Ɔtɔmnang kwo odong odong
16
1 Jisɔs oteg abuwinnam pɛ abɛ, “Ɔkam uzuwadanang kwɔ ɔkam ɔtɔmnang kwɔ ono okker ekpo pyɛ, anang ateg-ɛ abɛ unu udɨm akpog pɛ. 2 Oyen nwo ojer-ɛ, oben-ɛ abɛ, ‘Bagudɨg gwɔ kwɨnnɨ wanga ɔbanga ɔmabɛ? Kɛr ekpo mbyo akɔg-m otsekwɛ atɨm ekpo pyam ukwurabɛ adag ekpo pyam makker.’3 “Otserɔtɔm nwo oben ɛma oyen abɛ, ‘Mɨnsiyang sa ɔnang nwa ono oben abɛ otaga ɔtɔm nva ka kam kɔ ɔbɔg? Amma fɨnɨn nkpɔga kwu mɨ ntɨm iseg ɔttara nkpar nɨnssi mussi sɛ mɨ nshem anang ekpo. 4 Nsong udɨg ma kwɛ mɨnssi fasɛ okpe kwɛ kam ukuwa kɔ ɔtɔm pfɛ, nkama ayogdikow pa abɛ ma atag-m nnɨnga abubɛ ka abɛ kɔ ɔtsɔm odesɛ kam ukuwa.’
5 “Muma, okwo ojer anang pa aba atsi uzuwadanang nwo ifor, ɔnang kawan kawan. Ɔbɔw otseden nang, ‘Atsi utsetso kwam ofor yan?’
6 “Ɔpɔn-ɛ abɛ, ‘Akparakpa nnɔna nffa ra ana po olif.’
“Okerekpo nwo oben-ɛ abɛ, ‘Nɨnga ɛyɛr ɛwɛrɛwɛrɛ, awag akkɛr abɛ ode apkarakpa ɛnɔna.’
7 “Ɔbɔw ɔnang ɔdwag, ‘Ɔma atsi ofor yan?’
“Ɛma opɔn-ɛ abɛ, ‘Abbo araw asen pyi igwanyang.’
“Oteg-ɛ, ‘Wag akkɛr ode abbo araw anebɨng pyi igwanyang.’
8 “Uzuwadanang ɔttag ɔtɔmnang pyuwa nwo ki idongini rɛ ukwurabɛ anang pɔ ɔyagbɨn nwa aba adong otse kwa abɛ na asenga ayog abɛ ayonga anang pa anɨng ke esonga. 9 Nteg banga, tɨma uzuwada kwɔ ɔyagbɨn assi eyogdikkow anang abangama oyen fasɛ odesɛ kɛra, Ubɨnɔkpaaby ɔtag banga anwa ka akpen pa ana itɨma na kama.
10 “Odesa akkema atɨma ɔtɔg fi ikikar, nakkokke atɨma ekpo pyi ididen. Odesa ana atwɨg anang ki idɨg va, na atwɨg anang ki idɨg ri ididen. 11 Odesɛ abanga no otse na asoga kwa abangama asenga atɨma uzuwada kwɔ ɔyagbɨn nwa obengana, abɛ ma assiyan pɛrɛ abɛ atte ɔbɔg ku uzuwada ɔkkakwɛ aba anang banga akker-o? 12 Odesa ɔma ana ekpo byɔ ɔnang ɔdwag nakka akker obengana, anɛwɔ mɔ ɔnang-ɔ ekpo pyɔ oyen-o?
13 “Otserɔtɔm kode kwɛ mɔ ussi ɔtɔm ɔnang atsetso affa ko okpe gwan; nɔ ɔkwan oyog wan, oyog nwoga odag-ɛ; no okpow oyog wan ɔmanga ɔsɛg oyog nwoga. Abanga Ubɨnɔkpaabyi makka ɔkpowa ɔttara ka akpog eden zan.”
14 Afarisi pa aba adag akpog aba awanga idɨg ndo aba amma Jisɔs ara 15 Jisɔs oben bɛ abɛ, “Abangama na aror abɛ anang ana se banga abɛ abangama ade anang ɔkka ka atsen pa anang, Ubɨnɔkpaabyi osong nttem ra abanga ma. Ɔttɔg fɔ ɔyagbɨn ɔtag abɛ ɔttɔg ɔkka vɔ, apfɛ ɔttɔg nuda ki ititiga tsu Ubɨnɔkpaabyi.”
Nkpewa rɨnjag muma
16 “Pɛrɛ Jɔn Opyenga-assi ukwu, inyɨna tsɛ Mosis ɔttara anwɛr pa ategnkkawa pu Ubɨnɔkpaabyi byɔ ini itɨm banga. So oto ko okpe kwe Jɔn Opyenga-assi ɛkkawa zuwa tsɛ Ɛvaar tsu Ubɨnɔkpaabyi, aba anang ka ateg anang, ɔnang kwidede ɔnɔ ɔyɔr abɛ ɔnwa kɛ ɛffa. 17 Akwɛ mɔ ɔkar abɛ ɛrang ottara ki iseg idɨm ɔyɔnga abɛ ɔttɔg nwa kwi Inyɨna tsu Ubɨnɔkpaabyi idɨm.
18 “Ɔnang kwidede kwu ukuw ukwa kwɛ ɔtaga ukwanɨng ɔdwag, abɛ na vag-ɛ kɔ ɔtta, ɔnang kwidede kwɔ ɔtag ukwanɨng kwa aba akuw-ɛ kɔ ɔbada, abɛ na avag-ɛ kɔ ɔtta.
Uzuwadanang ɔttara Lazarɔs
19 “Ɔkam uzuwadanang wan kwɔ no oke ekpo pyi izuw-uzuw ɔttara utsi utsapfɛ ɔkkapfɛ igwu tsidede. 20 Ma kɛ ɛkamma tsɛ, ɔkam ukpukpora wan kwo okpen Lazarɔs kwɔ ɔkam awag ɛkpakpa ibɨng. 21 Ono oben abɛ udwunga utsatɔg pfɛ unu ubɨna ko okpokoro kwu uzuwadanang nwo otto ki iseg; npfa nnɨnkwu ɛttag awag pyu ukpukpora nwo.
22 “Ukpukpora nwo okwo oppe, atɔmɔtɔm pu Ubɨnɔkpaabyi akwu akwa adɨr-ɛ apfona ga ikpa re Ebraham. Uzuwadanang nwo okwu kwo oppe. Aba annɔng-ɛ. 23 Gɨga ke ekpon su unɨng ki irem, ɔmag atsen ose Ebraham ga ke edeniwur ɔttara Lazarɔs unɨnga ɔjag-ɛ. 24 Uzuwadanang nwo ojer kɛ ɛrang, ‘Adere Ebraham, se-m ikwosisi ɔttara tɔm Lazarɔs olag ɛnɔna-tso ka assi udɨr-m ɛdag ukwurabɛ nnɨng ki irem gaga ka akpondag.’
25 “Ebraham ɔpɔn-ɛ abɛ, ‘Unwa, zɨma abɛ ko okpe kwa atɨma anɨng ka akpen ku uzuwada kwɔ ataga, Lazarɔs ɔmanga ɔtaga idɨg pyuwa, mazizan ko olew ɔkama, ɔma manga adɔw irem. 26 Ɔttara, ɔkam eppe se ekew mana, ɔnang kwo oben abɛ ozega ukwu giga mokke, ɔnang kwo oben abɛ ubɨna ga abanga ukwu gaga mokke.’
27 “Uzuwadanang nwo oben abɛ, ‘Toto adere, tɔm Lazarɔs ɔta ga kɔ ɔtsɔm kwo otte kwam. 28 Ukwurabɛ nkam uvɔkka pi idwunɨng asen, nror mbɛ ɔta ɔnang bɛ ikamana fasɛ abɛ ananga akwu ma kɔ ɔwang kwi irem.’
29 “Ebraham ɔpɔn-ɛ abɛ, ‘Abɛma akam inyɨna tsɛ Mosis ɔttara ka anwɛr pa ategnkkawa pu Ubɨnɔkpaabyi, abɛ tor otse kwa aba akkɛr pyɛ.’
30 “Uzuwadanang nwo ɔpɔna abɛ, ‘Mma, adere Ebraham, odesɛ ɔnang ubɨn gaga kɔ ɔwang kwo obo oto okew bɛ, abɛ na atte ipyuwa ɔbɔg.’
31 “Ebraham oben abɛ, ‘Odesɛ abɛ na inyɨna tsɛ Mosis ɔttara ka anwɛr pa ategnkkawa pu Ubɨnɔkpaabyi nawanga, ɔnang ɔkwɔna ubɨna ɔshɔwa ko obo, abɛ itɔng kɛma akɔm pɛrɛ abɛ atsera.’ ”