52. NGAUI BAU: LAU DAO: AUNG DOE; LO: RA" KHYO
(Qhu" Byid: 21:1-7, 22:5)
| Ai: thao re mug: gaung sag' we' myid gaung sag' re ngo myao:. Sao qhid' mae" mug: gaung we' myid gaung wa baui" lo" byaug mung:- pang: lai: wa byaug: byaug: ra". Ai: Gyang" Lho" Vomo" ngad: ra" Yerusalem vosag' wa yao" yham sang pho" we' qhug' na nae" qhid' mae" shaung: yaung" ci: ra" myhi" sag' we' dakhyo:- jin" jin" nyhang" seim" ci yang: Mao"So mae" mug: gaung khyo" gyo" li" rure ngo myao:.Kho:kham: tao" khau" mae" thoe qi: dathoe khyo"- Ana" Mao"So: nho: yham wa yao" byu qe we' daga" ngad: ra". Yao: wa yao: bam we' daga" na: li" nae"- Yao: bam wa yao" byu qe ngad: li" genae". Mao"So yao:- yao: bam we' daga" na: li" nae". Yao: wa yao: bam: nho: Mao"So ngad: li" nae".Yao: bam: myo,jid' jham mae" ngug byid alhab' re yao: sad' pye' byid' li" nae"- shid: ru majo, lonae"- Kaug'qhui: ru- mangad: lao"- gyi: ngug: ru- mangad: lao"- khai" no: ru majo, lonae". Qhid' phyao: boe" ru jham alhab' gu: wa baui" lo" byaug: ava"- ga: jhau: rure ngo the' gyo".Ai: thao- tao" khau" mae zaung: jo; ra" yaug wa Ana" ngo wa cao jab alhab' re asag' kad' pye' va"- ga: ta" ra". Yao: wa Ceru: tung" to: wa,- Pe"mung:ga"re ce: dao: jham wa dang man" ru we' lam ga" ra" dao: jham ngad: ra" ga: re:- ngo re ta" ra".Amung: yao: wa Bin va"- Ngo wa sao qhid' we' lo" thao"- aqhid we' athao" yaug ngad:. Qid shab' ra" yaug khag' ngad qere: kao so' qid thug' mae" qid re aphug' mabyid: ca" lo: shaug' nae" akhang" ngo byid: nae". | Aung doe; ra" yaug khag' ngad qere: ce: qid re ngo mae" qo" khae: yu: li" nae"- Ngo wa yao" Mao"So ngad: li" nae"- Amung: yao: wa nga" zo: ngad: li" nae".Mug:lagyo: wa Mao"So we' Yao Nau" tao" khau" mae" thug' li" mung"- ai: vomo" hau" mo" khyodang agaung: cao" yang: yug: gyo" lo" ra" pad' we' dakhyo: bao: ra" kao so' qid gyaung: mo" rere: ngo re qhu" byid' ra".Ai: qid gyaung: mo" qid yae shid' shad' geim" mae lho" dakhye' dalhang ashi: zaui: mung:- dazin re daxe: shid' lhang ashi: zaui" ra" kao so' sag'gae yaug: ra". Avho' jham wa byumyu" cao jab re no gai byid: nae" qhid' mae" ngad: ra".Ai: vomo" khug mae Mao"So: nhang: kheim: zao" ra" ja: pe" re: jo, nae" mangad:- Mao"So we' Yao Nau" nho: tao" khau" wa ai: vomo" mae jo, mung:- yao" nho: daui daui mo, wa yao: re goe; pa" li" genae".Yao: bam wa yao" myo,khung: re the' myao: li" genae". Yao: bam: nga: lao: mae yao" mang tung" te' to: byid' li" nae". Ai: mae myi" majo, lonae"- Yao: bam wa myibaung:- mangad: lao"- ba bao qo logenae" mangad:- Pe"mung:ga"re Mao"So wa yao: bam: nho: bo" bao ngad: li" nae". Yao: bam wa khokham qe boe" mung: apyad ato eib: na: li" genae". |