Ezekyele
Nkotolo
Ezekyele vwandaka mumbikudi, yandi vwandaka mpe nganga-Nzambi, nkumbu ya yandi zola kutuba ti "Yave ke kindisaka". Yandi vwandaka zinga kintwadi na bantu ya Isayeli, yina ba bakaka mpe ba nataka na ngolo kuna na Babilone na mvula ya makumi tanu na bankama yivwa na nsambwadi (597) ntete Yesu-Klisto kubutuka. Yandi salaka kisalu ya bumbikudi na bamvula makumi zole na zole. Yandi vwandaka zonzila na yina me tadila bantu yina vwandaka na Babilone mpe bayina bikanaka kuna na Yelusalemi. Yandi vwandaka bikula ntete ba mwangisa Yelusalemi na yinsi ya Yuda mpe na manima ya kumwangisa Yelusalemi. Mambu mpe balumoni ya yandi ke na kuzonzila mfundusu, kivuvu, kutunga dyaka yinsi mpe samu ti bantu kusoba bantima ya bawu. Mutindu Yave tubaka yawu: «Mu ke pesa beno ntima ya malu-malu mpe Mpeve ya malu-malu, mu ke katula na beno, ntima ya ngolo yina kele mutindu ditadi, mu ke pesa beno ntima ya musuni» (Eze. 36:26).
Dibuku yayi ya Ezekyele kele ya kukabuka na bandambu tanu.
Na ndambu ya ntete (Eze. 1-3), Ezekyele me kuzwa lumoni ya Yave mpe Yave me bokila yandi na kuvwanda mumbikudi.
Na ndambu ya zole (Eze. 4-24), Ezekyeke me samuna mambu mingi ya mpasi samu na bantu ya Yuda. Bawu ke kuzwa kitumbu samu ti bawu me tumama ve na Yave.
Na ndambu ya tatu (Eze. 25-32), Ezekyele ke na kutuba na bayinsi yina kele pene-pene na bantu ya Yuda mpe yandi ke na kuzabisa bawu na yina me tadila mfundusu ya Yave.
Na ndambu ya yiya (Eze. 33-39), Ezekyele me kuwa yimeni ti ba me zunga Yelusalemi, na mbala yayi bambikululu ke kindisa bantu. Yave ke lemvokila bantu ya yandi. Yave ke nunga bambeni ya Isayeli na ya Yuda mpe yandi ke vutula bawu na yinsi ya bawu.
Na ndambu ya tanu (Eze. 40-48), yawu ke na kuzonzila lumoni yina Ezekyele kuzwaka na yina me tadila Yinzo ya malu-malu ya Yave. Ezekyele vwandaka na kiminu ya kulutila, mambu yina yandi vwandaka zonzila, yandi vwandaka kuzwa yawu na balumoni mpe na bidimbu. Ntangu Yave vwandaka tuba na Ezekyele, yandi vwandaka bokila yandi ''mwana ya muntu''. Na dibuku yayi, Mpeve ya Yave ke na kubaka kisika ya mfunu mingi, Mpeve zola mpe kutuba mupepe, kiwumunu. Mambu yina Ezekyele vwandaka tuba, yandi vwandaka tatamana na kulomba na bantu na kusoba bantima ya bawu. Yandi vwandaka tuba na bawu ti, konso muntu ke kuzwa kitumbu samu na masumu ya yandi. Kasi Yave ke pesa luzingu ya malu-malu na bantu ya yandi.
Dibuku yayi lenda kukabuka mutindu yayi:
Yave bokilaka Ezekyele (Eze. 1-3 )
Yelusalemi mpe yinsi ya Yuda ke mwangana (Eze. 4-24)
Yave ke fundisa bayinsi ya nkaka (Eze. 25-32)
Yave me pesa bansilulu na bantu ya yandi na kutunga dyaka yinsi (Eze. 33-37)
Ba ke nunga Ngonge (Eze. 38-39)
Yave ke bongisa dyaka Yinzo ya yandi mpe yinsi (Eze. 40-48)