Atangereri o kereke
3
Edi diambo po dya shemwa, dyo ku amba ci: “Ngeci munu aa cikumbwethza nene kwikara mutangereri o kereke, aa cikumbwethza ekwama yo direma.” 2 Mutangereri o kereke aa roera kwikara munu o kupira kapongonyi. Aa roera ku yeka mbuyama yofoci, o ku twethsa ku kwata mucima, ku cihenga, ku remekiwa, ku tambura enda, ku twethsa ku rongithsa, 3 kadi thsitakwa, kadi o mushakararo, unone o kuwamucima, kadi o mikwangarakanyi, kadi o ku shima nene madi. 4 Aa roera ku endithsa nawa mwanda wenthzi. Anenthzi a mu yuvere no ku mu pa direma. 5 Inene ngeci munu aa kwanga ku nyunga mwanda wenthzi shemwa ne, ngepi nga a twethsa ku nyunga kereke thza Nyambi?6 Ka a roerire kwikara oyu na a tawa ñanyiñanyi, inene kenge nga a cinuneka no ku raturiwa eci shamaonga. 7 Karo aa roera kwikara munu o ku remekiwa kwakwakukana ku tawa ci a enithsiwa no ku wera mu thsiraha thsa shamaonga.
Angamba o kereke
8 Angamba o kereke aa roera kwikara anu o ku remekiwa, kadi o kwangera. A nwa nene waine, karo ekara no rununa ro ku pupirika. 9 Aa roera ku tanarithsa diano dyo thsitawo ko mumoneno ouwa. 10 Aa roera ku tatufiwa tango, mbeci honi nga a piwe ekwama yo kwikara angamba o kereke ngeci ka di no kapongonyi.
11 Anuwoa nawo aa roera kwikara o ku remekiwa, ka roerire kwikara o kwipithsa amweya mathzina, unone aa roera kwikara o kucihenga no ku rurama mwinu yoihe.
12 Ngamba o kereke aa roera kwikara mukwerume oyu di no mbuyama yofoci. Aa roera ku endithsa nawa anenthzi no mwanda wenthzi. 13 Inene angamba o kereke awa a kwama nawa ekwama yo kenge a ku tambura direma kwamweya karo nondume ko kuyara mu thsitawo mwa Krisitu Yesu.
Diano dyodikuru
14 Naa kurupera ci ni tamba ku keya ku koe, unone naa ku ñorera eyi enu ci, 15 ngeci o na ku thzihame, nga wa ku dimuke edi a na roera ku yoya anu mu rupathsi rwa Nyambi, athzo kereke thza Nyambi oyu yoya, diunthzi no mushisho oshemwa.
16 Yoshemwa kwithsa o ku hamura okuru o diano dyo thsitawo thsetu,
Krisitu wa hokokire konu,
Mupepo wa pire ombangi o ku monithsa ci muwawa,
wa moniwire ku tungeru,
kwa hongiwire yenthzi mu matunga oahe,
kaye ka mu tawire,
wa twariwire mu wiru mu kutethzima.