23
Polo sikikaka bawu meso mpe tubaka:
"Bampangi,
na kati ya ntima ya munu,
mu ke na kutala ti mu sadilaka Nzambi tii bubu yayi na mutindu ya kusungama."
2 Nganga-Nzambi ya ntete*,
Ananyase,
tumisaka bayina vwandaka pene-pene na Polo na kubula yandi na yinwa.
3 Na yina,
Polo zabisaka yandi:
"Nge kele muntu ya bantima zole.
Ni Nzambi ke bula nge!
Nge kele awa samu na kufundisa munu mutindu ke zabisaka Misiku*.
Kasi nge ke na kuzitisa ve Misiku na kutumisa ti ba bula munu."
4 Bayina vwandaka kuna tubaka:
"Nge me finga nganga-Nzambi ya ntete!"
5 Polo vutulaka:
"Bampangi,
mu vwandaka zaba ve ti yandi kele nganga-Nzambi ya ntete.
Ya tsyelika,
Dibuku ya Nzambi ke tubaka:
'Nge ke finga ve mfumu ya yinsi ya ngea.' "
6 Polo zabaka ti na kati ya bantu ya kimvuka ya bakuluntu ya ba-Zwife* yina vukanaka,
vwandaka na nkonga ya ba-Saduse* mpe nkonga ya ba-Falisye*.
Ni yawu yina,
yandi lookaka na ntwala ya bawu:
"Bampangi,
mu kele Falisye,
mwana ya ba-Falisye.
Mu kele na ntwala ya lufundusu samu na kivuvu ya beto ti bantu ya kufwa ke vumbuka na lufwa."
7 Ntangu yandi tubaka mutindu yina,
ba-Falisye na ba-Saduse bandaka na kuswana,
mpe kimvuka kabukaka na bandambu zole.
8 (Ba-Saduse ke tubaka ti mvumbukulu ya bantu ya kufwa kele ve.
Bawu ke tubaka dyaka ti bambazi* mpe bampeve kele ve.
Kasi ba-Falisye ke kwikilaka mambu nyonso yina.)
9 Muvusu lutilaka ngolo,
mpe mwa ndambu ya milongisi ya Misiku* ya kimvuka ya ba-Falisye telamaka mpe tubaka na ngolo nyonso:
"Beto ke na kutala ve dyambu ya yimbi na muntu yayi.
Beto zaba ve kana mpeve to mbazi zonzilaka yandi."
10 Mutindu muvusu lutilaka dyaka ngolo,
mfumu ya ntete ya basoda kumaka na boma ti ba pasula Polo.
Ni yawu yina,
yandi tumisaka nkonga ya basoda ya yandi na kukatula Polo na kati-kati ya kimvuka samu na kunata yandi na kisika ya basoda.
11 Na mpimpa ya kilumbu yina,
Mfumu* Yesu talanaka na Polo mpe tubaka:
"Vwanda na kibakala!
Mutindu nge me tuba kimbangi ya munu awa na Yelusalemi,
nge fwana kutuba yawu mpe na mbanza Loma."
Ba-Zwife salaka mfundu ya kufwa Polo
12 Ntangu bwisi kutsyaka,
ndambu ya ba-Zwife salaka mfundu ya kufwa Polo.
Bawu zengaka ndefi ti bawu ke kudya ve mpe kunwa ve tii ntangu bawu ke kufwa Polo.
13 Bayina salaka mfundu yina vwandaka ya kulutila lutangu ya bantu makumi yiya.
14 Bawu kwendaka tala bamfumu ya banganga-Nzambi* mpe bakuluntu ya ba-Zwife samu na kuzabisa bawu:
"Beto me zenga ndefi na ntwala ya Nzambi na kudya ve mpe kunwa ve tii ntangu beto ke kufwa Polo.
15 Na yina,
na nkumbu ya kimvuka ya bakuluntu ya ba-Zwife*,
beno lomba na mfumu ya ntete ya basoda na kunata Polo na ntwala ya beno.
Beno zabisa yandi ti beno zola kutala mbote-mbote dyambu ya yandi.
Beto me kubama na kufwa yandi ntete yandi kuma awa."
16 Kasi mwana ya kibusi ya Polo zabaka mfundu yina.
Yandi kwendaka na kisika ya basoda.
Yandi kotaka mpe zabisaka yawu na Polo.
17 Na yina,
Polo bokilaka mfumu mosi ya basoda nkama,
mpe tubaka:
"Nata ditoko yayi na sika ya mfumu ya ntete ya basoda.
Yandi ke na mwa dyambu ya kuzabisa mfumu."
18 Mfumu ya basoda nkama nataka ditoko yina na sika ya mfumu ya ntete ya basoda,
mpe tubaka:
"Polo,
muntu ya boloko,
me bokila munu mpe me tumisa munu na kunata ditoko yayi na sika ya nge.
Yandi ke na mwa dyambu ya kuzabisa nge."
19 Mfumu ya ntete ya basoda simbaka ditoko na diboko,
mpe nataka yandi na lweka.
Yandi yufulaka yandi:
"Yinki nge zola kuzabisa munu?"
20 Ditoko vutulaka:
"Ba-Zwife me wisana na kulomba ti nge nata Polo mbasi na ntwala ya kimvuka ya bawu ya bakuluntu.
Bawu ke tubila nge ti bawu zola kutala mbote-mbote dyambu ya Polo.
21 Kasi kuwa bawu ve,
samu ti lutangu ya kulutila makumi yiya ya bantu na kati ya bawu me bumbama mpe ke na kuvingila yandi.
Bawu me zenga ndefi ya kudya ve mpe kunwa ve tii ntangu bawu ke kufwa yandi.
Ntangu yayi,
bawu me kubama mpe ke na kuvingila kaka mvutu ya nge."
22 Na yina,
mfumu ya ntete ya basoda tubaka na ditoko yina:
"Kuzabisa ve na muntu ti nge me tubila munu yawu.
Na manima,
yandi vutulaka yandi."
Bantu ya Loma nataka Polo na mbanza Sezale
23 Na manima,
mfumu ya ntete ya basoda bokilaka bamfumu zole ya basoda nkama,
mpe zabisaka bawu:
"Beno kutikisa basoda nkama zole,
mutindu mosi mpe basoda makumi sambwadi yina ke nataka bampunda,
mpe basoda nkama zole yina ke nwanaka na madyonga.
Beno vwanda ya kukubama na kukwenda na mbanza Sezale na ngunga ya yivwa ya mpimpa.
24 Beno kubika mpe bampunda samu na kunata Polo na mbote nyonso na sika ya Felikisi,
mfumu ya kizunga."
25 Na manima,
yandi sonikaka mukanda na mutindu yayi:
26 "Munu,
Kolode Lisyase,
ke na kupesa mbote na nge Felikisi,
mfumu ya Zude.
27 Ba-Zwife kangaka muntu yayi,
mpe zolaka kufwa yandi.
Kasi munu na basoda ya munu vuukisaka yandi ntangu beto kuwaka ti yandi kele muntu ya Loma.
28 Mutindu mu vwandaka zola kuzaba samu na yinki ba-Zwife fundaka yandi,
mu nataka yandi na ntwala ya kimvuka ya bawu ya bakuluntu.
29 Mu talaka ti ba fundaka yandi samu na mambu yina me tadila Misiku ya bawu.
Kasi ata dyambu ya yimbi vwandaka talana samu na kuzengila yandi lufwa to kutula yandi na boloko.
30 Ntangu ba me zabisa munu mfundu yina ba-Zwife me sala samu na kufwa yandi,
mu me baka lukanu na nswalu nyonso na kufidisa yandi na sika ya nge,
mpe mu me zabisa na mifundi ya yandi na kwenda kufunda yandi na sika ya nge."
31 Basoda tumamaka na mambu yina mfumu ya bawu zabisaka bawu.
Bawu bakaka Polo mpe nataka yandi na mpimpa tii na mbanza Antipati.
32 Na kilumbu yina landaka,
basoda yina vwandaka ve na bampunda vutukaka na Yelusalemi na kisika ya basoda.
Bayina vwandaka na bampunda landaka nzyetolo kintwadi na Polo.
33 Ntangu bawu kumaka na mbanza Sezale,
bawu pesaka mukanda na mfumu ya kizunga,
mpe bikaka Polo na maboko ya yandi.
34 Mfumu ya kizunga tangaka mukanda,
mpe yufulaka Polo kizunga yina yandi katukaka.
Ntangu yandi zabaka ti Polo katukaka na Silisi,
35 yandi tubaka:
"Mu ke kuwa nge ntangu mifundi ya nge ke kwiza."
Na manima,
yandi pesaka muswa ya kukeba Polo na yinzo ya kimfumu yina mfumu Elode tungisaka.