16
“Na ni mi tongwera yoihe eyi ci katere mwa ku thsie thsitawo thsenu. 2 Kenge a ku mi cithza mu masinagoge, karo thsikati thsaa keya ethsi a ku anekera awa ku mipaa ci aa kwamena Nyambi. 3 Karo kenge a ku tenda eyi pakuninga ci ka na dimuka Tata, nji ame. 4 Uno honi ni na mi ambera eyi, ci thsikati thso ou thsa ku kuma mwa ku vuruke ci shime naa i mi tongwera.Ekwama ya Mupepo Oukenu
“Ka na ni mi tongwera eyi ku tunda ku matatekero, inene kuma na nikara nenu. 5 Uno honi naa huka koyu naa ni tumu, karo kwithsa shaanga yofoci ku kwenu oyu nipura ci: ‘Kupi oku o thza?’ 6 Pakuninga ci ni na mi tongwera eyi, micima thzenu thzi na yara mathsiwa. 7 Naa mi tongwera yoshemwa ci ku di nawa ci ame ni thze, inene ngeci ka na ku thza, Mukwakukwathsa ka a ku keya ku kwenu. Uno honi yoihe ni thza, kenge na ku ka mu tuma ku kwenu. 8 Ou a ku keya kenge a ku na monithsa anu mu kaye thsivi thso no ku wa monithsa owawa no raturo: 9 keyi yo thsivi thso, pakuninga ci ka tawire ku kwange, 10 keyi yowawa, pakuninga ci naa thza kwa Tata, karo ka mwa ku ni mona karo, 11 keyi yo raturo, pakuninga ci muendithsi o kano kaye naa raturiwa kare.
12 “Shimbi nekarera neyi yoingi yo ku mi tongwera, uno honi tumba mu twethsa ku i shimba pano. 13 Ou a ku keya aye Mupepo o shemwa, kenge a ku na mi tangerera mushemwa ouhe, inene ka a ku na ciambera kokoro wenthzi, unone kenge a ku na amba eyi naa yuvu, karo a ku na mi rawera enu eyi i keya. 14 Kenge a ku reta ci ni piwe kutethzima, inene kenge a ku na mi rawera eyi a ku tambura ku kwange. 15 Yoihe ya Tata po yange, eyo ngeyi ni na mi amberera ci: ‘Mupepo kenge a ku na mi rawera eyi a ku tambura ku kwange.’
Mathsiwa enu kenge a ku piruka thsinyanyu
16 “Ku na thsiara thsikati thsothsipu, ka mwa ku ni mona, unone munyima thzo thsikati thsothsipu, kenge mwa ku ni mona karo.”
17 Imweya kwirongwa yenthzi ya ciambathsanine ci: “Ine eyi a amba pa ku amba ci: ‘Ka mwa ku ni mona mu thsikati thsothsipu, unone munyima thzo thsikati thsothsipu kenge mwa ku ni mona karo’ karo ci: ‘inene naa thza kwa Tata?’ 18 Karo a amba ine pa ku amba ci: ‘thsikati thsothsipu?’ Ka tu yuvithsithsire eyi a amba.”
19 Yesu wa dimukire ci kuma ya fotire ku mwipura, ngou a ambire ci: “Ene mwaa cipaura ci naa amba ine pa ku amba ci: ‘Ku na thsiara thsikati thsothsipu, ka mwa ku ni mona, karo munyima thzo thsikati thsothsipu kenge mwa ku ni mona karo?’ 20 Naa mi tongwera yoshemwa ci kenge mwa ku dira makuano mukaci keyi ya ku tendahara ku kwange, unone kaye ako kenge ka ku nyanyuka. Kenge mwa kwikara mu mathsiwa, unone mathsiwa enu kenge a ku piruka thsinyanyu. 21 Kenge ya ku cipitura eci kukora ko mbuyama oyu shamuruka. Mwane o ku na shamurukiwa aa vurama dikarara dyenthzi mukaci ko thsinyanyu pakuninga ci o na reta kambu mu kaye. 22 Dyo i di ku kwenu, mu mathsiwa mu di pano unone kenge na ku mi mona karo, karo kenge mwa ku nyanyuka, karo kwithsa oyu wa ku mi nyanga thsinyanyu thsenu. 23 Mo diya diyuwa ka mwa ku nipura thsimweya. Naa mi tongwera yoshemwa ci, yoihe eyi mwa ku romba Tata mu dithzina dyange, kenge a ku i mi pa. 24 Shime ku na kuma rerodino ka mwa rombapo thsimweya mu dithzina dyange. Mu rombe, karo kenge mwa ku piwa, ci thsinyanyu thsenu thsi kwanenene.
Yesu naa othzo kaye
25 “Ni na amba eyi enu ko ku cikwathsithsa maambo. Thsikati thsaa keya apa na ku kana ku amba ku kwenu ko maambo, unone kenge na ku cinakana ku mi tongwera ya Tata. 26 Mo diya diyuwa kenge mwa ku romba mu dithzina dyange. Ka ni ambire ci kenge na ku mi rombera kwa Tata, 27 inene aye Tata thsinda aa mi shima, pakuninga ci mwaa ni shima no ku tawa ci kwa Nyambi na ni tundu. 28 Kuma na ni tundu kwa Tata ku keya muno mu kaye, pano honi naa thsia kano kaye ku huka kwa Tata.”
29 Erongwa yenthzi ngou ya ambire ci: “Pano honi waa cinakana ku amba, ko ambire ko ku cikwathsithsa maambo. 30 Pano honi tu na dimuka ci o na dimuka enu yoihe karo kwithsa eyi nga a kwipawera munu, eyi ngeyi tu tawera ci kwa Nyambi no tundu.”
31 Yesu wepurire ci: “Ene mwaa na tawa honi? 32 Thsikati thsaa keya, mane thsi na kumu kare, apa mwa ku panthzaana munu no munu ku thza ku diumbo dyenthzi no ku ni thsia nofoci. Uno honi kadi nofoci ni di, inene Tata nange a di. 33 Ni na mi ambera eyi enu ci mwa kwikare no thsiyaro mu mwange. Muno mu kaye kenge mwa kwikara mu makando. Unone mu tanare micima, inene na ni othzo kaye.”