Ezekyele 45

Ntoto yina ba kubikaka samu na Yave

Ntangu beno ke kabula mvwilu na bifumba nyonso ya Isayeli na kubula dzeke, beno ke bika ndambu ya ntoto, yinda ya yawu ke vwanda mafunda kumi na zole na bankama tanu ya bametele (12500), nene ya yawu ke vwanda mafunda tanu ya bametele (5000). Ntoto nyonso yina ke vwanda ya longo. 2 Na kati ya ntoto yina, beno ke bika mwa ntoto samu na Yinzo ya Yave. Yinda ya yawu ke vwanda bankama zole na makumi tanu ya bametele (250) na balweka nyonso, ba ke bika dyaka mwa kisika ya mpamba yina ke vwanda yinda ya makumi zole na tanu ya bametele na balweka nyonso. 3 Na kisika yina beno ke pesa ya Yave, yawu ke vwanda na bametele mafunda kumi na zole na bankama tanu (12500) na yinda ya yawu, mpe nene ya yawu ke vwanda mafunda tanu ya bametele (5000). Ni na kisika yina ba ke tunga Yinzo, kisika ya longo ya kulutila. 4 Mwa ntoto yina ke bikana, yawu ke vwanda ya kubyekwa. Yawu ke vwanda ya banganga-Nzambi, bayina ke salaka na kati ya kisika ya longo, bawu yina ke belamaka na ntwala ya Yave samu na kusadila yandi. Ni kuna bawu ke kuzwa ntoto samu na kutunga bayinzo ya bawu, mpe ni na ntoto yina ke vwanda kisika ya longo. 5 Mpe kaka kuna, ya ke vwanda na kisika ya mafunda kumi na zole na bankama tanu (12500) na yinda ya yawu mpe nene ya yawu ke vwanda mafunda tanu (5000) ya bametele. Yawu ke vwanda kisika ya ba-Levite yina ke salaka na Yinzo ya Yave. Yawu ke vwanda na makumi zole ya bivinga. 6 Na yinda nyonso ya ntoto yina ba ke pesa na Yave, beno ke teza mafunda makumi na zole na tanu ya bametele (2500) na nene ya yawu mpe yinda ya yawu ke vwanda mafunda kumi na zole na bankama tanu ya bametele (12500). Kisika yina ke vwanda ya dikanda nyonso ya Isayeli. 7 Samu na mfumu, beno ke bika bisika zole, mosi na konso lweka ya kisika ya longo. Yinda ya kisika mosi ke vwanda mutindu ya konso kisika ya bifumba ya Isayeli, Yawu ke banda na ndilu ya wesete tii na ndilu ya esete. 8 Ni yina ke vwanda ntoto ya yandi, bamfumu ke nyokola dyaka ve bantu ya munu. Bawu ke pesa yinsi na dikanda ya Isayeli, mutindu kele bifumba ya bawu.

Luve ya mfumu mpe yina yandi fwana kusala

9 Yave ke na kutuba: Ya me lunga! Beno bika kumwangisa mpe kusala yimbi, beno sadila mambu ya kulunga mpe ludedomo, beno bika kubingisa bantu ya munu na ntoto ya bawu. Ni Yave Mfumu me tuba yawu. 10 Beno vwanda na bipezolo ya kulunga, efa ya kulunga samu na kuteza bambuma, bate ya kulunga samu na kuteza bima yina kele mutindu maza. 11 Efa na bate ke vwanda mutindu mosi, efa mosi ke sala balitele makumi zole na zole, bate ke vwanda kikunku mosi na kati ya kumi ya kipezolo yina ba ke bokilaka omele+ \fr 45.11 \fq omele \ft omele mosi kele makumi zole ya bankama na makumi zole ya balitele . 12 Sikele mosi ya mbongo ya kisengo ke vwanda na makumi zole ya bangela mpe mine ke vwanda na makumi sambanu ya mbongo ya bisengo+ \fr 45.12 \ft sikele mosi kele kumi ya bangalame, mine mosi kele makumi sambanu ya basikele, ngela mosi kele 0,55 ya bangalame . 13 Yayi ni mutindu beno ke pesila makabu ya beno, samu na bambuma ya faline mpe oloze beno ke pesa kikunku mosi na kati ya bikunku sambanu ya bambuma ya beno ya bilanga. 14 Samu na mafuta, bate mosi ya mafuta, ke vwanda dime ya omele, samu ti babate kumi kele omele mosi. 15 Na kati ya bankama zole ya bibulu, beno ke baka dimeme mosi to nkombo mosi na bibulu ya Isayeli, ni yawu beno ke bwela na minkayulu ya madya ya bilanga, minkayulu ya kuyoka mpe minkayulu ya kintwadi samu na mulemvo ya masumu ya bantu yina ke pesa bima yina. Ni Yave Mfumu me tuba yawu. 16 Bantu nyonso ya Isayeli ke nata bima nyonso yina na sika ya mfumu ya Isayeli. 17 Ni mfumu ke vwanda na kiyeko ya kupesaka bima samu na minkayulu ya kuyoka na minkayulu ya madya ya bilanga, samu na mikembo, mikembo ya bilumbu ya ntete ya ngonda mpe samu na basaba mpe samu na bambwabanu ya mikembo ya dikanda ya Isayeli. Ni mfumu ke pesa bima yina samu na minkayulu ya madya ya bilanga, minkayulu ya kuyoka mpe samu na minkayulu ya kintwadi samu na mulemvo ya masumu ya dikanda ya Isayeli.

Bantumunu samu na minkembo mpe minkayulu

18 Yave ke na kutuba: Na kilumbu ya ntete ya ngonda ya ntete, ba ke baka ngombe mosi ya mbakala yina kele ve na kifuma, ba ke pesa yawu mutindu munkayulu samu na kuvedisa Yinzo ya Yave. 19 Nganga-Nzambi ke baka menga ya kibulu yina ba ke pesa samu na munkayulu ya mulemvo, yandi ke tula menga yina na makunzi ya mwelo ya Yinzo ya Yave. Yandi ke tula mpe menga na balweka yiya yina kele na yisi ya kiyokolo ya minkayulu. Yandi ke tula menga na makunzi ya ngaanda ya kati ya Yinzo ya Yave. 20 Nganga-Nzambi ke sala mutindu mosi na kilumbu ya nsambwadi ya ngonda ya ntete samu na muntu yina me kanisa ve na kusumuka, mpe samu na muntu yina me sumuka kondwa kuzaba. Beno ke vedisa mpe Yinzo ya Yave. 21 Na kilumbu ya kumi na yiya ya ngonda ya ntete, beno ke kembila mukembo ya Paki. Yawu ke zingila bilumbu sambwadi, beno ke kudya mampa yina kele ve na levule. 22 Kilumbu yango, mfumu ke pesa munkayulu ya ngombe ya mbakala, munkayulu samu na mulemvo ya masumu samu na yandi mpe samu na bantu nyonso ya yinsi. 23 Na kati ya bilumbu nsambwadi ya mukembo, konso kilumbu mfumu ke pesa na Yave munkayulu ya kuyoka ya bangombe nsambwadi ya mbakala, mpe mameme ya mbakala nsambwadi yina kele ve na kifuma mpe munkayulu ya nkombo mosi samu na mulemvo ya masumu, konso kilumbu. 24 Yandi ke vukisa na konso ngombe ya mbakala mpe na konso dimeme ya mbakala, bakilo kumi na tanu ya bambuma ya faline na balitele tatu na ndambu ya mafuta. 25 Na kilumbu ya kumi na tanu, na ngonda ya nsambwadi, na mukembo yina, mpe na bilumbu nsambwadi, mfumu ke pesa minkayulu mutindu mosi, minkayulu ya mulemvo ya masumu, minkayulu ya kuyoka, minkayulu ya madya ya bilanga, mpe mutindu mosi samu na mafuta.