Akwakukwama o thsiyuvano thsothsipe
3
Ene twaa tateka ku cishangara twathsinda karo nji? Inji kwaa fotahara mañoro ombangi aa a keya ku kwenu nji aa a tunda ku kwenu eci edi a na tendanga amweya? 2 Yoyamwe mwene yamwe mwa diñoro dyetu dyo ku tu dimukaharithsa, edi di na ñoriwa mu micima thzetu, edi di na dimukiwa no ku variwa kwanu wahe. 3 Mwaa monithsa ci mwa diñoro edi di tunda kwa Krisitu, edi na di ñoriwa kekwama yetu. Ka na di ñoriwa ko enge unone ko Mupepo wa Nyambi oyu yoya, ka na di ñoriwa pa mathzo, unone mu micima thzanu.4 Twaa amba kengeyo inene tu na rakwa yoshemwa Nyambi ka Krisitu. 5 Ka tu cishimbire cingwa twaa twethsa ku kwama enu yoihe kokoro wetu, unone Nyambi yodiyo tu pa okoro. 6 Yodiyo naa tu twethsithsa ci twikare akwakukwama o thsiyuvano thsothsipe. Ethsi thsiyuvano po ka di cingwa murao o ku ñoriwa, unone thsa Mupepo. Murao o ku ñoriwa waepaa, unone Mupepo ao waa pa mwoyo.
Kutethzima ko thsiyuvano thsothsipe
7 Kwameno thziya thza retire kufa kuma thza cakuriwire ko mataku pa mathzo o mawe. Thza keyire ko kutethzima ko kuninga ci mane Maisiraele ka twethsire ku kenga pa rupara rwa Mushe mukaci ko kutethzima kwathzo shaanga ci kuma kwa thzire o pwa. 8 Athzo honi kwameno thzo Mupepo ne? Kadi kenge thza kwikara no kutethzima kokukuru kupita apo? 9 Inene ngeci kwameno thzo murao thziya thza retire raturo thzekarire no kutethzima, athzo kwameno ethzi thzi reta owawa ne thzi di no kutethzima ko ku kuma kupi! 10 Mane kuya kutethzima ko kutanga po kadi kutethzima, ku ku anekethza no kutethzima ko kupiterera oko. 11 Ngeci ethsi thsekarireko thsikati thsothsipu pohuma thsekarire no kutethzima, ethsi thsa kwikarako diyere ne kadi kenge thsa kwikara no kutethzima kokukuru kupita thso kutanga!
12 Mweyo, pakuninga ci tu di nokurupero o kengeyo, tu di nondume. 13 Ka tu cipiturire na Mushe oyu wa thsikire rupara rwenthzi no thsito ci Maisiraele katere a mone kutethzima o ku ku pwa ku rupara rwenthzi. 14 Unone maano o a karupithsiwire, mane no pano tu di thsiyuvano thso kare yoihe thsi variwa, ethso thsito thsaa thsika maano o, inene ethso thsito thsaa twethsa pohuma ku tundithsiwa ko ku tawa kwa Krisitu. 15 Yoshemwa, no rerodino yoihe a tara eñora ya Mushe, micima thzo thzaa thsikiwa ko thsiya thsito.
16 Uno honi munu yoihe a thsiurukera kwa Fumu, ethso thsito thsaa tundithsiwa. 17 Honi Fumu po Mupepo, karo popahe apa pa di Mupepo wa Fumu, ko ku di kurukuruka. 18 Mweyo, twahe atwe na tu thsikuriwa thsiya thsito ku rupara, twaa monithsa kutethzima kwa Fumu, o ku tu piruriwa mu thsikupuro thsenthzi ko kutethzima oku ku thza o kura oku ku tunderera kwa Fumu, aye Mupepo.