Mbandukulu 11

Yinzo ya mutela ya yinda na Babele

Bantu nyonso ya yinza vwandaka zonza kaka ndinga mosi mpe bawu vwandaka sadila bampova mosi. 2 Ntangu bawu telamaka na kukwenda na Esete, bawu talaka kizunga mosi ya yinsi ya Sineyale, mpe bawu vwandaka kuna. 3 Bawu zonzasanaka bawu na bawu: «Beto sala bibiliki, mpe beto yoka yawu.» Bawu bakaka bibiliki na poto-poto yina kele mutindu gudron samu na kutunga. 4 Bawu tubaka: «Beto tunga mbanza, mpe yinzo mosi ya mutela ya yinda yina fwana kukuma tii na dizulu, samu ti beto zabana na ntoto. Na mutindu yina beto ke vwanda ve ya kumwangana na yinza nyonso, kasi beto ke vwanda kisika mosi.»

5 Yave kulumukaka na kutala mbanza na yinzo ya mutela ya yinda yina bantu vwandaka tunga. 6 Mpe Yave tubaka: «Tala mutindu bantu yayi kele muntu mosi, ba ke na kuzonza ndinga mosi! Yayi kaka mbandukulu ya mavanga ya bawu! Yina bawu me banda mutindu yayi, ata dyambu mosi ve lenda kukabikisa bawu na kuyidika nyonso yina bawu zola kuyidika. 7 Beto kwenda vwanzikisa dinga ya bawu samu ti bawu kuwisana dyaka ve bawu na bawu.» 8 Yave bingisaka bawu kuna, mpe mwangisaka bawu na ntoto ya muvimba. Na yina, ntungulu ya mbanza yango sukaka na nzila. 9 Ni yawu yina, ba ke bokilaka mbanza yina Babele, samu ti ni kuna Yave vwanzikisaka ndinga ya bantu samu ti bawu kuwisana dyaka ve bawu na bawu. Ni kuna mpe Yave mwangisaka bawu na yinza nyonso.

Bankumbu ya bantu kubanda na Seme tii na Abalami

10 Yayi ni bankumbu ya bana ya Seme. Ntangu maza dyamisaka yinza, bamvula zole lutaka, mpe Seme butaka Alepakesade. Na ntangu yina, Seme lungisaka bamvula nkama. 11 Na manima ya mbutukulu ya Alepakesade, Seme zingaka dyaka bamvula nkama tanu. Yandi butaka dyaka bana ya bakento na ya babakala.

12 Na ntangu Alepakesade lungisaka bamvula makumi tatu na tanu, yandi butaka Sela. 13 Na manima ya mbutukulu ya Sela, Alepakesade zingaka dyaka bamvula nkama yiya na tatu. Yandi butaka dyaka bana ya bakento na ya babakala.

14 Na ntangu Sela lungisaka bamvula makumi tatu, yandi butaka Ebele. 15 Na manima ya mbutukulu ya Ebele, Sela zingaka dyaka bamvula nkama yiya na tatu. Yandi butaka dyaka bana ya bakento na ya babakala.

16 Na ntangu Ebele lungisaka bamvula makumi tatu na yiya, yandi butaka Pelenge. 17 Na manima ya mbutukulu ya Pelenge, Ebele zingaka dyaka bamvula nkama yiya na makumi tatu. Yandi butaka dyaka bana ya bakento na ya babakala.

18 Na ntangu Pelenge lungisaka bamvula makumi tatu, yandi butaka Lewu. 19 Na manima ya mbutukulu ya Lewu, Pelenge zingaka dyaka bamvula nkama zole na yivwa. Yandi butaka dyaka bana ya bakento na ya babakala.

20 Na ntangu Lewu lungisaka bamvula makumi tatu na zole, yandi butaka Selunge. 21 Na manima ya mbutukulu ya Selunge, Lewu zingaka dyaka bamvula nkama zole na sambwadi. Yandi butaka dyaka bana ya bakento na ya babakala.

22 Na ntangu Selunge lungisaka bamvula makumi tatu, yandi butaka Nawole. 23 Na manima ya mbutukulu ya Nawole, Selunge zingaka dyaka bamvula nkama zole. Yandi butaka dyaka bana ya bakento na ya babakala.

24 Na ntangu Nawole lungisaka bamvula makumi zole na yivwa, yandi butaka Tela. 25 Na manima ya mbutukulu ya Tela, Nawole zingaka dyaka bamvula nkama na kumi na yivwa. Yandi butaka dyaka bana ya bakento na ya babakala.

26 Na ntangu Tela lungisaka bamvula makumi sambwadi, yandi butaka Abayami, Nawole mpe Alane.

27 Yayi ni dikanda ya Tela, Tela butaka Abayami, na Nawole, na Alane. Alane butaka Loti. 28 Alane kufwaka tekila tata ya yandi Tela, na mbanza ya Ule na yinsi ya Kaledeyi, yinsi ya dikanda ya yandi. 29 Abayami kwelaka Salayi, mpe Nawole kwelaka Milika. Mileka na Yiseka vwandaka bana ya Alane. 30 Salayi vwandaka na mwana ve, yandi vwandaka kisita.

31 Tela bakaka mwana ya yandi Abayami na mutekolo ya yandi Loti, mwana ya Alane. Yandi nataka mpe Salayi, kento ya mwana ya yandi Abayami. Bawu bikaka mbanza ya Ule na yinsi ya Kaledeyi, samu na kukwenda na yinsi ya Kaana. Bawu kumaka na mbanza ya Alane, mpe zingaka kuna. 32 Tela kufwaka na bamvula nkama zole na tanu na mbanza ya Alane.