Jisɔs Uyin kɔ Ɔtsɔm kwa Farisi
14
1 Kɛ ɛwɔngkwoga gwu zan, Jisɔs uyin giga kɔ ɔtsɔm kwɔ ɔnangttama kwa Farisi, anang akker-ɛ tɔng aba ase ɔttɔg fɛ mussi fɔ ɔni inyɨna sa abɛ ne etora. 2 Ko oro pfɛ, udwunɨng wan kwu uvɨn-uvɨn unɨng muma. 3 Jisɔs ɔbɔw Afarisi ɔttara akpewinyɨna tsa Mosis abɛ, “Akwɛ ode udɨg kwi inyina odesɛ aba agweng ɛmada kɛ ɛwɔngkwoga gwu?” 4 Aba amyikkam, Jisɔs ɔkwɔ ɔvaga udwunɨng nwo kɔ bɔg, ussɛ ogweng, uttɛ ɔbɔg opfona ko oter.5 Muma wɔ kwɛ Jisɔs ɔbɔw bɛ abɛ, “Wɛrɛ ude abɛ unwakwɔ wan, sa ode ɛwaam tsɔ etto ke eppe tsa assi ki igwu tsɛ ɛwɔngkwoga, ɔma ɛwɛrɛwɛrɛ tsɛ ma areng muma zizan?” 6 Abɛma ɔtɔnga na kama kwa abɛ ammang anang.
7 Ibe rɛ Jisɔs ose akiken mbo sa aba ata anɨnga ko okpokoro tso, ɛma ɔtta bɛ otse abɛ, 8 “Odesɛ ɔnang oteg banga ɔbada, nang itso atto ata anɨnga ke ekpokoro tso, ɔnang kwɔ ɔyɔng ɔma aba akema ateg-ɛ. 9 Odesɛ ode otse ngwo, ɔkaminɨnga kwo jer banga nu kwu oben-ɔ abɛ, ‘Bɨna ki itsi nang oyog.’ Kɔ ɔma nkpar orenga, oben-ɔ ata anɨnga ki itsi tsi ikikar. 10 Udɨg ode gwan, okpe kwa aba ajer-ɔ, ta anɨnga ki itsi tsi ikikar, odesɛ ɔkaminɨnga ukwu no oben-ɔ abɛ, ‘Oyog, bɨna ata anɨnga ga ko okpokoro tso,’ muma wɔ ɔnang-ɔ ikpɨkpowa ki ititiga tsa anang pɔ ɔttara ojer banga. 11 Ɔnang kwidede kwu udɨr ɛma oyen kɛ ɛrang, abɛ na arag-ɛ ɔraga, ɔnang kwɔ ɔrag ɛma oyen, abɛ na dɨr-ɛ kɛ ɛrang.”
12 Muma wɔ kwɛ Jisɔs ɔtɔnga oyenɔtsɔm abɛ, “Ibɛ rɛ ajer anang aba akwu kwa atsi utspfɛ ɔmabɛ kɛ tsɔga, nanga ayogudikow, uvakka, anang pɔ, ayogrɨgbanga pa akam akpog ajer, odesa assi otsengwo, anang mbo na ajer-ɔ aba atwug-ɔ. 13 Odesɛ akam elowa jer akpukpora, akwukwu, ashakngbɛdɛ ɔttara akpatsen. 14 Odesɛ assi otsengwo, Ubɨnɔkpaabyi nɔ ɔwɔw-ɔ ita, masɛ abɛ anama akke ammanga anang-ɔ, Ubɨnɔkpaabyi nɔ ɔmang ɔnang-ɔ ki ibe rɛ anang zuwa ma shɔwa ko obo.”
Otse kwɔ ɔbang ke elowa tsi itidam
15 Ibe ru ukɨken wan kwu unɨng ko okpokoro ɔwang idɨg nda, oben Jisɔs abɛ, “Olew ode fɔ ɔnang kwu tsi utsapfɛ kɛ Ɛvaar tsu Ubɨnɔkpaabyi.”
16 Jisɔs ɔppɔn-ɛ abɛ, “Udwunɨng wan unu ussi elowa tsi ititam, ukwu oteg anang pa asawɔsaw abɛ aba akwu. 17 Ibe rɛ elowa nzo ekwe ewem, obena otserɔtɔm kwɛ abɛ ojer anang mbo pɛ ɛma ka abɛ otega abɛ, ‘Akwu, kɔ ɔttɔg pfi idede nda ntsog.’
18 “Abɛma ibɨng aba akam idɨg rɛ issi bɛ aba annama ake akwu. Otseden nang oben abɛ, ‘Amma nnapɛrɛ ndew ɛdam, nɨnbenbɛ nta ntɨnse tsɛ, ɔnang-ɔ ɔdwag, mɨnkke nkwu.’
19 “Ɔnang ɔdwag oben abɛ, ‘Amma nnapɛrɛ ndew nwaam zow rɔ ɔtɔm, amma nnɨng ke eden nta nyoma pyɛ, ɔnang-ɔ ɔdwag, mɨnkke nkwu.’
20 “Adɛgɛ, ɔnang wan oben abɛ, ‘Amma nnapɛrɛ ɔtaga ukwanɨng amma mɨnkke nkwu.’
21 “Otserɔtɔm ɔmanga innam ukwu oteg oyenɔtsɔm kwɔ ɔtɔm-ɛ tse kwɛ aba atɔng. Oyenɔtsɔm akwɛ ɔdwag-ɛ, ɔtɔm otserɔtɔm abɛ, ‘Sɔng ɛwɛrɛwɛrɛ ga kɨnden ri ititam ɔttara kɨnden ri ikikar ro ofon kwi ititam, tɨma akpukpora, akwukwu, ashakngbɛdɛ ɔttara akpatsen akwu.’
22 “Otserɔtɔm oteg oyenɔtsɔm abɛ, ‘Ɔtɔm pfa atɔm-m kɨnsa, ɛwang itɨma inɨng muma sa anang ɔdwag ma anɨnga.’
23 “Oyenɔtsɔm oteg otserɔtɔm kwɛ abɛ, ‘Sɔng gi iyan, kɨnden ri ifon ri ikikar ɔttara kɨnden rɨnmɨn atɨma anang aba akwa anwa fasɛ aba afu kɔ ɔtsɔm kwam. 24 Nteg banga, anang mbo pɨntseden njer kode kwɛ mu utsi utsapfɛ pfam.’ ”
Otsekwɛ Massi pɛrɛ Ade Ubuwinnam kwɛ Jisɔs
25 Anang pa asawɔsaw abɛ na asenga Jisɔs abɛ, ɔwag oten bɛ, oben bɛ abɛ, 26 “Ɔnang kwɛ mu ukwu ka kam, amma nɨndag-ɛ nyɔnga otte, ɔkka, ukwa, uva, uvɔkka, ɔttara ka akpen pɛ; ono otse ngwo nuda, ubuwinnam kwam mo ko ode. 27 Ɔnang kwɔ ɔnɔ ɛkpaga tso obo tsɛ nudɨra ubuw-m innam, ubuwinnam kwam mo ode.
28 “Wɛrɛ udabɛ ɔnang no oben abɛ umun ɛnyɔng, otitso unɨng ɛyɛr uwug ekpo pyɛ mo odɛw, ose, sade akpog mbo sɨma agba pɛ mo okera ɔtsɔm ngwo? 29 Odesɛ ono otsengwo nussa, otitso oyoma ɛnyɔng nzo, atsɛ ɛnanɛ ɛra, anang na ammɛ ara. 30 Abɛ na aben abɛ, ‘Udwunɨng nwa utitso kɛ ɛnyɔng, atsɛ nɛrra.’
31 “Sa, masɛ ɔvaar uddɛ ɛkpakpa tse ekpong ɔbaanga ɔvaar ɔdwagɔdwag kwɛ, ɛma wɛrɛ mo otitso unɨnga ɛyer, ɔtan odesɛ ɛma sɨma okke utɨma nnɔna ɛraw ukkama asen pa arɨma ekpong aba arɨma anang nnɔna araw affa ukkama zow? 32 Odesɛ ɔnamokke, nɔ ɔtɔm anang aba akewa ɔvaar nwoga su utɨm unɨng ke edeniwur fasɛ aba assi ɛmɛm. 33 Otsengwo gwan, ɔnang kwidede, onɛ ekpo pyɛ ibɨng ɔbɔg nu utta, ubuwinnam kwam mode.
34 “Unɨng uzuwuzuw, odesɛ apfɛ udɨm olew mvo, ma assiyan pɛrɛ assi pfɛ olew adɛgɛ? 35 Apfɛ funu uzuwa aba atɨma addo iseg rɔ, ɛsamma sa abɛ ma akpa ekpo, ɔbanma kwa aba awar pfɛ.
“Ɔnang kwɔ ɔkam itɔng rɛ nɔ ɔwanga udɨg, ɔwanga.”