Binkuti ya banganga-Nzambi
28
«Na kati ya bantu ya Isayeli, baka pene-pene ya nge mpangi ya nge Aaloni na bana ya yandi Nadabe, Abiwu, Elazale na Itamale, samu ti bawu kusala kisalu ya bunganga-Nzambi. 2 Nge ke yidikila mpangi ya nge Aaloni binkuti ya longo mutindu bidimbu ya nkembo mpe ya bumfumu. 3 Nge ke zonza na bantu nyonso ya mayela bayina mu me fulusa na mpeve ya ndwenga. Bawu ke yidika binkuti yina Aaloni ke lwata na ntangu ba ke byeka yandi, samu ti yandi kusala kisalu ya bunganga-Nzambi samu na munu. 4 Binkuti yina ba ke yidika ni yayi: peketolale, efode, dizwela, kiyunga ya kutunga na maboko, yimpu ya kinganga-Nzambi mpe mukaba. Ba ke yidika binkuti ya longo samu na mpangi ya nge Aaloni mpe samu na bana ya yandi. Bawu ke banda na kulwataka yawu, samu na kusala kisalu ya bunganga-Nzambi samu na munu. 5 Bayina ke tunga yawu na maboko ke sadila basinga ya wolo ya lino ya mwa mbwaki, ya mbwaki, ya mbwaki ya kulutila mpe lino ya mbote.»Efode
6 «Ba ke yidika efode. Ba ke yidikila yawu na basinga ya wolo, na lino ya mwa mbwaki, ya mbwaki, ya mbwaki ya kulutila, mpe na lino ya mbote. Ya ke vwanda kisalu ya bantu yina ke salaka yawu na bunkete nyonso. 7 Efode yango ke vwanda na basinga zole ya magembo, ya kutungama na balweka ya yawu. Ni basinga yina ke vukisa bitini zole ya efode. 8 Mukaba yina ke vwanda na zulu ya efode ke vwanda kaka kima mosi na efode. Yawu mpe ke vwanda mutindu yayi: basinga ya wolo ya lino ya mwa mbwaki, ya mbwaki, ya mbwaki ya kulutila, mpe ya lino ya mbote. 9 Nge ke baka matadi zole ya ntalu yina ba ke bokilaka onise mpe na zulu ya yawu, nge ke sonika bankumbu ya bana ya Yakobi. 10 Bankumbu nnsambwadi ke vwanda na zulu ya ditadi ya ntete, bankumbu nnsambwadi ya nkaka na zulu ya ditadi ya zole mutindu kele mbutukulu ya bawu. 11 Nge ke sonika bankumbu ya bana ya Yakobi na zulu ya matadi nyonso zole. Yawu ke vwanda kisalu ya muntu yina ke sadilaka matadi ya ntalu. Yandi ke fikula yawu mutindu ba ke yidikaka kinyemo. Nge ke tula matadi yango na kati ya bisimbulu ya wolo. 12 Nge ke tula matadi nyonso zole na basinga ya magembo ya efode, samu na kusala kidimbu ya bifumba kumi na zole ya bana ya Isayeli. Na yina Aaloni ke nata bankumbu ya bawu na zulu ya magembo ya yandi, na mantwala ya munu Yave, samu ti mu kubambukilaka bawu moyo. 13 Ntangu nge ke yidika bisimbulu yango ya wolo, 14 nge ke yidikila yawu mwa bampanga zole ya wolo ya mbote. Nge ke yidika yawu mutindu ba ke kangaka bansuki ya maboko. Nge ke kanga mwa bampanga yina na bisimbulu yango.»
peketolale
15 «Nge ke yidika peketolale ya lufundusu. Yawu ke vwanda kisalu ya bantu yina ke salaka yawu na bunkete nyonso. Nge ke yidika peketolale kaka mutindu mosi na efode: na basinga ya wolo ya lino ya mwa mbwaki, ya mbwaki, ya mbwaki ya kulutila mpe ya lino ya mbote. 16 Ntangu ba ke futika yawu, balweka ya yawu nyonso ke vwanda mutindu mosi. Basantimetele makumi zole na tanu na konso lweka. 17 Nge ke kotisa na kati ya peketolale, matadi ya ntalu na milonga yiya. Mulonga ya ntete: saledwane, topaze mpe emelode. 18 Mulonga ya zole: esekalebukele, lazulite mpe zasepe. 19 Mulonga ya tatu: opale, angate, mpe ametisete. 20 Mulonga ya yiya: klizolite, onise mpe zasepe. Matadi nyonso yina ke vwanda na kati ya bisimbulu ya yawu ya wolo. 21 Nge ke sonika na zulu ya konso ditadi, nkumbu ya mosi na mosi ya bana kumi na zole ya Yakobi. Ya ke vwanda ya kusonama mutindu kinyemo. Konso ditadi ke vwanda na nkumbu mosi ya kifumba na kati ya bifumba kumi na zole ya Isayeli.
22 Nge ke yidika mwa bampanga ya wolo ya mbote samu na peketolale. Nge ke yidika yawu mutindu ba ke kangaka bansuki ya maboko. 23 Nge ke yidika milunga zole ya wolo na samu peketolale. Nge ke tula yawu na bansongi zole ya peketolale. 24 Nge ke kanga mwa bampanga zole yina ya wolo na milunga zole na bansongi ya peketolale. 25 Nge ke kanga mpe bansongi nyonso zole ya nkaka ya mwa bampanga yango na bisimbulu yina kele na basinga ya magembo ya efode, na mantwala. 26 Nge ke yidika dyaka milunga zole ya wolo. Nge ke tula yawu na bansongi zole ya nkaka ya peketolale, na lweka ya kati yina ke vukanaka na efode. 27 Nge ke yidika dyaka milunga zole ya wolo. Nge ke tula yawu na yisi ya basinga ya magembo ya efode, na mantwala, pene-pene ya kisika yina ba tungaka yawu. Milunga yango ke vwanda na zulu ya mukaba ya efode. 28 Ba ke kanga milunga ya peketolale mpe milunga ya efode na singa ya mwa mbwaki, samu na kukanga peketolale na mukaba ya efode. Na yina, peketolale ke katuka ve na kisika ya yawu.
29 Konso ntangu yina Aaloni ke banda na kukotaka na kivinga ya longo, yandi ke lwata na ntulu ya yandi, bankumbu ya bana ya Yakobi yina kele ya kusonama na peketolale ya lufundusu. Yawu ke vwanda kidimbu ya kubambukilaka bawu moyo konso ntangu, na mantwala ya munu Yave. 30 Na kati ya peketolale ya lufundusu+ \fr 28.30 \fq peketolale ya lufundusu \ft , nge ke tula bima ya longo yina ba ke bokilaka Ulime mpe Tumimeb. Yawu ke vwanda na ntulu ya Aaloni ntangu yandi ke banda kwizaka na mantwala ya munu Yave. Bantangu nyonso, Aaloni ke lwata na ntulu ya yandi bima yina yandi ke sadila samu na kuzaba luzolo ya munu Yave, samu na bana ya Yakobi.»
Binkuti ya nkaka ya longo
31 «Nge ke yidika dizwela. Ni na zulu ya yawu nganga-Nzambi ke lwatila efode. Dizwela nyonso ke vwanda ya mwa mbwaki. 32 Yawu ke vwanda na dibulu na kati-kati samu na kukotisaka yintu. Ba ke futika bandilu ya dibulu yango mpe kutunga yawu. Ya ke vwanda kisalu ya muntu yina ke yidikaka balele na singa. Yandi ke tunga yawu mbote-mbote samu ti yawu kupasuka ve. 33 Na ndilu ya yisi ya dizwela, nge ke sala bifwani ya bambuma ya ngelenadine, ya mwa mbwaki, ya mbwaki mpe ya mbwaki ya kulutila. Na kati-kati ya bambuma yina, nge ke tula mwa bangunga ya wolo, na ndilu nyonso ya yisi ya dizwela. 34 Mwa ngunga mosi ya wolo, kifwani ya mbuma mosi ya ngelenadine. Mwa ngunga mosi ya wolo, kifwani ya mbuma mosi ya ngelenadine. Ni mutindu yina nge ke sala na ndilu nyonso ya yisi ya dizwela. 35 Aaloni ke lwata dizwela yina, samu na kusala kisalu ya yandi ya bunganga-Nzambi. Ba ke kuwa makelele ya bangunga ntangu yandi ke kota na kivinga ya longo, na mantwala ya munu Yave, mpe na ntangu yandi ke basika. Na yina, yandi ke kufwa ve.
36 Nge ke yidika mwa kisengo ya wolo ya mbote. Nge ke sonika na zulu ya yawu mutindu ba ke salaka na kinyemo, mutindu yayi: "Ya kubyekwa na Yave". 37 Nge ke sadila singa ya mwa mbwaki na kukanga mwa kisengo yango na yimpu ya kinganga-Nzambi, na mbunzu. 38 Yawu ke vwanda na mbunzu ya Aaloni. Na yina, Aaloni ke nata yimbi yina bana ya Isayeli ke sala ntangu bawu ke pesa munu minkayulu mpe na yina me tadila bima nyonso ya longo yina ba ke pesa. Mwa kisengo yina ke banda vwandaka kaka na mbunzu ya yandi na mantwala ya munu, samu ti mu ndima yawu.
39 Nge ke yidikila Aaloni kinkuti ya lino. Nge ke yidika yimpu ya kinganga-Nzambi ya lino. Nge ke yidika mpe mukaba ya lino. Ya ke vwanda kisalu ya muntu yina ke tungaka mbote na maboko.
40 Samu na bana ya Aaloni, nge ke yidikila bawu mpe binkuti. Nge ke yidikila bawu mikaba, na bayimpu ya banganga-Nzambi, bidimbu ya nkembo mpe ya bumfumu.
41 Nge ke lwatisa yawu mpangi ya nge Aaloni na bana ya yandi. Nge ke dukula bawu mafuta, nge ke pesa bawu luve ya kusadila munu. Ni mutindu yina nge ke byeka bawu mpe bawu ke sadila munu kisalu ya bunganga-Nzambi. 42 Nge ke yidikila bawu bakaleso samu na kubumba bimpene ya bawu. Bakaleso yango ke banda na luketo tii na mabunda. 43 Aaloni na bana ya yandi ke lwata yawu ntangu bawu ke kota na Yinzo ya Mbwabanu. Bawu ke lwata yawu mpe na ntangu yina bawu ke belama na kiyokolo ya minkayulu, samu na kusala kisalu ya bawu, na kivinga ya longo. Na yina, bawu ke sala ve yimbi mpe bawu ke kufwa ve. Ya ke vwanda ntumunu ya bantangu nyonso samu na Aaloni mpe samu na bambandu ya yandi yina ke kwiza.»