5
Inene tu na dimuka ci ngeci athzo tende omu tu yoya muno mu kaye athzopo thzi umbururiwa, tu di no nthzio kwa Nyambi, nthzio thzo diyere thzo mu wiru ethzi thza kana ku umbiwa ko moko anu. 2 Omu mu tende tu di, twaa shira no ku fota nene ci nga tu na vatekiwa mu nthzio thzetu thzo ku wiru. 3 Mukaci ko ku vatekiwa kengeyo, ka twa ku waniwa o ku tu di thsisheshe. 4 Uno honi uno tu yoya omu mu tende thzo muno mu kaye, twaa shira no ku remena. Kadi ci ngwa twaa fota ku shupuriwa eyi erama yo muno mu kaye, unone twaa fota ku vatekiwa mwirama yo ku wiru, ci thso ku twethsa ku fa mwoyo u thsi mine. 5 Nyambi yodiyo wa tu roithserire eyi enu mwene, wa tu pire Mupepo wenthzi ci ikare thsitanarithso.6 Mweyo, twaa kurupera thsikati thsothsihe no ku dimuka ci uno tu di mwirama yo muno mu kaye, kure tu di na Fumu. 7 Inene twaa enda ko kutawa kadi ko kumona. 8 Twaa tawa shemwa no ku fota ci nga tu na thsii eyi erama yo muno mu kaye no ku kekara ku diumbo na Fumu. 9 Mweyo, thsishima thsetu peuru thzenu yoihe po ku roerithsa Nyambi, ikare o ku tu di mweyino erama yo muno mu kaye nji yo ku wiru. 10 Inene twahe twaa roera ku kemana pa rupara ro thsipura thso ratwero thsa Krisitu, ci munu no munu a tambure ethsi thsi na roera eyi naa tende o ku di mwirama yo muno mu kaye, ikare yoiwa nji yoimango.
Kucihuthsa na Nyambi mwa Krisitu
11 Pakuninga ci tu na dimuka ci ku yapa Fumu ne ine, twaa karaethza anu amweya ci a tawe. Nyambi po aa tu dimuka nawa, karo naa kurupera ci namwe mu na i cidimukera nawa ko mumoneno wenu. 12 Ka tu cishangarire twathsinda ku kwenu, unone twaa mi pa ndau thzo ku cinuneka mukaci ketu, ci mu twethse ku tawa awa cinuneka mwinu yo ku twethsa ku mona kupita ku cinunekera enu eyi i di mu mucima. 13 Ngeci yaa monahara ci twaa thzaruka, twaekara kengeyo mukaci ka Nyambi. Uno honi ngeci tu di nawa mu maano twaekara kengeyo mukaci kenu. 14 Thsishimo thsa Krisitu thsaa tu endithsa, inene twaa rakwa ci munu yofoci wa fererire anu wahe, mweyo anu wahe a fire mu kufa kwenthzi. 15 Karo wa fererire anu wahe ci awa yoya a ciyoyera athsinda karo, unone a yoyere oyu wa wa fererire, karo wa pinduriwire kwafu.
16 Mweyo, ku tunda pano ka tu shimbire munu konu. Shaanga ci dyo twa shimbire Krisitu konu, pano honi ka tu mu shimbire kengeyo. 17 Mweyo, ngeci munu mwa Krisitu a di, o na piruka thsumbiwa thsothsipe, enu yo kare i na pu, karo enu yoihe i na piruka yoipe.
18 Eyi yoihe yaa tunda kwa Nyambi oyu naa tu huthsera ku kwenthzi mwa Krisitu, no ku tu pa ekwama yo ku huthsera anu amweya ku kwenthzi. 19 Nyambi kuma a huthserire kaye ku kwenthzi mwa Krisitu, ko kukana ku varera anu mirandu thzo, karo naa tu pa ekwama yo muthzimbu o ku cihuthsa nenthzi. 20 Mweyo, atwe po twemaneni a Krisitu, Nyambi aa cikwathsithsa atwe ku adikanena anu. Twaa mi romba shemwa mu dithzina dya Krisitu ci mu cihuthse na Nyambi. 21 Krisitu ka a tendire thsivi, unone Nyambi wa mu tendire o thsivi mukaci ketu, ci mu mwenthzi twikare owawawa pa meho a Nyambi.