Zonase 1

Zonase

Zonase ke na kusosa kukima Nzambi

Kilumbu mosi, Mambu ya *Yave wakanaka na sika ya Zonase, mwana ya Amitayi: 2 «Telema, kwenda na Ninive yina kele mbanza ya nene. Zabisa bantu ya mbanza yina ti kitumbu ke na kuvingila bawu samu ti mu me tala wapi mutindu kele mavanga ya bawu ya yimbi.» 3 Zonase telamaka kasi samu na kukima na mbanza Talesi, ntama na Yave. Yandi kwendaka na mbanza Zafa sika yandi talaka masuwa yina vwandaka kwenda na mbanza Talesi. Yandi futaka tike mpe kwendaka kota na masuwa na binati masuwa samu na kukwenda na Talesi, ntama na Yave.

4 Kasi Yave fidisaka mupepe ya ngolo na *mubu, mpe Kitembo lutilaka ngolo. Na yina, masuwa vwandaka sosa na kumwangana. 5 Bisadi ya masuwa kumaka na boma mingi, mpe konso muntu vwandaka lomba lusalusu na nzambi ya yandi na ndinga ya ngolo. Bawu losaka bifunda na mubu samu na kukatula dema na masuwa. Na ntangu yina, Zonase vwandaka me kulumukaka na kisika ya yisi na kati ya masuwa mpe vwandaka lala pongi ya ngolo. 6 Mfumu ya binati masuwa kwendaka pene-pene ya yandi mpe tubaka: «Samu na yinki nge ke na kulala? Telama mpe lomba lusalusu na nzambi ya nge! Yandi lenda kufwila beto kyadi mpe sala ti beto kufwa ve.» 7 Na manima, bisadi ya masuwa vwandaka tuba bawu na bawu: «Beto bula dzeke samu na kuzaba nani me natina beto mpasi yayi.» Bawu bulaka dzeke mpe yawu lakisaka Zonase. 8 Na yina, bawu tubilaka yandi: «Zabisa beto nani me natina beto mpasi yayi. Yinki nge ke salaka? Wapi sika nge me katuka? Nge kele muntu ya wapi yinsi mpe ya wapi dikanda?» 9 Zonase vutulaka: «Mu kele mu-Ebeleyo mpe ni Yave mu ke zitisaka, Nzambi ya mazulu yina yidikaka mubu mpe ntoto.» 10 Na manima, yandi zabisaka bawu mambu ya yandi. Bisadi ya masuwa kumaka na boma mingi ntangu bawu kuwaka ti Zonase vwandaka kima Yave na yinsi ya ntama. Bawu yufulaka yandi: « Samu na yinki nge me sala mutindu yina?» 11 Na ntangu yina, bimpo ya maza vwandaka lutila na kunanguka na ngolo. Na yina, bawu yufulaka yandi: «Yinki beto fwana kusala nge samu ti mubu dingama na beto?» 12 Zonase pesaka bawu mvutu yayi: «Beno baka munu, beno losa munu na mubu mpe mubu ke dingama na beno. Ya tsyelika, mu zaba ti kitembo ya ngolo yayi ke na kukwamisa beno samu na munu.» 13 Bisadi ya masuwa vwandaka meka na kunata masuwa na simu, kasi bawu lendaka ve samu ti bimpo ya maza vwandaka tatamana na kunanguka na ngolo nyonso. 14 Na yina, bawu lombaka lusalusu na Yave mutindu yayi: «Oo, Yave, kutala ve ti beto kufwa samu na muntu yayi. Mpe, kutula ve menga ya muntu yina me sala beto ata kima na zulu ya bayintu ya beto. Ni nge mosi, Yave, me sala mutindu nge zola.» 15 Na manima, bawu bakaka Zonase mpe losaka yandi na mubu, mpe yawu dingamaka. 16 Na yina, bawu kumaka na boma mingi ya Yave, bawu pesaka yandi munkayulu, mpe bawu salaka bansilulu.