Enomenithso mukaci ko ku rombera ekupuro
10
Andengenu, naa fota ci mu vuruke eyi ya tendaharire kwakwathsañuruetu mu dikunguthsitu kukare. Wahe kuma a endire mushi thzo diya divui dyofoci, karo wahe a pitire pa mburundumburundu pa Diwate Dyodikihu. 2 Wahe a korovethziwire mu divui no mu diwate ko ku cipakerera na Mushe. 3 Wahe a dire edya yofoci yo mupepo, 4 karo wahe a nwine meyu ofoci o mupepo, a nwine ku Diwe dyo mupepo edi dya endireno, edyo Diwe po nedi Krisitu. 5 Unone shaanga kengeyo, ongi wo ka roerithsire Nyambi, mweyo, a fire, ethzimbi yo ya dyadyamine mu dikunguthsitu.6 Uno honi eyi kuma ya tendaharire ci ikare muro ku kwetu ci twa cikumbwethza enu yoimango eci edi a tendire. 7 Mwa rombera ekupuro eci edi a tendire amweya ku kwo. Eci edi ku na ñoriwa ci: “Mbunga thzekarire pashi ku dya no ku nwa, ngou a katukire no ku tenda ruhunga.” 8 Ka tu roerire ku tenda ruthziho eci edi a tendire amweya ku kwo, mweyo, kwa fire anu o 23,000 mu diyuwa dyofoci.
9 Ka tu roerire ku ereka Krisitu eci edi a tendire amweya ku kwo, awa paiwire ku mayoka. 10 Mwa tatoka eci edi a tendire amweya ku kwo, awa paiwire ku kangeru aka a tumine Nyambi ku na wa thzirithsa. 11 Eyi yoihe kuma ya tendaharire ku kwo ci ikare muro, karo ya ñoriwire ci i nomenithse atwe tu yoya mu thsikati thso mahurerero.
12 Mweyo, ngeci mwaa anekera ci mu na tanara, mu mamere ci katere mu we! 13 Etumaura yoihe eyi na i mi keyera, yaa cipitura neyi i na keyeranga anu amweya wahe. Nyambi po wa ku rurama, tumba a tawethza ci mu tumauriwe ku piterera okoro wenu. Unone kamona mu tumauriwa, aa mi roithsera dikuñwa omu nga mu tunderamo ci mu twethse ku cithzua micima.
Edika yekupuro no murarero wa Fumu
14 Mweyo, ashimiwa ange, mu tunde ku ku rombera ekupuro. 15 Naa amba nanu o maano, mu ciratwere mwathsinda eyi ni amba ci ya shemwa nji ngepi. 16 Ou tu na nwanga mu nganja thzo thsiyauthzi ethzi tu na rombanga Nyambi ci a thzi fiyawere, ene ka tu cierangire onyinga wa Krisitu nji? No uya tu na kuyauranga dikende no ku di dya, ene ka tu cierangire erama ya Krisitu nji? 17 Shaanga ci twangi, twaheno twaa dyanga ku dikende dyofoci ku monithsa ci twa thsirama thsofoci. 18 Mu anekere Maisiraele. Ene kadi awa dya eyambero yo pa katara aa citapera thsinu thsofoci?
19 Eyi ni amba ne ine? Ene naa amba ci edya yo ku tupwera ekupuro ikuru mu thsivaka nji? Nji ci ekupuro po anyambi shemwa? 20 Dyombo! Eyi ni amba po eyambero yo mahedeni aa i tupweranga mathzimu kadi Nyambi. Ka ni fotire ci namwe mu kwamene pofoci no mathzimu. 21 Tumba mu twethsa ku nwena mu nganja thza Fumu no ku nwena karo mu nganja thzo mathzimu. Tumba mu twethsa ku ciera ku tafure thza Fumu nethzi thzo mathzimu. 22 Ene mwaa fota ci tu shovongore difupa dya Fumu nji? Ene mwaa anekera ci twa koro ku mu pita nji?
Mu remeke Nyambi thsikati thsothsihe
23 Mwaa amba ci: “Ni na tawethziwa ku tenda enu yoihe.” Ii, uno honi kadi cingwa enu yoihe yaa kwathsa. “Tu na tawethziwa ku tenda enu yoihe,” uno honi kadi cingwa enu yoihe yaa kwathsa munu. 24 Munu a pakera maano yenthzi pohuma, unone a pakere maano yanu amweya.
25 Mu dye yoihe eyi i urithsiwa mu maurithsero o nyama ko kukana kwipaura mangudi mukaci ko mumoneno. 26 Inene ku na ñoriwa ci: “Kaye po ka Fumu neyi i dimo yoihe.”
27 Ngeci munu o kukana ku tawa aa kwithsera ku tafure, o thze ngeci waa fota. O ka dye yoihe eyi a ka ku pa ko kukana kwipaura mangudi mukaci ko mumoneno. 28 Ngeci munu yumweya ayepo mi ambera ci: “Oyu nyama po kuma naa tupweriwa ekupuro.” Mwa dyako mukaci koyu na mi ambera kengeyo, no mukaci ko mumoneno. 29 Ka ni ambire yo mimoneno thzenu unone mumoneno wa yumweya. Uno honi ine kurukuruka kwange eyi nga ku raturiwera ku mumoneno wa yumweya. 30 Ngeci naa dya kokanderero kwa Nyambi ne, ine karo eyi nga nipithsiwera dithzina pa ku i dya?
31 Mweyo, nji mwaa dya nji ku nwa, nji mwaa tenda ngara thsinu, mu i tende yoihe mu ku shangara Nyambi. 32 Mu yoye ko dikuñwa dyo kukana ku kwangithsa anu, ikare Majuda nji Magerike, nji kereke thza Nyambi. 33 Mu kwame eci edi ni kwama. Name naa erekanga ku nyanyukithsa anu wahe mweyi ni tenda yoihe. Ka ni tendangire pohuma yoiwa ku kwange, unone naa tenderanga yoiwa owangi ci nga a yoyithsiwe.