Nzambi ya moyo mpe biteki
10
Bantu ya Isayeli, beno kuwa mambu yina Yave ke na kutuba na yina me tadila beno. 2 Yandi ke na kutuba:«Beno longoka ve bifu ya makanda ya nkaka ya bantu.
Beno kuvwanda ve na boma ya bidimbu yina ke talanaka na zulu.
Ni makanda ya nkaka ya bantu ke vwandaka na boma ya yawu.
3 Bansalulu ya bantu yina ke kaka ya mpamba.
Bawu ke zengaka bayinti na kati ya nfinda,
mpe bisadi-biteki ke yidikaka biteki na yawu na bisalulu ya bawu.
4 Ba ke pakulaka yawu wolo mpe palata.
Ba ke komaka yawu bansonso na bikonkoto
samu ti yawu kutelama mbote.
5 Banzambi yango ya biteki kele mutindu diba ya palata ya ngolo.
Bawu ke zonzaka ve.
Ba fwana kunangunaka bawu,
samu ti bawu mosi ba ke tambulaka ve.
Beno tala bawu boma ve,
bawu lenda sala beno yimbi ve.
Kasi ba lenda mpe kusadila beno ata dyambu mosi ya mbote.»
6 Yave, ata muntu kele mutindu nge.
Nge kele Nzambi ya nene,
Nkumbu ya nge kele nsangu samu na lulendo ya nge.
7 Nge ntinu ya makanda ya bantu,
nani lenda kuzitisa nge ve?
Yawu me lunga na nge.
Na bantu nyonso ya ndwenga
yina kele na kati ya makanda ya bantu,
mpe na kati ya bayinsi nyonso ya bintinu,
ata mosi me fwanana na nge.
8 Bawu nyonso ke kaka bizoba ya mpamba.
Ndongosolo yina ba lenda kuzwa
na banzambi ya bawu ya biteki kele kaka ya mpamba.
9 Biteki yango, ba ke bongisaka yawu
na palata yina ke katukaka na Talesise,
mpe na wolo yina ke katukaka na Wufaze.
Ni bisadi-biteki ke salaka yawu.
Ni maboko ya bisadi-wolo ke yidikaka yawu.
Ba ke lwatisaka yawu lele ya ntinta ya bule mpe ya mbwaki.
Kaka ni bantu ya bisalu ya maboko ke yidikaka yawu.
10 Kasi Yave Nzambi kele Nzambi ya tsyelika.
Yandi kele Nzambi ya moyo, ntinu ya bantangu nyonso.
Na ntangu yandi ke dasukaka, ntoto ke ninganaka
mpe makanda ya bantu ke lendaka ve na kuvibidila na nkele ya yandi.
11 Beno ke zabisa bawu mutindu yayi: Binzambi-nzambi yina yidikaka ve zulu na ntoto, yawu ke zimbana na yinza nyonso, yawu ke vwanda dyaka ve awa na ntoto.
12 Nzambi yidikaka ntoto na lulendo ya yandi.
Yandi yidikaka yinza na ndwenga ya yandi.
Yandi yidikaka dizulu na mayela ya yandi.
13 Ntangu yandi ke wakisaka ndinga ya yandi,
maza ke kutakanaka na zulu.
Yandi ke salaka matuti ya nene na nsuka ya ntoto.
Yandi ke basisaka balusyemo samu na kunokisa mvula.
Yandi ke basisaka mipepe na biswekolo ya yawu.
14 Bawu nyonso me kuma na buzoba ya kulutila muntu ve lenda kubakula dyambu.
Konso kisadi-wolo ke vwanda na nsoni
samu na biteki yina yandi yidikaka,
samu ti biteki yango kele kwandi bima ya luvunu.
Yawu ke wumunaka ve.
15 Yawu kele bima ya buzoba.
Yawu ke lakisaka buzoba ya bayina yidikaka yawu.
Yawu ke zimbana na ntangu yina nsembolo ke kwizila bawu.
Yawu ke zimbana.
16 Kasi Nzambi yina kele kikunku ya bantu ya Yakobi kele ve mutindu biteki yina.
Ni yandi yidikaka bima nyonso.
Isayeli ni kifumba yina kele mvwilu ya yandi.
Nkumbu ya yandi kele: Yave, Nzambi ya Binwani.
Na mwa ntangu fyoti bampasi ya nene ke kuma
Yelemyawu
17 Yelusalemi, nge yina ba me zunga,
lokota bisaka ya nge na ntoto.
18 Samu ti Yave ke na kutuba mutindu yayi:
«Na mbala yayi, mu ke losa bantu yina ke zingaka na yinsi yayi na kizukumununu.
Mu ke bika bawu ve samu ti bawu kukima ve.»
Yelusalemi
Mputa ya munu ke beluka ve.
Munu mu vwandaka banza ti
mwa mpasi ya munu yayi mu ke vibidila yawu.
20 Kasi yinzo ya munu ya lele me mwangana.
Basinga ya yawu nyonso me zengana.
Bana ya munu me bika munu, bawu me kwenda.
Bana ya munu kele dyaka ve.
Ata muntu kele dyaka ve samu na
kutedimisa yinzo ya munu ya lele.
Ata muntu kele dyaka ve samu na
kuyidikila munu mwanza ya lele.»
Yelemya
21 Ya ke samu ti mivungi ke bazoba,
bawu vwandaka sosa ve Yave.
Ni yawu yina bawu ke na kulendaka dyaka ve,
mpe mameme nyonso ya bawu me mwangana.
22 Ya ke na kuwakana makelele mosi
yina ke na kubelama.
Kuningana ya nene me katuka na yinsi ya node,
yawu ke na kukwiza samu na kukitula
bambanza ya Yuda na bisika ya kukondwa bantu,
bisika yina ke yonzamaka bambulu.
Yelemya sambilaka samu na bantu ya yandi
23 Yave, mu zaba ti muntu kele ve mfumu ya nzila ya yandi,
muntu lenda kukitwadisa yandi mosi ve.
24 Yave, semba munu,
kasi kulutisa ndilu ve.
Kusemba munu ve na nkele ya nge.
Kana ve, nge ke bebisa munu nyonso.
25 Lakisa nkele ya nge na makanda ya bantu yina zaba nge ve,
bayina ke bokilaka ve nkumbu ya nge!
Samu ti bawu ke na kudya nyonso ya Yakobi,
bawu ke na kudya nyonso ya yandi.
Bawu ke na kumanisa na kufwa Yakobi,
bawu ke na kumwangisa yinsi ya yandi.