Yame no thsitondo shemwa thso veine
15
“Yame no thsitondo shemwa thso veine, karo Tata yodiyo njimi. 2 Mute ouhe ku kwange o kukana kwima aa u tetako, karo mute ouhe o kwima ima aa u poywera ci wime ima yoingi. 3 Na mu kenithsiwa kare ko maywi aa na ni mi ambera. 4 Mwikarerere mu mwange eci edi ni di mu mwenu. Dyodi u na kananga kwima mute o veine pa pao ofoci shime ci wikare ku thsitondo thsao, namwe tumba mu twethsa kwima shime ci mwikarerere mu mwange.5 “Yame no thsitondo thso veine, amwe yamwe mwa mite. Yomuhe o kwikara mu mwange name mu mwenthzi, oyo yodiyo o kwima ima yoingi, inene ko kupira ame tumba mu twethsa ku tenda thsimweya. 6 O kukana kwikara mu mwange aa konthziwa eci mute no ku kukuta. Mite thzo kengeyo thza ongeriwa no ku konthzeriwa mu mudiro no ku pya. 7 Ngeci amwepo mwikarerera mu mwange no maywi ange aopo ekarerera mu mwenu, mu rombe yoihe eyi mu na foto, karo kenge mwa ku i tenderiwa. 8 Kutethzima kwa Tata kwaa monahara ngeci amwepo mwima ima yoingi, karo pa ku tenda kengeyo mwaa monithsa ci mwerongwa yange.
9 “Eci edi a ni shima Tata name naa mi shima kengeyo. Mwikarerere mu thsishimo thsange. 10 Ngeci amwepo mu hengeka eraerera yange, kenge mwa kwikarerera mu thsishimo thsange, eci dyodi na ni hengeka eraerera ya Tata no kwikarerera mu thsishimo thsenthzi.
11 “Ni na mi ambera eyi enu ci thsinyanyu thsange thsikare mu mwenu, karo ci thsinyanyu thsenu thsikare thso kukwana. 12 Thsiraerera thsange po ethsi: Mu cishime oandu eci edi na ni mi shimi. 13 Kwithsa thsishimo thsothsikuru kupita ethsi: munu ku pa mwoyo wenthzi mukaci kambushenthzi. 14 Mwambushange ngeci amwepo mu tenda eyi ni mi raerera. 15 Ka na ku mithsa karo ci apika, inene apika tumba a dimuka eyi a kwama ñathsire wo, uno honi ame naa mithsa ci ambushange, inene na ni mi tongwera yoihe eyi na ni yuvu kwa Tata. 16 Kadi yamwe na mu ni hangura, unone yame na ni mi hangura. Karo na ni mi hangura ci mu thze mu keme ima eyi ya kwikarerera, ci yoihe eyi mwa ku romba kwa Tata mu dithzina dyange a ku i mi pe. 17 Eyi yodiyo ni na mi raerera, ci mu cishime oandu.
Kuthzimbiwa ku kaye
18 “Ngeci kaye kaa mi thzimba, mu dimuke ci yame na ka tanga tango ku thzimba. 19 Nga mwakwa kaye, kaye nga kaa mi shima eci anuako. Uno honi pakuninga ci kadi mwakwa kaye, unone na ni mi hangura ku mi tundithsa ku kaye, eyo ngeyi ka mi thzimbera kaye. 20 Mu vuruke maywi aa na ni mi ambera o ku ninga ci: ‘Ngamba tumba a piti ñathsire wenthzi.’ Ngeci na ni nyandithsa, namwe kenge a ku mi nyandithsa. Ngeci na hengeka maywi ange, kenge a ku hengeka na a enu kengeyo. 21 Unone kenge a ku tenda eyi yoihe ku kwenu mukaci kange, inene ka dimuka oyu naa ni tumu. 22 Nga ka na ni keya no ku na amba kukwo, nga ka di no murandu o thsivi, uno honi thsivi thso kwithsa edi a ku thsi hamura. 23 Yomuhe o ku ni thzimba aa thzimba no Tata kengeyo. 24 Nga ka na ni kwama mu kaciko ekwama eyi a kana ku kwamapo yumweya, nga ka di no murandu o thsivi, uno honi na mono no ku thzimba ame na Tata. 25 Uno honi eyi i na ñoriwa mu Murao wo yaa roera ku citombora, yo ku amba ci: ‘Na ni thzimbi ko kupira thsimweya.’