Amose
Nkotolo
Kisalu ya kubikula vwandaka ve kisalu ya Amose. Kasi Nzambi bokilaka yandi na kusamuna mambu ya yandi. Amose bikaka mbanza ya yandi kuna na yinsi ya kintinu ya Yuda mpe yandi kwendaka longa bantu ya yinsi ya kintinu ya node. Ya vwandaka ntangu mosi ya ntomosono, mpe yinsi nyonso ya kintinu ya node vwandaka na kati ya kizunu. Kasi yawu vwandaka mpe ntangu yina ludedomo vwandaka salama mbote ve. Bamvwama vwandaka kwamisa mpe kunyokola bamputu. Na kati ya bazandu, bantu vwandaka sadila bitezolo ya luvunu na bipezolo ya luvunu. Banganga-Nzambi vwandaka ve na kati ya butyelika. Bantu nyonso vwandaka na lukwikulu mingi samu na bawu mosi, ni yawu yina bawu vwandaka vingila kilumbu ya Yave na nsayi nyonso.
Kasi Amose zabisaka bawu mambu yina bawu vwandaka banza ve. Yandi lombaka na bantu na kusoba. Yandi lombaka bawu na kusadila mambu ya kudedama (Am.5.24), kasi kukangama kaka ve na mikembo mpe minkayulu ya bawu.
Dibuku yayi lenda kukabuka na bandambu tatu. Ndambu ya ntete ni nkotolo (Am.1-2). Ndambu ya zole ni mambu ya mfundusu (Am.3-6). Ndambu ya tatu ni balumoni (Am.7-9).
Dibuku yayi kele ya kukabuka mutindu yayi:
-Yave ke pesa kitumbu na Isayeli mpe bayinsi yina kele pene-pene na yandi (Am. 1.1-3.2)
-Yave ke fundisa Isayeli na Samaliya (Am. 3.3-6.14)
-Amose me kuzwa balumoni tanu (Am. 7.1-9.6)
-Isayeli ke katuka na mpasi (Am. 9.7-15)