Yesu belusaka kisadi ya mfumu mosi ya basoda ya Loma
7
Ntangu Yesu manisaka na kuzonza mambu nyonso yina na bantu yina vwandaka kuwa yandi,
yandi kwendaka na mbanza Kapenawume.
2 Mfumu mosi ya basoda nkama ya Loma vwandaka na mundongo mosi yina yandi vwandaka zola mingi.
Mundongo yina vwandaka na kimbevo,
mpe kumaka pene-pene na kufwa.
3 Ntangu yandi kuwaka nsangu ya Yesu,
yandi fidisaka mwa ndambu ya bakuluntu ya ba-Zwife na kulomba Yesu na kwiza kubelusa mundongo ya yandi.
4 Bawu kumaka na ntwala ya Yesu,
mpe bondilaka yandi mingi na kutuba:
"Ya me lunga ti nge sadisa muntu yina,
5 samu ti yandi ke zolaka bantu ya yinsi ya beto,
mpe ni yandi tungisaka yinzo ya beto ya lusambulu."
6 Na yina,
Yesu kwendaka na bawu.
Ntangu yandi kumaka pene-pene ya yinzo ya mfumu ya basoda nkama,
mfumu yina fidisaka bandiku ya yandi na kuzabisa Yesu:
"Mfumu,
bika kwandi na kutala mpasi!
Mu kele ve ya kulunga na kuyamba nge na yinzo ya munu.
7 Ni yawu yina,
mu talaka ti mu kele ve ya kulunga na kwiza kutalana na ntwala ya nge.
Kasi tuba dyambu mosi,
mpe kisadi ya munu ke beluka,
8 samu ti munu mpe ke tumamaka na bamfumu ya munu,
mpe mu kele na basoda yina ke tumamaka na munu.
Kana mu tuba na mosi:
'Kwenda!
' yandi ke kwenda.
Kana mu tuba na ya nkaka:
'Kwiza!
' yandi ke kwiza,
mpe kana mu tuba na mundongo ya munu:
'Sala kisalu yayi!
' yandi ke sala yawu."
9 Ntangu Yesu kuwaka mambu yina,
yandi yitukaka mingi.
Yandi balukaka na sika ya bantu yina vwandaka landa yandi,
mpe tubaka:
"Ya tsyelika mu ke na kuzabisa beno,
ata na bantu ya yinsi ya Isayeli,
nabunu mu tala kiminu ya mutindu yayi!"
10 Bantu yina mfumu ya basoda fidisaka,
vutukaka na yinzo ya mfumu ya bawu,
mpe kutaka mundongo yina na mavimpi ya mbote.
Yesu vumbulaka na lufwa mwana ya mufwidi mosi ya kento
11 Na manima,
Yesu kwendaka na mbanza Nayi.
Bilandi* ya yandi mpe bantu mingi vwandaka landa yandi.
12 Kaka na ntangu yina yandi vwandaka kuma pene-pene na mwelo ya mbanza,
bantu vwandaka nata mvumbi ya ditoko mosi na ndyamu.
Ya vwandaka mwana kaka mosi ya mufwidi ya kento.
Bantu mingi ya mbanza vwandaka na mufwidi yina.
13 Ntangu Mfumu* talaka mufwidi yina,
yandi kumaka na kyadi ya kulutila,
mpe tubaka:
"Kudila ve!"
14 Yandi kwendaka pene-pene ya sanduku,
mpe simbaka yawu.
Bantu yina vwandaka nata yawu telamaka,
mpe Yesu tubaka:
"Ditoko,
mu ke na kutumisa nge:
Vumbuka!"
15 Muntu ya kufwa vwandaka mpe bandaka na kuzonza.
Yesu vutulaka yandi na mama ya yandi.
16 Bantu nyonso fulukaka na buzitu samu na Nzambi.
Bawu vwandaka kembisa Nzambi na kutuba:
"Mumbikudi* ya nene me kwiza na kati-kati ya beto!
Nzambi me kwiza kusadisa bantu ya yandi!"
17 Na kizunga nyonso ya Zude,
mpe na babwala yina vwandaka pene-pene na kizunga yina,
bantu kuwaka mambu yina Yesu salaka.
Bilandi ya Za Mubotiki
18 Bilandi* ya Za zabisaka Za mambu nyonso yina vwandaka luta.
Za bokilaka bilandi zole na kati ya bawu,
19 mpe fidisaka bawu na sika ya Mfumu* samu na kuyufula yandi:
"Nge kele muntu yina fwana kukwiza,
to beto fwana kuvingila muntu ya nkaka?"
20 Ntangu bawu kumaka na sika ya Yesu,
bawu zabisaka yandi:
"Za Mubotiki me fidisa beto samu na kuyufula nge:
'Nge kele muntu yina fwana kukwiza to beto fwana kuvingila muntu ya nkaka?' "
21 Kaka na ntangu yina,
Yesu belusaka bambevo mingi,
mpe bantu ya binama ya kufwa.
Yandi bingisaka bampeve ya yimbi yina vwandaka na bawu,
mpe zibulaka meso ya bampofo mingi.
22 Na manima,
yandi tubaka na bantu yina Za fidisaka:
"Beno kwenda kuzabisa Za mambu yina beno me tala mpe me kuwa:
bampofo ke na kutala,
bantu ya bifuuma na makulu ke na kutambula mbote,
bantu ya bwazi ke na kubeluka,
bantu ya makutu ya kufwa ke na kuwa,
bantu ya kufwa ke na kuvumbuka na lufwa,
mpe bamputu ke na kuwa Nsangu ya Mbote*.
23 Kyese na muntu yina ke bika ve na kusala kiminu ya yandi na munu!"
24 Ntangu bantu yina fidisaka Za vutukaka,
Yesu bandaka na kuzonzila Za na sika ya bantu yina vwandaka kuna.
Yandi tubaka:
"Yinki beno kwendaka tala na yinsi ya kuyuma?
Didyadya yina mupepe vwandaka ningisa?
25 Na yina,
yinki beno kwendaka tala?
Muntu yina lwataka bilele ya ntalu?
Ve,
samu ti bantu yina ke lwataka bilele ya ntalu,
mpe ke zingaka na kati ya bimvwama kele na bayinzo ya bantinu.
26 Kasi yinki kwandi beno kwendaka tala?
Mumbikudi*?
Ee,
ya tsyelika,
mu ke na kutubila beno,
yandi me lutila mumbikudi.
27 Ya tsyelika,
Za kele muntu yina Dibuku ya Nzambi ke na kutuba:
'Mu ke fidisa ntumwa* ya munu na ntwala ya nge samu na kuyidikila nge nzilaa.' "
28 Yesu tubaka dyaka:
"Mu ke na kutubila beno:
Na kati ya bantu nyonso ya yinza,
ata muntu me lutila Za mfunu.
Kasi muntu ya nsuka na kati ya Kimfumu ya Nzambi* me lutila yandi mfunu.
29 Bantu nyonso mpe bilokoti-mpaku kuwaka yandi.
Bawu zabaka ti Nzambi kele ya kudedama*,
mpe bawu ndimaka ti Za botika bawu.
30 Kasi ba-Falisye* mpe milongisi ya Misiku* ndimaka ve mambu yina Nzambi zolaka samu na bawu,
mpe bawu mangaka ti Za botika bawu."
31 Yesu tubaka dyaka:
Na nani mu lenda kufwanikisa bantu ya ntangu yayi?
Na nani bawu me fwanana?
32 Bawu me fwanana na bana ya fyoti yina kele ya kuvwanda na kisika yina bantu mingi ke yonzamaka,
mpe bawu ke na kulooka na bampangi na kutuba:
"Beto me sika miziiki na dituutu samu na beno,
kasi beno me bina ve.
Beto me yimba nzimbu ya lufwa,
kasi beno me dila ve!"
33 Ya tsyelika,
Za Mubotiki kwizaka.
Yandi vwandaka kudya ve mampa mpe vwandaka kunwa ve vinu.
Na yina beno tubaka:
"Yandi ke na mpeve ya yimbi!"
34 Mwana ya Muntu* me kwiza.
Yandi ke na kudya mpe kunwa,
mpe beno ke na kutuba:
"Muntu yayi ke na kubanza kaka na kudya mpe kunwa malafu.
Yandi kele ndiku ya bilokoti-mpaku mpe ya misumuki!"
35 Kasi ndwenga ya Nzambi ke talanaka ya kudedama na bantu nyonso yina ke ndimaka yawu.
Yesu na kati ya yinzo ya Falisye mosi na nkumbu Simoni
36 Falisye mosi bokilaka Yesu na kwenda kudya na yinzo ya yandi.
Yesu kwendaka na yinzo ya muntu yina,
mpe vwandaka na mesa.
37 Na kati ya mbanza yina vwandaka na musumuki mosi ya kento.
Ntangu yandi kuwaka ti Yesu vwandaka kudya na yinzo ya Falisye yina,
yandi nataka kitutu ya alabatib ya kufuluka na mananasi.
38 Yandi kwendaka vwanda na manima pene-pene na makulu ya Yesu.
Yandi vwandaka dila,
mpe bolisaka makulu ya Yesu na mansangasa.
Na manima,
yandi kusunaka yawu na bansuki ya yandi.
Yandi fibaka yawu mpe tulaka yawu mananasi.
39 Ntangu Falisye yina bokilaka Yesu talaka mutindu yina,
yandi tubaka na kati ya ntima ya yandi:
"Kana muntu yayi vwandaka ya tsyelika mumbikudi*,
yandi zolaka zaba nani kele kento yina ke na kusimba yandi.
Yandi zolaka zaba ti yandi kele kento ya masumu."
40 Na yina,
Yesu bakaka kinzonzi,
mpe tubilaka yandi:
"Simoni!
Mu ke na dyambu ya kuzabisa nge."
Simoni vutulaka:
"Zonza ya nge,
Mulongisi."
41 Yesu tubaka:
"Bantu zole defaka mbongo na sika ya kidefisi-mbongo.
Mosi defaka mbongo nkama tanu ya bisengo,
mpe ya nkaka mbongo makumi tanu ya bisengo.
42 Mutindu bawu vwandaka ve na mbongo ya kufuta mfuka ya bawu,
yandi katulaka bawu mfuka nyonso.
Nani na bawu zole ke lutila na kuzola yandi?"
43 Simoni vutulaka:
"Mu banza ti muntu yina yandi me katula mfuka ya kulutila nene."
Yesu zabisaka yandi:
"Nge me zonza mbote."
44 Na manima,
Yesu balukaka na sika ya kento yina,
mpe tubaka na Simoni:
"Nge me tala kento yayi?
Mu me kota na yinzo ya nge,
mpe nge me pesa munu ve maza ya kusukula makulu.
Kasi yandi me bolisa makulu ya munu na mansangasa ya yandi,
mpe me kusuna yawu na bansuki ya yandi.
45 Nge me fiba munu ve.
Kasi yandi me bika ve na kufiba makulu ya munu katuka ntangu yina mu kotaka na yinzo ya nge.
46 Nge me tula munu ve mafuta na yintu.
Kasi yandi me pakula munu mananasi na makulu.
47 Ni yawu yina,
mu ke na kuzabisa nge:
Yandi me kuzwa mulemvo ya masumu mingi samu ti yandi me lakisa luzolo ya nene.
Muntu yina ba ke lemvokila fyoti,
ke lakisa luzolo ya fyoti."