Thsishimo
13
Shaanga yame ni amba madimi oahe anu nji o tungeru, ngeci ka ni di no thsishimo, naa cipitura eci ngunga ethzi thzi rungerera nji eci ngoma ethzi thzi dira. 2 Shaanga yame nikara no thsipa thso kukethza no ku twethsa ku tongonona eyi i na cihoreka yoihe no kwikara nodimukero ouhe, karo shaanga yame nikara no thsitawo thsothsihe thso ku twethsa ku tuturura mikinya, ngeci ka ni di no thsishimo po ka ni kwathsire thsimweya. 3 Shaanga yame ni pa ahepwe eyi ni di nayo yoihe no ku pa erama yange ci i tumekiwe, unone ngeci ka ni di no thsishimo po kwithsa eyi nga i ni kwathsa pa ku tenda kengeyo.4 Thsishimo po thsa kukwatamucima, thsa thsihemo, ka thsi di no mbamba, ka thsa cithzineka, karo ka thsa cishangara. 5 Thsishimo ka thsi di no thsirara, ka thsa fota yathso pohuma, ka thsa anthzipa wangu, karo ka thsa cipakera ethzimbo mu mucima. 6 Thsishimo ka thsa nyanyukera omango, unone thsa ku nyanyukera oshemwa. 7 Thsishimo thsa ku kunda enu yoihe, thsa ku tawa enu yoihe, thsa ku kurupera enu yoihe, karo thsa ku cithzua enu yoihe.
8 Thsishimo mbera ka thsi pu. Unone okethzi kenge mba u pwa, thsipa thso ku amba madimi o kucithsiathsia kenge mba thsi hura, nodimukero kenge mba u pwa. 9 Inene twaa dimukako dicika karo twa okethzako dicika. 10 Unone kamona ku keya yo kwononoka, yo kukana kukwanenena yaa pwa.
11 O ku ni di wanuke, kuma na ambangire eci mwanuke, kuma na anekerangire eci mwanuke karo kuma na yuvithsithsangire eci mwanuke. Uno honi, pano na ni kuru, na ni thsii mikarero thzo wanuke. 12 Thsino thsikati po twaa mona enu yoihe thsimbwimbwi mu thsiponi. Unone ku rupara kenge twa ku mona nawanawa enu yoihe. Uno honi yoihe eyi ni na dimuka naa i dimuka kamanana, unone kenge na ku i dimuka ko kuyara, eci Nyambi edi a na ni dimuka ko kuyara.
13 Pano honi eyi enu ihatu yo ya kwikarererako diyere: thsitawo, okurupero no thsishimo. Unone thsothsikuru kweyi po thsishimo.