Kubasika 26

Yinzo ya longo

«Nge ke tunga Yinzo. Nge ke tungila yawu na balele kumi ya lino ya mbote. Nge ke vukisa yawu na mavunga ya mwa mbwaki, ya mbwaki mpe ya mbwaki ya kulutila. Nge ke tunga bakeluba na zulu ya balele yina. Yawu ke vwanda kisalu ya bantu yina ke salaka yawu na bunkete nyonso. 2 Yinda ya konso lele ke vwanda bametele kumi na yiya, mpe nene ya yawu ke vwanda bametele zole. Balele nyonso ke vwanda yinda mosi mpe nene mosi. 3 Balele tanu ke vwanda ya kuvukana. Balele tanu ya nkaka mpe ke vwanda ya kuvukana. 4 Nge ke kanga basinga ya lino ya mwa mbwaki na ndilu ya nsuka ya balele tanu ya ntete. Nge ke sala mpe mutindu mosi na ndilu ya ntete ya balele tanu ya nkaka. 5 Nge ke kanga basinga makumi tanu na ndilu ya nsuka ya balele tanu ya ntete. Nge ke kanga mpe basinga makumi tanu na ndilu ya nsuka ya balele tanu ya nkaka. Basinga nyonso ke talasana. 6 Nge ke yidika mwa bisengo makumi tanu ya wolo. Ni na mwa bisengo yina nge ke vukisila balele tanu ya ntete na balele tanu ya nkaka, mpe muludi nyonso ke vukana.

7 Nge ke tunga balele na mika ya bankombo samu na kufuka dyaka Yinzo yina. Nge ke sala yawu kumi na mosi. 8 Yinda ya konso lele ke vwanda bametele kumi na tanu, mpe nene ya yawu ke vwanda bametele zole. Balele nyonso ke vwanda yinda mosi mpe nene mosi. 9 Nge ke vukisa ntete balele tanu. Nge ke vukisa dyaka balele nnsambwadi yina ke bikana. Nge ke sala ti na lele ya nnsambwadi ndambu ya nkaka vwanda mutindu ya kubwa na mantwala ya Yinzo. 10 Nge ke tula basinga makumi tanu ya kukangila na ndilu ya nsuka ya balele tanu ya ntete. Nge ke tula mpe basinga makumi tanu na ndilu ya ntete ya balele nnsambwadi yina ke bikana. 11 Nge ke yidika makumi tanu ya kukangila ya mwa bisengo ya mbwaki. Ni na mwa bisengo yina nge ke kanga basinga samu na kuvukisa balele, mpe Yinzo nyonso ke vwanda ya kuvukana. 12 Balele ya muludi ke vwanda na yinda ya kulutila Yinzo na mwa ndambu. Ndambu ya balele ke kubwa na manima ya Yinzo. 13 Na yinda ya Yinzo, balele ya muludi ke lutila na metele mosi na konso lweka ya Yinzo samu na kufuka yawu. 14 Samu na kufuka dyaka Yinzo, nge ke sadila bampusu ya mameme ya mbakala yina nge ke tula tinta ya mbwaki. Nge ke tula dyaka bampusu ya mbisi ya nene ya mubu na zulu ya yawu.

15 Nge ke yidika mabaya ya yinti ya akasya samu na kusimba Yinzo. Mabaya yango ke vwanda ya kutelama mutindu kibaka. 16 Yinda ya dibaya mosi ke vwanda ya bametele tanu. Nene ya yawu ke vwanda ya basantimetele makumi nsambwadi na tanu. 17 Na yisi ya konso dibaya ke vwanda na bansongi zole ya kutelama mutindu mosi. Ni mutindu yina nge ke sala samu na mabaya nyonso ya Yinzo. 18 Na mabaya yina ya Yinzo, makumi zole ke vwanda na lweka ya sude ya Yinzo. 19 Nge ke yidika makumi yiya ya bisengo ya palata. Bisengo yina ke vwanda na yisi ya mabaya, samu na kukotisa bansongi nyonso zole ya dibaya. Ya ke vwanda bisengo zole na konso dibaya. 20 Na lweka ya nkaka ya Yinzo, lweka ya node, nge ke tula mpe mabaya makumi zole. 21 Nge ke yidika mpe makumi yiya ya bisengo ya palata. Ya ke vwanda bisengo zole na yisi ya konso dibaya. 22 Samu na manima ya Yinzo, na lweka ya wesete, nge ke sala mabaya nnsambwadi. 23 Nge ke bwela mabaya zole samu na bansongi ya manima ya Yinzo. 24 Mabaya nnsambwadi yina ke vwanda ya kuvukana na mabaya yina kele na bansongi kubanda na yisi tii na zulu. Nge ke sadila mulunga samu na kuvukisa yawu. Na bansongi nyonso zole, mabaya yango ke vwandila mutindu mosi. 25 Na yina, lutangu ya mabaya ke vwanda nana. Bisengo ya yawu ya palata ke vwanda kumi na nnsambwadi. Bisengo zole samu na yisi ya konso dibaya.

26 Nge ke yidika bayinti tanu ya akasya samu na kusimba mabaya ya mbanzi ya lweka mosi ya Yinzo. 27 Nge ke yidika bayinti tanu samu na kusimba mabaya ya mbanzi ya lweka ya nkaka ya Yinzo. Nge ke yidika bayinti tanu samu na mabaya ya manima ya Yinzo, na lweka ya wesete. 28 Yinti ya mfunu yina ke kota na kati ya mabaya, kubanda na dibaya ya nsongi ya manima tii na dibaya ya nsongi ya mantwala ya Yinzo. 29 Nge ke tula wolo na mabaya. Milunga yina ke yamba bayinti ya bambanzi ke vwanda ya wolo. Nge ke tula wolo na bayinti ya bambanzi. 30 Nge ke yidika Yinzo mutindu kele kifwani yina ba me lakisa nge yawu awa, na zulu ya mongo.

31 Nge ke yidika lele. Nge yidikila yawu na basinga ya lino ya mbote, ya mwa mbwaki, ya mbwaki mpe ya mbwaki ya kulutila. Nge ke tunga bakeluba na zulu ya yawu. Yawu ke vwanda kisalu ya bantu yina ke salaka yawu na bunkete nyonso. 32 Nge ke tula lele ya mwelo ya kulelama na makunzi ya akasya. Makunzi yango ke vwanda yiya mpe nge ke tula wolo na makunzi yina. Nge ke tula mwa bisimbulu ya wolo samu na kusimba lele. Makunzi ke vwanda ya kutelama na zulu ya bisengo yiya ya palata. 33 Lele yango ke vwanda ya kukangama na yisi ya mwa bisimbulu yina.

Ni kuna na manima ya lele nge ke tula sanduku ya ngwisani. Ni lele yina ke kabula kisika ya longo na kisika ya longo ya kulutila samu na beno. 34 Nge ke tula kitapu, kisika ya kupesilaka minkayulu ya menga, na zulu ya sanduku ya ngwisani, na kati ya kisika ya kulutila longo. 35 Nge ke tula mesa na kisika ya longo, na lweka ya node ya Yinzo. Kitentokolo ya minda ke vwanda na mantwala ya mesa, na lweka ya sude ya Yinzo.

36 Samu na mwelo ya Yinzo, nge ke yidika lele na basinga ya lino ya mbote. Nge ke yidikila yawu na basinga ya mwa mbwaki, ya mbwaki mpe ya mbwaki ya kulutila. Ya ke vwanda kisalu ya muntu yina ke tungaka na maboko. 37 Nge ke yidika makunzi tanu ya akasya samu na lele yina. Nge ke tula wolo na makunzi yango, mpe nge ke tula yawu bisimbulu ya wolo. Samu na makunzi yina, nge ke yidika bisengo tanu na kisengo ya mbwaki yina nge ke sulumuna na tiya.»