yandi ke salaka yawu, samu ti beno ke sadilaka Misiku, kasi samu ti beno kuwaka Nsangu ya Mbote, mpe beno kwikilaka yawu.

6 Ni yawu yina, Abalami salaka kiminu na Nzambi, mpe Nzambi kumisaka yandi ya kudedama* samu na kiminu ya yandi. 7 Na yina, beno fwana kuzaba yawu ti bayina ke na kiminu na Nzambi kele bana ya Abalami. 8 Ya sonamaka na kati ya Dibuku ya Nzambi ti Nzambi ke kumisa ya kudedama bayina kele ve ba-Zwife samu na kiminu ya bawu. Ni yawu yina, Dibuku yango zabisaka ntete nsangu ya mbote yayi na sika ya Abalami: "Nzambi ke sakumuna bantu ya bayinsi nyonso samu na nge." 9 Abalami kwikilaka, mpe Nzambi pesaka yandi lusakumunu. Na yina, bayina nyonso ke kwikilaka, ke kuzwaka lusakumunu kintwadi na Abalami.

10 Ya tsyelika, bayina ke tulaka ntima na kutumama na Misiku ke vwanda na kati ya nsingulu, samu ti Dibuku ya Nzambi ke tubaka: "Muntu yina ke tatamana ve na kusadila mambu nyonso yina kele na dibuku ya Misiku, ke kuzwa nsingulu." 11 Ya kele ya tsyelika ti ata muntu lenda kuvwanda ya kudedama na meso ya Nzambi na kutumama na Misiku, samu ti Dibuku ya Nzambi ke tubaka: "Muntu yina kele ya kudedama samu na kiminu, ke zinga." 12 Misiku ke na kintwadi ve na kiminu, kasi mutindu yawu kele ya kusonama: "Muntu yina ke sadilaka Misiku ke zinga na yawu."

13 Na kundima na kuzwa nsingulu yina beto zolaka kuzwa, Klisto kuulaka beto na nsingulu yina Misiku vwandaka pesa beto. Ya tsyelika, Dibuku ya Nzambi ke tubaka: "Muntu yina ba me ledika na yinti kele na nsingulu." 14 Ni na yina, lusakumunu yina Nzambi pesaka nsilulu na Abalami kumaka tii na bayina kele ve ba-Zwife samu na Yesu-Klisto. Yandi salaka mutindu yina, samu ti na lusalusu ya kiminu beto nyonso ke kuzwaka Mpeve yina Nzambi pesaka nsilulu.

Misiku mpe nsilulu

15 Bampangi, mu ke baka kifwanusu na kati ya luzingu ya beto ya konso kilumbu. Ntangu muntu ke lakisaka mambu yina bantu fwana kusadila na manima ya lufwa ya yandi, ata muntu lenda kukatula to kubwela dyambu ya nkaka. 16 Kasi Nzambi pesaka bansilulu ya yandi na Abalami mpe na mutekolo ya yandi. Dibuku ya Nzambi ke tubaka ve: "mpe na mitekolo ya yandi", mutindu ti ya vwandaka bantu mingi. Yawu ke tubaka: "mpe na mutekolo ya yandi", samu na kuzonzila kaka muntu mosi: Klisto*. 17 Mu ke na kutuba mutindu yayi: Nzambi lakisaka mambu yina fwana kusalama, mpe pesaka nsilulu na kukabikisa yawu ve. Misiku* yina sonamaka na manima ya bamvula nkama yiya na makumi tatu lenda kukabikisa ve ngwisani yina, mpe kusala ti nsilulu yina Nzambi pesaka vwanda ya mpamba. 18 Ya tsyelika, kana ni na Misiku bantu ke kuzwaka difwa na sika ya Nzambi, yawu lenda kusalama dyaka ve na nsilulu. Kasi ni na nsilulu, Nzambi pesaka Abalami lusakumunu.

19 Na yina, wapi mfunu ya Misiku? Yawu kele samu na kulakisa ti bantu vwandaka tumama ve na Nzambi. Yawu fwanaka vwanda mutindu yina tii na nkwizulu ya mutekolo ya Abalami yina Nzambi pesaka nsilulu yina. Ni bambazi* zabisaka Misiku yango na kusadila nzonzi mosi. 20 Mfunu ya nzonzi ke vwandaka ve kana muntu kele yandi mosi, mpe Nzambi ke kaka yandi mosi.

21 Na yina, ya zola kutuba ti Misiku ke nwanisaka bansilulu ya Nzambi? Ve! Kana ya vwandaka na musiku yina lendaka pesa luzingu ya tsyelika na bantu, ni na Misiku zolaka katuka ludedomo. 22 Kasi Dibuku ya Nzambi ke tubaka ti yinza ya muvimba kele na yinsi ya lutumu ya disumu, samu ti bandimi kuzwa na lusalusu ya kiminu ya bawu na Yesu-Klisto dikabu yina Nzambi pesaka nsilulu.

Mfunu ya Misiku

23 Ntete ntangu ya kusala kiminu na Yesu-Klisto* kuma, beto vwandaka bankole ya Misiku* na kuvingilaka ntangu yina Nzambi fwanaka lakisa beto kiminu yina. 24 Na yina, Misiku vwandaka mutindu mukengi ya beto tii na nkwizulu ya Klisto, samu ti Nzambi kumisa beto bantu ya kudedama* na kiminu. 25 Kasi ntangu yayi, ntangu ya kusala kiminu na Yesu-Klisto me kuma, beto ke dyaka ve na lutumu ya mukengi yina.

26 Ya tsyelika, beno nyonso kele bana ya Nzambi na kusala kiminu na Yesu-Klisto. 27 Beno nyonso yina kuzwaka mbotokolo samu na kintwadi na Klisto, beno me lwata Klisto. 28 Na yina, ya ke dyaka ve na ba-Zwife mpe ba-Ngeleke*, bandongo mpe bantu ya kimpwanza, babakala mpe bakento. Ya tsyelika, beno nyonso me kuma kaka muntu mosi na kintwadi na Yesu-Klisto. 29 Kana beno kele ya kukangama na Klisto, beno kele bana ya Abalami mpe bantu yina ke kuzwa difwa yina Nzambi pesaka nsilulu.