Kutawa kwa Mwana Nyambi
5
Yomuhe o ku tawa ci Yesu po yodiyo Krisitu po na erekiwa ope, karo yomuhe o ku shima Nyambi Tata aa shima nanenthzi kengeyo. 2 Kenge dyo tu na dimukanga ci twaa shima ana Nyambi, ngeci atwepo tu shima Nyambi no ku hengeka eraerera yenthzi. 3 Ku shima Nyambi po ku hengeka eraerera yenthzi, karo eraerera yenthzi kadi iremu. 4 Inene yomuhe mwana Nyambi aa othza kaye, karo twaa othza kaye ko thsitawo thsetu. 5 Edye o ku twethsa ku othza kaye ngeci kadi shime o ku tawa ci Yesu po yodiyo Mwana Nyambi?Ombangi keyi ya Mwana Nyambi
6 Yesu Krisitu yodiyo wa keyire ko meyu nonyinga. Ka a keyire ko meyu pohuma, unone ko meyu nonyinga. Mupepo aye aa pa ombangi, inene Mupepo aye yodiyo oshemwa. 7 Inene kwa di ahatu awa pa ombangi: 8 Mupepo, meyu nonyinga, karo awa ahatu aa citawa. 9 Ngeci twaa tawa ombangi wanu, ombangi wa Nyambi awo po ukuru, inene ou odiyo ombangi na a pa keyi ya Mwane. 10 Yomuhe o ku tawa kwa Mwana Nyambi o di nou ombangi mu mwenthzi. Yomuhe o kukana ku tawa kwa Nyambi, aethsa Nyambi ci wa kwangera pakuninga ci ka a tawire ombangi ou na a pa keyi ya Mwane.
11 Ou odiyo ombangi ci Nyambi na a tu pa mwoyo o diyere, karo ou mwoyo po mwa Mwane u di. 12 Oyu di na Mwana, o di no mwoyo; yomuhe oyu na piri Mwana Nyambi, ka a di no mwoyo.
Mwoyo o diyere
13 Naa mi ñorera eyi amwe mu na tawa mu dithzina dya Mwana Nyambi, ci nga mu dimuke ci mu di no mwoyo o diyere. 14 Karo twaa tanara micima inene aa tu yuva ngeci atwepo tu romba thsinu kokuthza komu a na shimena. 15 Karo ngeci tu na dimuka ci aa tu yuva yoihe tu mu romba, tu na dimuka ci tu na i piwa kare eyi tu na mu rombo.
16 Ngeci munu aa mona muenthzenthzi o ku kwama thsivi thso kukana ku twara ku kufa, a rombere, karo Nyambi kenge a ku pa oya munu mwoyo. Naa amba yakwathsivi thso kukana ku twara ku kufa. Ko thsi di thsivi thso ku twara ku kufa, ka ni ambire ci mu romberere eyo. 17 Etenda yoihe yoimango po thsivi, uno honi ko thsi di thsivi thso kukana ku twara ku kufa.
18 Tu na dimuka ci mwana Nyambi yomuhe tumba a kwaterera ku tenda thsivi, inene Mwana Nyambi aa mu nyunga, karo o mumango tumba a mu kwata. 19 Tu na dimuka ci twana Nyambi, karo ci kaye kokahe kaa endithsiwa koyu o mumango.
20 Tu na dimuka karo ci Mwana Nyambi na a keya no ku na tu pa kuyuvithsithsa, ci nga tu mu dimuke aye o shemwa. Pano honi twaa yoya mu mwenthzi aye o shemwa ko kwikara mwa Mwane, aye Yesu Krisitu. Yodiyo Nyambi o shemwa no mwoyo o diyere.
21 Anange, mu tunde kwanyambi o mbango.