Ekwama ya Paulu yo ku kwathsa Anukenge
3
Mukaci keyi, ame no Paulu, ame no thsinthzinda thsa Krisitu Yesu ku kwathsa amwe mwAnukenge.2 Yoshemwa na mu yuvu yekwama yo thsihemo thsa Nyambi eyi na piwire mukaci kenu. 3 Eci diya na ni ñoro kare ko wipi, Nyambi aye thsinda wa hokorire ku kwange diano dyeanekera yenthzi. 4 Yoihe mu tara eyi ni na ñoro, mwaa twethsa ku yuvithsithsa odimukero wange o diano dya Krisitu. 5 Edi diano ka dya hokoriwire kwanu o mwikati imweya, pano honi Nyambi na a di hokora ko Mupepo wenthzi ku tunganda nakwakukethza owakenu. 6 Edi diano dya Nyambi po ci ko Muthzimbu Ouwa, Anukenge aa ciwana no Majuda mu kushwana, wahe epo yerama yofoci, karo wahe aa ciera eyi a kumbwethzire Nyambi mwa Krisitu Yesu.
7 Nyambi ko thsipa thso thsihemo thsenthzi wa ni hangurire kwikara ngamba ou Muthzimbu Ouwa. Wa tendire eyi kokoro wenthzi.
8 Shaanga ci no muonye kwanua Nyambi wahe, Nyambi ko thsihemo thsenthzi naa ni pa ku honga Muthzimbu Ouwa wa Krisitu kwAnukenge, rufumo ro kukana ku twethsa ku fotithsithsiwa. 9 Karo naa ni pa ku tongonwena anu wahe yodi diano edi a horekire Nyambi mwikati yo ku manyima, aye oyu wombire enu yoihe.
10 Nyambi wa tendire kengeyo ci ko kereke a monithse onyanyami wenthzi oungi kwaendithsi noku kweyi yoikoro yo mu mandau o mu wiru. 11 Wa tendire kengeyo mukaci keanekera yenthzi yo diyere eyi naa manenena mwa Krisitu Yesu Fumu wetu.
12 Mwa Yesu Krisitu no thsitawo thsetu ku kwenthzi twaa twethsa honi ku keya pa meho a Nyambi kondume no ku tawa shemwa. 13 Mweyo, naa mi romba ci mwa huka munyima mukaci ko makando ange aa ni mi nyandera, inene kenge a ku mi retera kutethzima.
Paulu aa romberera AkwaEfese
14 Mukaci keyi, naa tongama pa meho a Nyambi Tata, 15 oku u tundithsa mukuta no mukuta o mu wiru no pa kaye dithzina. 16 Naa rombera ci ku rufumo rwenthzi ro kutethzima nga a mi tanarithse micima thzenu kokoro, ko Mupepo wenthzi, 17 ci Krisitu nga ekare mu micima thzenu ko thsitawo thsenu, ci nga mu kure no ku tanara mu thsishimo. 18 Naa rombera ci amwe nakwakutawa wahe nga mu yuvithsithse wipi no mwando, ore nothzungi o thsishimo thsa Krisitu, 19 no ku dimuka thsishimo thsa Krisitu ethsi thsi piterera odimukero, ci nga mu twethse ku yara ko kukwanenena kwa Nyambi kokuhe.