Rware ro Mwoyo
22
Kangeru ngou ka ni monithsire aro rware ro meyu o mwoyo. Rwa tethzimine tethzi eci kirisitale, o ku ru pupa ku tunda ku ngunja thza Nyambi nethzi thza Dinguana. 2 Rwa urumukire ku pupa pa kaci ko mukwakwa oshokuru o mu thsikuña. Mu thsambwedi no mu thsambwedi thzoro rware kwekarire athso thsitondo thso mwoyo, ethsi thsemine ima yo dikumi na idi ngonda no ngonda. Mamuna athso kuma a kwamithsiwire ku porithsa matunga.3 Mbera ka mwikara thso ku kutiwa, unone ngunja thza Nyambi nethzi thza Dinguana kenge ya kwikaramo, apikenthzi kenge mba mu kwamena. 4 Kenge mba mona rupara rwenthzi, kenge mba ñoriwa dithzina dyenthzi pa rupara. 5 Ka mba mwikara karo othsiku, mbera ka mba foto kambarambara nji diyuwa ku wa munekera, inene Fumu Nyambi kenge a ku wa munekera, karo kenge mba tumina diyere na diyere.
Kukeya kwa Yesu
6 Kangeru ngou ka ni amberire ci: “Aa maywi po aa kuruperiwa, karo a shemwa. Fumu Nyambi oyu na panga akwakukethza Mupepo wenthzi, na a tumu kangeru kenthzi ku monithsa apikenthzi enu eyi i na roera ku tendahara popano.”
7 “O mone, popano naa keya! Wa thsiyauthzi o ku hengeka maywi okethzi aa a di omu mu vuka.”
8 Ame no Johani yame na yuvire no ku mona eyi enu eyi. Ou na i yuvire no ku i mona, na furumanine ku rombera ku mauru o kangeru aka ka i ni monithsire. 9 Unone ka ni amberire ci: “Dyombo, wa ni rombera! Ame po no mupika Nyambi eci edi o di owe naenthzoe akwakukethza nowa a na hengeka aa maywi othzi vuka. O rombere Nyambi pohuma!”
10 Ngou ka ni amberire ci: “Aa maywi okethzi a di omu mu vuka wa a horeka, inene thsikati thso ku tendahara eyi pepi thsi di. 11 Oyu wipithsa a tware ku rupara ku tenda omango, o dithziro a tware ku rupara ku tenda yo dithziro, o muwawa a tware rupara ku tenda owawa, o mukenu a tware ku rupara kwikara o mukenu.”
12 Yesu wa ambire ci: “O mone, naa keya popano. Muyambo wange po nange u di, kenge na ku na pa munu no munu kokuthza kekwama yo. 13 Yame no Alufa no Omega, o Kutanga no Mahurerero, Matatekero no Mamaneneno.”
14 Akwathsiyauthzi awa a yoa ekoveyo yo, ci nga a kwikare noroero o kwingena mu mathsero o thsikuña no ku dya ku ima yo thsitondo thso mwoyo. 15 Pora kenge kwa ku thsiara mbwa, arothzi, akwaruthziho, epaanu, akwakurombera ekupuro nowa wahe awa a na shimi ku yoya mwoyo o kwangera.
16 Ame no Yesu, ni na tumu kangeru kange ku na mi pa ou ombangi ku makereke. Yame no Ditunderero no Mwanahoka shokuru wa Davida, yame no Dirungwe edi di muneka.
17 Mupepo na mwenga aa amba ci: “O keye!” Oyu na yuvu eyo yomuhe naye a ambe ci: “O keye!” Yomuhe oyu na fu dinotwa a keye, yomuhe oyu na shimi a nwe ku meyu o mwoyo ko kupira ku patara.
18 Naa nomenithsa wahe awa a na yuvu maywi okethzi aa a na ñoriwa omu mu vuka: Ngeci munu ayepo vungithsa ngara thsinu kweyi i na ñoriwa omu, Nyambi kenge a ku vungithsera oyo munu makarara aa a na ambiwa omu mu vuka. 19 Karo ngeci munu aa tundithsa ngara diywi mwethzi vuka thzokethzi, Nyambi kenge a ku mu nyanga eyi a na roera ku eriwa ku ima yo thsitondo thso mwoyo noku thsikuña thso shokenu thsa Yerusalema, eyi i na ñoriwa omu mu vuka.
20 Oyu pa ombangi weyi enu eyi yoihe a amba ci: “Ii, naa keya popano!”
Yoshemwa! O keye, Fumu Yesu!
21 Thsihemo thsa Fumu Yesu thsikare nanua Nyambi wahe. Ameni.