Esawu kwendaka zinga na Edome
36
Yayi ni bankumbu ya bana ya Esawu yina ba ke bokilaka mpe Edome. 2 Esawu kwelaka bakento ya yandi na kati ya bandumba ya yinsi ya Kaana. Ya vwandaka: Ada, mwana ya Elone, mu-Iti, Owolibama, mwana ya Ana, mutekolo ya Sibewone, mu-Ivi. 3 Yandi kwelaka mpe Basemate, mwana ya Isemayele. Basemate vwandaka kibusi ya Nebayote. 4 Ada na Esawu butaka Elifaze. Basemate butaka Lewele. 5 Owolibama butaka Yewuse, Yayelame na Kola. Yina ni bana yina Esawu butaka na yinsi ya Kaana.6 Esawu bakaka bakento ya yandi, bana ya yandi ya bakento na ya babakala mpe bantu nyonso yina vwandaka zinga na yinzo ya yandi. Yandi bakaka mpe bibulu ya yandi nyonso, na mvwilu nyonso yina yandi kuzwaka na yinsi ya Kaana. Yandi kwendaka na yinsi ya nkaka, ntama na kisika yina vwandaka mpangi ya yandi Yakobi. 7 Yandi kwendaka ya yandi samu ti, mvwilu ya bawu vwandaka me kuma ya kulutila. Bawu lendaka vwanda dyaka ve kisika mosi. Yinsi yina bawu vwandaka zinga na bunzenza vwandaka me kuma fyoti samu na bibulu ya bawu ya mingi-mingi. 8 Ni yawu yina, Esawu, yina ba ke bokilaka Edome, kwendaka zinga na mongo ya Seyile.
Bana ya Esawu
(1 Kinkulu 1.35-54)
9 Yayi bankumbu ya bana ya Esawu, nkooko ya ba-Edome, bayina vwandaka zinga na mongo ya Seyile. 10 Bana ya Esawu ni: Elifaze, mwana ya kento ya yandi Ada, Lewele, mwana ya kento ya yandi Basemate.
11 Bana ya Elifaze ni: Temane, Omale, Sefo, Ngayetame na Kenaze. 12 Timena vwandaka dikangu ya Elifaze, mwana ya Esawu. Timena butaka na yandi Amaleke. Yina ni bana ya Ada, kento ya Esawu.
13 Bana ya Lewele ni: Nayate, Zela, Sama na Miza. Yina ni bana ya Basemate, kento ya Esawu. 14 Owolibama, mwana ya Ana, mpe mutekolo ya Sibewone, vwandaka mpe kento ya Esawu. Yandi butaka na Esawu bana yayi: Yewuse, Yayelame na Kola.
15 Yayi ni bamfumu ya makanda yina Esawu butaka: Bana ya Elifaze mwana ya ntete ya Esawu ni: Mfumu Temane, mfumu Omale, mfumu Sefo, mfumu Kenaze, 16 mfumu Kola, mfumu Ngayetame, mfumu Amaleke. Yina ni bana ya Elifaze yina vwandaka zinga na yinsi ya Edome. Bawu ni batekolo ya Ada, kento ya Esawu.
17 Bana ya Lewele, mwana ya Esawu ni: Mfumu Nayate, mfumu Zela, mfumu Sama, mfumu Miza. Yina ni bamfumu yina butaka Lewele, bayina vwandaka zinga na Edome. Bawu ni batekolo ya Basemate, kento ya Esawu.
18 Bana ya Owolibama, kento ya Esawu ni: Mfumu Yewuse, mfumu Yayelame, mfumu Kola. Yina ni bamfumu yina Owolibama, kento ya Esawu, butaka. Owolibama vwandaka mwana ya Ana.
19 Yina ni bana ya Esawu, bayina vwandaka bamfumu ya makanda ya bawu. Esawu, ni yandi ba ke bokilaka mpe Edome.
Bana ya Seyile
20 Yayi ni bana ya Seyile, mu-Woli, bayina vwandaka zinga ntete na yinsi yina: Lotane, Sobale, Sibewone, Ana, 21 Disone, Esele, mpe Disane. Bawu ni bamfumu ya ba-Woli, bana ya Seyile, kuna na yinsi ya Edome. 22 Bana ya Lotane ni Oli na Emane. Kibusi ya Lotane vwandaka Timena. 23 Bana ya Sobale ni: Alevane, Manaate, Ebale, Sefo mpe Oname. 24 Bana ya Sibewone ni Aya na Ana. Ni Ana bakulaka yinto ya maza ya tiya na yinsi ya kuyuma, na ntangu yandi vwandaka kwenda dikila bambuluku ya tata ya yandi, Sibewone. 25 Bana ya Ana ni Disone, mwana ya yandi ya bakala na Owolibama, mwana ya yandi ya kento. 26 Bana ya Disone ni: Emedane, Esebane, Yitelane na Kelane. 27 Bana ya Esele ni: Bilane, Zawane na Akane. 28 Bana ya Disane ni Wuse na Alane.
29 Yayi ni bamfumu ya makanda ya ba-Woli: Mfumu Lotane, mfumu Sobale, mfumu Sibewone, mfumu Ana, 30 mfumu Disone, mfumu Esele, mfumu Disane. Yina ni bamfumu ya makanda ya ba-Woli na yinsi ya Seyile.
31 Yayi ni bantinu yina yalaka yinsi ya Edome ntete ti bantinu kubanda na kuyala bana ya Isayeli. 32 Bela, mwana ya Bewole kumaka ntinu ya Edome. Nkumbu ya mbanza ya yandi vwandaka Dinaba. 33 Bela kufwaka. Yobabe, mwana ya Zela, muntu ya mbanza Bosela, yandi kumaka ntinu na kisika ya Bela. 34 Yobabe kufwaka. Usame, muntu ya yinsi ya ba-Temani, kumaka ntinu na kisika ya Yobabe. 35 Usame kufwaka. Adade, mwana ya Bedade, kumaka ntinu na kisika ya Usame. Ni Adade nungaka Midyane na yinsi ya Mowabe. Nkumbu ya mbanza ya Adade vwandaka Avite. 36 Adade kufwaka. Samela, muntu ya mbanza Maseleka, kumaka ntinu na kisika ya Adade. 37 Samela kufwaka. Sawule, muntu ya Lewobote-Naale, yandi kumaka ntinu na kisika ya Samela. 38 Sawule kufwaka. Baale-Anane, mwana ya Akebole, kumaka ntinu na kisika ya Sawule. 39 Baale-Anane, mwana ya Akebole, kufwaka. Adale kumaka ntinu na kisika ya Baale-Anane. Nkumbu ya mbanza ya yandi vwandaka Pawu. Nkumbu ya kento ya yandi vwandaka Meyetabele. Meyetabele vwandaka mwana ya Matelede, mpe mutekolo ya Mezayabe.
40 Yayi ni bankumbu ya bamfumu ya Esawu mutindu vwandaka bifumba ya bawu mpe bisika yina bawu vwandaka: Mfumu Timena, mfumu Aleva, mfumu Yetete, 41 mfumu Owolibama, mfumu Ela, mfumu Pinone, 42 mfumu Kenaze, mfumu Temane, mfumu Mibesale, 43 mfumu Mangedyele, mfumu Ilame. Yina ni bamfumu ya ba-Edome mutindu vwandaka bisika yina bawu vwandaka zinga na yinsi yina kumaka mvwilu ya bawu.
Esawu kele nkooko ya ba-Edome.