اَنطاڪيہ شھر ۾ گھڻو بحث
15
1 پَڇي ڪينهڪ وِشواسِي يھُوديہ صُوبي سين آيا، آن وِشواسِي ڀايان نا اِين سِکاڻ لگا تہ، ’اُتِي تائين اَوھان نا ڪڏھي پڻ ڇوٽڪارو ڪِنھِي جُڙي، جِتِي تائين مُوسيٰ ري لِکيل حُڪمان موجب اَوھاجِي طُھر نہ ٿي۔‘ 2 تڏھين پولُوس آن برنباس اُوئان ماڙھُوئان سين اِيئي وات تي ڏاڍا وِڙھيا، آن اُوئان سين گھڻو بحث ڪريو۔ اِيئي ڪري منڊلِي ري ماڙھُوئان آپ مان پولُوس، برنباس آن ٻِيجا ڪينهڪ ماڙھُو چُنڊيا، تہ جين اِيئي وات ري باري ۾ خاص چيلان آن اُٿلِي منڊلِي ري اَگواڻان وٽ يرُوشلم شھر ۾ جائي۔يرُوشلم ۾ يھُودِي قوم ري وِشواسِي پنچائِت رو ڀيۯو ٿيڻ
3 پَڇي اَنطاڪيہ شھر ري وِشواسِي منڊلِي ري ماڙھُوئان اُوئان نا رَوانا ڪريا، آن او فِينِيڪي آن سامريہ عِلائِقان وٽا مٽتي اُٿلان وِشواسِي ڀايان نا ڌاريان قومان ري وِشواس رکڻ ري باري ۾ سنڀۯاتا گيا۔ او سجا ئي سنڀۯي گھڻا خُوش ٿيتا۔
4 پَڇي جڏھين او يرُوشلم شھر پُگا، تڏھين وِشواسِي منڊلِي را ماڙھُو، خاص چيلا آن ٻِيجا اَگواڻ اُوئان سين خُوشِي سين مِليا۔ پَڇي پولُوس آن برنباس اُوئان نا سنڀۯايو تہ اِيشوَر اَسان وٽا ڪيھڙا ڪيھڙا ڪم ڪرايا۔ 5 پڻ فرِيسِي ٽولي را جڪو ماڙھُو وِشواسِي ٿي گيا تا، اُوئان مان ڪينهڪ ماڙھُو اُٺي ڪھڻ لگا تہ، ’او ڌارِين قوم واۯا جڪو وِشواسِي ٿي گيا اَھين، اُوئان رِي طُھر ڪراڻ کپي، آن اُوئان نا مُوسيٰ ري لِکيل حُڪمان تي ھلڻ رو ڪھڻ کپي۔‘
6 پَڇي خاص چيلا آن وِشواسِي منڊلِي را اَگواڻ اِيئي وات تي فيصلو ڪرڻ سارُون ڀيۯا ٿيا۔ 7 گھڻي بحث سين پَڇي پَطرس اُٺي ڀِيچي اُوئان نا ڪھيو تہ، ’اي ڀايان، اَوھان نا خبر اَھي تہ گھڻا ڏِينھ ٿيا اِيشوَر آپان مان مِنا چُونڊيو، تہ جين ڌارِين قوم را ماڙھُو مين وٽا خُوشخبرِي سنڀۯي وِشواس رکين۔ 8 آن اِيشوَر ماڙھُوئان رِي دِل نا اوۯکي تو، اِيئي ڪري اُوئان نا آپڻي ري جين پَوِيتر آتما ڏي قبُول ڪرڻ رِي شاھِدِي ڏِنانتي۔ 9 اُوئان ري وِشواس ري ڪري اِيشوَر اُوئان را من پَوِيتر ڪري آپان آن اُوئان ري وِچ ۾ ڪوئِي فرق ڪو رکيو۔
10 ھي اَوھِين اِيئي وات ۾ اِيشوَر نا ڪِي پيا آزمائو؟ اَوھِين وِشواسيان تي ايھڙو ڀار ڪِي تا ناکو، جِڪي نا نِڪو آپڻا ٻاپ ڏاڏا آن نِڪو آپِين کڻي سگھيا؟ 11 پڻ اَسانجو ڀروسو اي اَھي تہ پرڀُو يسُوع رِي ڪِرپا سين آپان نا ڌارِين قوم واۯان ري جين ڇوٽڪارو جُڙي تو۔‘
12 پَڇي سجا ئي ماڙھُو ماٺ ٿي گيا، آن پولُوس آن برنباس رين اي واتين سنڀۯڻ لگا تہ اِيشوَر اَسان وٽا ڌاريان قومان ۾ ڪيھڙا ڪيھڙا پرچا آن عجِيب ڪم ڏيکاۯيا تا۔
13 جڏھين او واتين ڪري رھيا، تڏھين يعقُوب ڪھڻ لگو تہ، ’ڀايان، مانھجِي وات سنڀۯو۔ 14 شمعُونَ ھِيڻا سنڀۯايو اَھي تہ اِيشوَر اَگ ۾ ڪِين ڌاريان قومان تي ڌيانَ ڏِنو تو، تہ جين اُوئان مان او آپ سارُون ھيڪ قوم چُنڊي۔ 15 اِيئي وات سين اِيشوَر رو نياپو ڏيڻ واۯان رين واتين مِلين تين، جين شاستر ۾ لِکيل اَھي تہ،
16 ’پرڀُو اِيشوَر اِين پيو ڪھي تہ،
’پَڇي ھُون وۯي پَڇو آئِيس،
آن دائُود ري کِريَل گھر نا وۯي سِڌو ڪرِيس۔
آن اُوئي ري ناس ٿيل ٽُڪران نا ھُون سِڌا ڪري وۯي ٺاھِيس۔
17 ھُون اِين ڪرِيس تہ جين ٻِيجا سجا ئي ماڙھُو،
مطلب سجيان ڌاريان قومان را ماڙھُو
جڪو مانھجي نان واۯا سڏائين تا،
او مين تي آپرو جِيوَ لگائين۔‘
18 پرڀُو اِيشوَر اِين ڪھي پيو،
جِڪي شرُوع سين لي او واتين پڌرين ڪرين اَھين۔‘
19 اِيئي ڪري، ڀايان، مانھجو خيال اي اَھي تہ جڪو ڌاريان قومان مان اِيشوَر تي وِشواس رکين تا، آپِين اُوئان نا تڪلِيف نہ ڏيئان۔ 20 پڻ اُوئان نا اِين لِکي ميلھان تہ او رُگو ڏيوَان تي چاڙھيَل مال نہ کائين، بُرو ڪم نہ ڪرين، آن جڪو مال گھُٽو ڏي ماريَل ھوئي، آن لوھِي پڻ، او نہ کائين۔ 21 ھُون اِين ڪھان پيو ڪِي تہ پُراڻي وقت سين لي مُوسيٰ را لِکيل شاستر ھر شھر ۾ سنڀۯائين تا، آن يھُوديان ري مندران ۾ ھر پَوِيتر ڏِينھ تي پڙھي سنڀۯائين تا۔‘
يھُودِي قوم را وِشواسِي ڌاريان قومان ري وِشواسيان نا خط لِکين تا
22 پَڇي خاص چيلان، اَگواڻان، آن وِشواسِي منڊلِي ري ماڙھُوئان اي فيصلو ڪريو تہ، ’آپان مان ڪينهڪ ماڙھُو چُنڊان، جڪو پولُوس آن برنباس ڀيۯا ٿي اَنطاڪيہ شھر جائي۔‘ تو اُوئان ٻہ ماڙھُو چُنڊيا، جِڪان نا وِشواسِي عِزت ڏيتا۔ ھيڪي رو نان يھُوداہ ھتو، جِڪي نا برسبا پڻ ڪھتا، آن ٻِيجي رو نان سِيلاس ھتو۔ 23 اُوئان اِيئان ڀيۯو اِين لِکي ميلھيو تہ،
’اي وِشواسِي ڀايان، اَوھِين ڌارِين قوم واۯا جڪو اَنطاڪيہ شھر آن پُورِي سُوريہ آن ڪِلِڪيہ صُوبي ۾ رھو تا، اَسِين خاص چيلا آن منڊلِي را اَگواڻ، اَوھانجا وِشواسِي ڀائِي، اَوھان نا جئہ پرڀُو رِي ڪھان تا۔
24 اَسان سنڀۯيو اَھي تہ اَسان مان ڪينهڪ ماڙھُو اَوھان وٽ آئي آپري واتيان سين اَوھان نا گڻتيان ۾ گھتيا اَھين، آن اَوھان نا دِل ۾ ڏُک ڏِنا اَھين۔ پڻ اُوئان نا اَسان موڪل ڪو ڏِنِي تِي۔
25 اِيئي ڪري اَسان سجان ھيڪ صلاح ٿي اي فيصلو ڪريو اَھي تہ ڪينهڪ چُنڊيَل ماڙھُوئان نا آپڻي پريمِي ڀايان برنباس آن پولُوس ڀيۯا اَوھان وٽ ميلھان۔ 26 برنباس آن پولُوس ايھڙا ماڙھُو اَھين جِڪان آپرو جِيوَ آپڻي پرڀُو يسُوع مسِيح ري نان تي ڏيڻ سارُون تَيار رکيو اَھي۔ 27 اِيئي ڪري اَسِين يھُوداہ آن سِيلاس نا ميلھان پيا تہ او اَوھان نا اَسانجين لِکيل واتين رُوبرُو سنڀۯائين۔
28 وات اي اَھي تہ پَوِيتر آتما آن اَسان نا اِين ٺِيڪ لگو اَھي تہ اَوھان تي اِيئان ضرُورِي واتيان سَوا ٻِيجو ڪوئِي ڀار نہ ناکان:
29 اَوھِين ڏيوَان ري نان تي چاڙھيَل مال مَ کائو۔
ٻِيجو او مال جڪو گھُٽو ڏي ماريَل ھوئي، (قق( آن لوھِي پڻ، او مَ کائو،
آن بُرو ڪم مَ ڪرو۔
جي اَوھِين آپ نا اِيئان واتيان سين بچائي رکسو، تو اَوھِين ٺِيڪ رھسو۔
وڌِيڪ سُک۔‘
30 پَڇي او رَوانا ٿيا، آن اَنطاڪيہ شھر ۾ پُگا۔ اُٿ سجان وِشواسيان نا ڀيۯا ڪري اُوئان خط ڏِنو۔ 31 او خط پڙھي اُوئان نا حونصلو ٿيو، آن او گھڻا خُوش ٿيا۔ 32 پَڇي يھُوداہ آن سِيلاس، جڪو آپ اِيشوَر رو نياپو ڏيڻ واۯا ھتا، وِشواسِي ڀايان نا گھڻين واتين سمجھائي حونصلو ڏِنو، آن اُوئان رو ويساھ پڪو ڪرايو۔ 33 او ڪينهڪ ڏِينھ اُٿ رھيا۔ پَڇي وِشواسيان اُوئان نا پريم سين رَوانا ڪريا، آن او پَڇا آپري ماڙھُوئان وٽ گيا، جِڪان اُوئان نا ميلھيا تا۔ 34 (پڻ سِيلاس نا اُٿ رھڻ سُٺو لگو۔)
35 پولُوس آن برنباس اَنطاڪيہ شھر ۾ رھيا۔ اُٿ او آن ٻِيجا گھڻا ماڙھُو پرڀُو اِيشوَر رو وچن سِکاتا آن خُوشخبرِي سنڀۯاتا رھيا۔
پولُوس رو پرڀُو يسُوع ري باري ۾ سنڀۯاڻ سارُون ٻِيجو چڪر
پولُوس آن برنباس ڌار ڌار ڪم ڪرڻ لگين تا
36 ڪينهڪ ڏِينھان سين پَڇي پولُوس برنباس نا ڪھيو تہ، ’جِڪان جِڪان شھران ۾ آپان پرڀُو اِيشوَر رو وچن سنڀۯايو تو، ھلو، پَڇا اُٿلان وِشواسِي ڀايان وٽ ھلي جوئان تہ ڪِين پيا ڪرين۔‘ 37 برنباس رِي مرضِي ھتِي تہ يُوحنا نا ڀيۯو تيڙي جائُون، جِڪي نا مرقس پڻ ڪھتا۔ 38 پڻ پولُوس ڪھيو تہ، ’جڪو ماڙھُو پمفُوليہ ۾ آپان نا ڇڏي ھليو آيو تو، آن ڪم تي ڀيۯو ڪو ھليو تو، اُوئي نا ڀيۯو تيڙي ڪِين ھلان؟‘ 39 اِيئي وات تي ٻئِي آپت ۾ اِتا گھڻا ٻولي وِڙھيا جو او ڌار ڌار ٿي گيا۔ برنباس مرقس نا تيڙي ٻيڙي ۾ چڙھي ڪُپرُس ٻيٽ سمھون رَوانو ٿي گيو۔ 40 پڻ پولُوس سِيلاس نا چُونڊيو۔ پَڇي وِشواسِي ڀايان پولُوس نا پرڀُو اِيشوَر ري حَوالي ڪريو تہ او اُوئي تي ڪِرپا ڪري، آن او رَوانو ٿيو۔ 41 او سُوريہ آن ڪِلِڪيہ صُوبي سين مٽتو وِشواسِي منڊليان ري ماڙھُوئان نا وِشواس ۾ پڪا ڪرتو گيو۔