Dyo ku rombera
2
Thso kutanga, naa adikana ci ku direreriwe, ku romberiwe, ku rombereriwe anu amweya, karo ku kandereriwe kwa Nyambi anu wahe. 2 Ku rombereriwe mafumu nowa a di nokoro o ku endithsa, ci tu twethse ku yoya mu thsiyaro no mwoyo o mbombo o thsitawo no direma mwinu yoihe. 3 Eyi po iwa, karo yaa roerithsa Nyambi Muyoyithsi wetu, 4 eshima yenthzi aye po ci anu wahe a yoyithsiwe no ku dimuka oshemwa ko kuyara. 5 Inene ku di Nyambi yofoci, no mukwakwimanena yofoci mu kaci ka Nyambi nanu, oyo munu po Krisitu Yesu, 6 aye oyu wa cipire yothsinda kwikara thsipaturithso, ombangi ou na u piwa ko thsikati ethsi thsi na roera. 7 Mukaci keyi, na ni hanguriwa kwikara mukwakuhonga, no kwikara kanganda, ku rongithsa Anukenge yo thsitawo noshemwa. Ka niangerire, naa amba yoshemwa.8 Naa fota ci mu mandau oahe akwerume a rombere, o kwa na yerura moko oakenu mu wiru ko kukana ku anthzipa nji ku cikanyeka.
9 Naa fota karo ci ambuyama a ciyenge nawa omu ku na roera, ko direma no kucihenga. Kadi ko mirukero thzo huki nji ku cishupathzeka gauda nji mapiare, nji ku vata evata yo kutura nene. 10 Unone a ciyenge kekwama yoiwa, eyi i na roera ambuyama awa cithsa ci aa remeka Nyambi.
11 Mbuyama aa roera ku cirongithsa o ku na tutwara no ku cihuthsa kushi ko kuyara. 12 Ka ni tawethzire mbuyama ku rongithsa nji kwikara nokoro peuru thza mukwerume, unone aa roera ku tutwara. 13 Inene Adama yowa tangire kumbiwa, mbeci honi Eva. 14 Karo Adama kadi yodiyo wangeriwire, unone mbuyama yodiyo wangeriwire no ku cora murao wa Nyambi. 15 Unone ambuyama kenge mba yoyithsiwa mu kwereka ana ngeci awopo a twarerera kwikara mu thsitawo, mu thsishimo no kukena no kucihenga.